عكس في شارع الهرم ؟! والفامية !! والسرينة ؟؟!
بسم الله الرحمن الرحيم
السلام عليكم ورحمة الله وبركاته
بعد 25 وغياب الشرطة فلت العيار من السواقيين ملاكي واجرة وكلة ؟؟
يعني دلوقتي عايز اقول ان معظم الناس بتفييم الناس الي قدامنا فيمو .. وتلت اربع البلد فيمت ..
طب لية ؟؟ الناس مافيمتش من الاول لية !! ولا ان غاب القط العب يا فار ؟؟
انا عارف ان كل واحد حر بس برضوا مش بالطريقة دي .. الناس بتفيم دارك يعني مش شمس ولا غيرة لاء علشان انتا جامد بتفييم !!
انهاردة قابلت واحد صاحبي ولقيتة مفيم .. واعدت اقولة لية مفيم وكدا .. طبعا الاجابة مافيش شرطة ومافيش حد يسال .. وركب السرينة المستفزة .. بصراحة حاجة في قمة الاستفزاز مفيم وسرينة والناس بتهابك في الشارع !! لما يشغل السرينة تلاقية الناس خايفة خصوصا سواقي المكروباص والجمعية .. غير لما تكون راكب بدون ما تفييم ولا سرينة ..
وانا راجع مروح راكب المكروباص في شارع الهرم .. ( طبعا العربية مريحة في الجراج واكاد بنزل بيها مرة واحده او اتنين في الاسبوع او كل اسبوعيين لضروروة فقط نظراً لحوادث السرقة والبلطجة -- حتي الواحد مش بيشيل همها وبيبقي مرتاح ^_^ )) ..
المهم نازل عند منطقة بعد المريوطية عند كازينو اسمة اتون وداخل الشارع الي فية النفق الجديد ..
الاقي مكروباص خارج من الشارع الي فية النفق وواخد شارع الهرم عكس الي المريوطية ؟؟!!!
انا شايفة وهو داخل عكس وانا نازل من المكروباص .. وانا مروح ضميري بيأنبني وبقول لنفسي انا ازاي ماوقفتوش ومنعتوا وقولت له اية الي انتا بتعملو ده .. خصوصا السائق شاب في عمر 17 الي 20 ...
بجد حزين ع حال البلد لان الناس مش بتلتزم .. وغياب الشرطة الي بتنزل علي استحياء .. وحزين اكتر اني كنت سلبي وكنت عايز ارجع بجد واتخانق معاه ومادخلوش الشارع بالعكس ...
ده كان وراة اتوبيس سياحي وكذا عربية وهو معطل الطريق .. والله اعلم كان فية سياح في الباص السياحي ولا لاء وشافوا قد اية بلدنا متحضرة؟؟
لكِ الله يا مصر .. بلطجة وسرقة وعدم امان وعدم التزام وعدم احترام من الاغلبية .. لكِ الله يا مصر