الموضوع: هكذا تحدث خبراء الغـش التجـارى فى مصـر

- اللبن النيدو المصري مضاف اليه دقيق- عن تجربة عملية - خصوصا الصغير ابو جنيه وربع.

- عصير المانجو اللي في محلات العصير 70% منه ليس له علاقة بالمانجو أصلا.. ده قرع عسلي.. بمرأى العين.. وسلامي للحاج فرغلي

-اللانشون والبسطرمة.. اللي المفروض مكتوب عليها لحم بقري خالص حلال.. مفيهاش ريحة اللحمة اصلا.. دي سقط حيوانات مدبوحه مفروم مع بهارات وتوابل وجيلاتين وعضم فراخ وبالسم الهاري.. تحياتي للحاج صلاح والمعلم عبد الفتاح ..

- أنواع الهامبورجر المنتشرة في السوق (عدا نوعين تلاتة) كوكتيل من البهارات وماده جيلاتينية بتبقي مبطنة لجلد الحيوانات بعد الذبح وبتتباع من المسلخ الطن منها بـ 250 جنيه تقريبا ..
الطن منها بيستخدم بعد الغلي في قدور كبيرة مقززة في مناطق لاادمية باستخدام عصاية شبه المجداف كده للتقليب وبيعمل حوالي 500 عبوة (زنة 1 كيلو برجر) بتتباع بـ 10 جنيه

الصحة تقفل المصنع ( او بير السلم) وصاحبه يلبس قضية غش تجاري محترم ياخد في الآخر حكم غرامة بـ 10 الاف جنيه او حبس سنة ..وغالبا بيدفع الغرامة ويخرج يأجّر بير سلم تاني وتبدأ عجلة العمل من جديد.

**********
- علب الزيت الـ1 كيلو بتاع القلي ام 2 جنيه وربع و3 جنيه دي- اللي لونه غامق قوي ومش شفاف دي - اصلا زيت مستخدم من محلات الفول والطعمية بيعاد تجميعه في عربيات بتنك زي بتاعة اللبن كده وبتتفلتر بادوات بدائية جدا عشان تشيل بواقي القلي اللي فيها ويعاد تعبيتها في زجاجات - مستعملة مسبقا ومعاد غسلها بالمية والصابون- وبتتعبى يدويا بقمع بلاستيك وتتبرشم بماكينة برشمة تمنها 3 الاف جنيه.. وبيع يامعلم
الزجاجة البلاستيك من الزبالين.. الدسته بجنيه.. طن زيت مستخدم الكيلو بيتاخد من المطعم بـ 25 قرش.. قمع بلاستيك قول 10 = 5 جنيه .. وماكينة برشمه بـ 3 الاف بالكتير
تكسب في الطن 2000 جنيه مستريح جدا.. ويتحرق اللي بيشتروا بجاز.. جاز مش نضيف زي الزيت اللي اشتروه

- الحلاوة الطحينية اللي في المحلات.. عليه اكسيد تيتانيوم عشان تاخد اللون بتاعها
وبعضها مفيهوش ريحة السمسم اصلاً.. عليها دقيق وفورمالين عشان تمسك نفسها.. اصل الدولار بقي غالي فالسمسم غالي والزبون عاوز الارخص مش الانضف

- فلاتر ميه الشرب.. بتفلتر الطعم (عبر ازالة الكلور) والريحة (عن طريق الفلتر الكربوني) لكن المعادن التقيله اغلبها مبيتفلترش اصلا الا في الفلاتر الاكتر من 3 مراحل.. سلام كبير اوي لفلاتر تانكة

**********
- سمك المزارع السمكية و خاصة نوع البورى ..بياكل دم ومخلفات عمليات الذبح عشان يكبر بسرعة .

- فراخ المزارع.. من كتكوت عمره يوم لفرخه كاملة وزنها كيلو علي الاقل الي كيلو و200 جرام بياخد 19 يوم..حقن هرمونات في الاكل وميه الشرب.. علما ان الفرخة الطبيعه عاوزه 4 شهور عشان تقرب من الحجم ده

