الموضوع: حادثة صغننة وشوية أسئلة

السلام عليكم

يوم الاحد 27 فبراير التاسعة مساءا واثناءا توجهي ناحية مدينة نصر وانا اسفل كوبري المطار في اتجاه مساكن شيراتون
انتو عارفين ان اليو تيرن ده زحمة جدا في الحتة اللي جنب بنزينة كالتكس

المهم الطريق ماشي عربية عربية وانا واقف في الزحمة فجأة
طاااااااخ

عربية 128 من الجنب اليمين ورايا دخلت فيا

طبعا اترجيت رجة جامدة انا واهلى

والناس اللي حواليا نزلوا من العربيات لانهم افتكروا انهم هما كمان اتخطبوا


نزلت لاقيت العربية بالشكل ده









والراجل اللي خطبني كان راجل كبير حوالي 55 سنة


ماكنش عارف ينزل من الباب بتاع السواق لان من شدة الخطبة الاكصطدام بتاعع اتدمر والرفرف الشمال عنده كبس على العجلة وتقريبا العربية مادرتش



المهم انا ماكنتش عارف اقول له ايه

انا قلت له انا عاوز اعرف انت جبت السرعة دي منين وحنا ااساسا واقفين
وكمان انت ماكنتش وارايا انت كنت في الحارة اللي جنبي؟


المهم وقفنا في الشارع مدة وهو قال انا مش هاقدر ادفع اكتر من الف جنية

انا قلت له خلاص المرة اللي جاية تخبطني خبطة بالف جنية


وطبعا مافيش شرطة ولا اي حاجة يعني لو دبحنا بعض ولا حد هايعبرنا


من هنا لهنا دفع الف ومئتين

روحت وانا زعلان وقلت اكيد حرام اني اخدت فلوس منه بس قلت انا هاصلحها لو اتبقي حاجة هاحطها في باب خير باسم الراجل اللي ماعرفش اسمه والا عنوانه ولا رقم عربيته






وبدأت رحلة التصليح......

تاني يوم ودتها جاويش وعيسى مركز خدمة معتمد جنب سوق العبور
اداني مقايسة بـ12 ألف جنية

وده كمان علشان انا قلت ادخل الزجاج الامامي من كسر قديم
وكمان الزجاج الخلفي داخل احتياطي
وكمان المهندس قال لي ان الشنطة مافيهاش حاجة بس داخلة كده والتامين هايطلب اصلاح مش تغيير

وطبعا رحت التامين وعملت اخطار حادث
وتم المعاينة

واخيرا لسة مستلم العربية امبارح

ودفعت 15 ألف!!!!!!!

11 الف قطع غيار
والباقي مصنعيات


وللناس اللي ماتعرفش
التامين بيعمل خصم 10% في الاسترداد علشان بصلح في الوكيل
وكمان 5% عن كل سنة استهلاك ومخلفات

يعني بعد الضرايب والمصاريف ممكن استرد 10 او 11 الف
يعني هادفع من جيبي 4 او 5 الالاف



دي قايمة بالحاجات اللي اتغيرت

1. رفرف خلفي يمين 2350 جنية
2. فجوة رفرف
3. اكصدام
4. فردة حساس خلفي 450 جنية
5. زجاج امامي
6. شاسية اكصدام
7. فوم اكصدام
8. فانوس خلفي يمين
9. فانوس شنطة
10. شنطة 1650 جنية
11. مفصلة شنطة.
12. كاسحة اكصدام

المهم الشنطة طبعا طالعة سليمة ممكن تترد بالايد

وكمان الفانوس اللي في الشنطة

الرفرف بعد ما اتفك ممكن يستعدل بسهولة



دلوقتي بشوف حد يشتري مني الحاجات دي

الاسئلة بقي:

1. هو كده العربية اتعيبت ولا لا؟
2. كده العربية تعتبر راشة دواخل؟
3. حد ممكن يشتري التوالف ؟
4. ايه التمن المناسب للتوالف؟

كفاكم الله شر الحوادث