ده غير مزرعة فراخ امريكانا اللي في برج العرب اللي بتورد الفراخ لمطاعمهم ..اول مره في حياتي اشوف فرخه وزنها 4 كيلو ونص كان هناك.. ومش بتعرف تمشي.. وعندها حاجة من الجنب كده بالتدقيق اكتشفت انها: مشروع جناح

-طلمبة البنزين الـ 92 والـ 95 في البنزينات دلوقتي.. الطلمبتين بياخدو من خزان ارضي بنزين واحد ..مهي اصل الطلمبة ذكية ..بتميز الـ 92 من الـ 95

- محلات الحلويات اللي بتبيع الحلويات للشرقية بالسمن البلدي.. ولابلدي ولانيلة دي معموله بسمنة صناعي وعليها مكسبات طعم زي اللي بيستخدموها ف المصانع

-الجبنة الرومي القديمة.. مش قديمة ولانيلة برضه..هما يعني هيعتقوها عشان حضرتك تستمع ويركنها في المخزن 6 شهور؟
بيضيفوا هيدروكلوريد اسيد تركيز 30 %.. عشرة لتر لكل طن جبنه وتتكتم في قبو قديم معفن 24 ساعه وتطلع قديمة وطالع عين امها كمان.

- الزيتون الأسود المصري المنتشر في محلات البقالة و السوبر ماركت .. للعلم لا يوجد زيتون اسود اصلا يزرع في مصر و إنما هو زيتون اخضر يتم نقعه فى صبغة أحذية سوداء لإعطائه اللون الأسود و هو فى منتهى الخطورة على الكبد و الكلى و الغريب أن هذه المعلومة من داخل وزارة التموين شخصيا يعنى الحكومة عارفة و ساكتة .

**********
- اكياس البلاستيك : اكياس البلاستيك اي لون (غير الشفافة المفروض انها بتتصنع من رولات بولي ايثيلين خام

الواقع ان اغلبها عبوات بلاستيك (ميه وبيبسي) وبيتم تسيحهم في افران وسحبهم على شكل رولات تاني .. ودي ارحم من الاكياس البلاستيك السوداء اللي مصدرها مخلفات المستشفيات والمراكز الطبية (حقن - سرنجات - كانيولا - فلاتر - اكياس دم مستعمله - قساطر بوليه مستعملة

- عبوات المياه المعدنية اكوافينا (انتاج مصانع بيبسي) عن مصدر مقرب الميه دي لابئر جوفي ولانيله.. حتي مفيش عنوان للمصدر علي عبوات القزايز
دي بخار الميه الناتج عن التكثيف في خطوط انتاج البيبسي .. بدل ماتتهدر وهم بيدفعوا عليها فلوس لمصلحة المياه قرروا يجمعوها في تانكات ويعبوها في قزايز ويستغلو شبكة التوزيع الضخمة بتاعتهم توزع ميه مع البيبسي وبسعر ارخص من سوق المياه المعدنيه باكتر من 50 قرش ق الزجاجه..(محدش خد بالو من طعم البيبسي في الميه دي ) ؟

- صابون غسيل الوجه وكريمات البشرة والشعر المنتشره في السوق (من غير الانواع المعروفة) ياريت حد يبقي يحللها يمكن نعرف نوصل للمركبات اللاارضية اللي بيستخدموها فيها.

- مشتركات الكهرباء المصرية الصنع ذات الثلاث فتحات أو أكثر و التي تباع عادة لأجهزة الكمبيوتر كثيرا ما تتسبب في إحراق الأجهزة و وحدات البور سبلاى الموجودة بأجهزة الكمبيوتر نتيجة ضعف إحكام التوصيل الكهربائي بها و رداءة نوعية الخامات و الأسلاك المستخدمة بها رغم ان سعرها يعتبر غالى بالنسبة لرداءة صناعتها و المشترك الصيني الموجود في السوق أفضل و يعتبر نص العمى و لا العمى كله .

- الطماطم المنتفخة و الخيار ذو القشرة المحببة و الفراولة المتضخمة و العنب البناتى المتضخم و البرتقال المتضخم ذات القشرة السميكة و اللون الأصفر الفاقع و التفاح المتضخم ذو القشرة السميكة عديم الطعم و الخوخ المنتفخ الطري و الموز كبير الحجم عديم الطعم .. كل هذه الخضروات و الفواكة غير طبيعية و تم رشها ببودرة هرمون يسرع من عملية نموها بشكل غير طبيعي لان المزارع مستعجل على رزقه و معندوش وقت ينتظر و هذه النباتات تتسبب في تضخم الكبد و الطحال لمن يتناولها بكثرة .

- محلات مترو المنتشرة فى مصر و خاصة فرع الهرم .. تبيع سلع منتهية الصلاحية او فاسدة او من مصادر مجهولة و قد تم تحرير محاضر كثيرة لها و مصادرة اغذية فاسدة مثل عبوات العسل الاسود و الانشوجة المستوردة و غيرها مع العلم ان هذه الفروع تتعمد ايضا وضع سعر السلع على رف البضاعة فقط و لا تضع السعر ابد على السلعة ذات نفسها مثل اى محل محترم و هم يفعلون ذلك متعمدين حتى لا يتذكر الزبون ثمن السلعة اثناء حسابه عند الكاشير و يتم النصب علية بسهولة و هذا يحدث عادة فى المشتروات الكثيرة و قد جربت ذلك بنفسى فوجدتهم نصبوا عليا فى مبلع 40 جنية و مرة اخرى حسبوا لى سلعة بمبلغ 12 جنية و ثمنها الاصلى 2 جنية فقط و صديق لى نصبوا علية فى مبلغ 80 جنية و ناس كثيرة ممن اكتشفوا ذلك قدموا بلاغات و لكن يبدو ان مترو عنده حصانة خاصة .

- مندوبين شركات السياحة الذين ينتشرون فى الاماكن العامة و خاصة محطات البنزين .. كل هؤلاء بلا اثتثناء تابعين لشركات سياحة وهمية و نصابين و يتحايلون على الضحية باغرائهم بانهم سيكسبون جوائز منهم حتى يذهبوا الى مقرهم المؤقت و يدفعوا اشتراكات لاشياء وهمية و ابقى دور عليهم بعد كدة .

**********

السادة بقي بتوع المخدرات (طالما بنتكلم عن الغش التجاري باعتبارهم مستهلكين هم كمان) :
- الحشيش..مش حشيش ولاحاجة ده عجينة من الحنا واللبان الدكر ونسبه بسيطة لاتتجاوز .,4 من الكميه والزيت اللي ع الحشيش ده مش زيت ده ماكستون فورت ..
في الاخر .. كلها اعشاب طبيعيه

- البانجو..في الاغلب مش بانجو..نعناع وبذر طماطم مجروشين وعليهم شويه شاي محروق (عشان الريحة بس) ..اهي كلها نباتات

- البودرة.. مش بودرة بردو.. دي اقراص ريفو مطحونة ..كل 10 اقراص عليهم قرص رهبانول وبيتحطو في ورقه فويل وتتسخن تحتها ولاعه (عشان ياخد اللون البيج بتاع الهورايين) وقسم وبيع تذاكر يامعلم .. كلها ادوية صداع.

- اما بالنسبة للغش التجاري في الأجهزة الكهربائية و قطع غيار السيارات و توكيلات السيارات و على رأسهم توكيل غبور فحدث و لا حرج .

كما نرى هذا كم بسيط من أشياء كثيرة تحدث على مرأى و مسمع من المسئولين دون تحرك جاد للقضاء على هذه الظاهرة و الدليل على ذلك أنها فى حالة انتشار مستمر.
طيب نعمل اية يا جماعة ؟؟؟؟
يا ريت لو حد عنده حل لهذه المشكلة يضعه لنا و يبقى كتر الف خيره .

موضوع الزيتون ده صح و موضوع فلاتر المياه برضه صح مزارع السمك برضه صح البنزين و الفراخ مش كله بيعمل كده الخضار و الفاكهة صح صح المخدرات ماعرفش بصراحة مترو بطلت ادخله الحاجة فيه غالية عن اى حتة تانية من 40 قرش الى 3 جنيه
+ عصائر فراجلو (فرج الله) كلها مضروبة و عرقت كده من واحد صاحبى شغال فى شركة تأمين راحت تعاين المصنع علشان يحددوا قيمة قسط التأمين و قالى ان كل عبوات مركزات العصير منتهية الصلاحية !!!!!!
بصراحة ان بقيت حاسس ان ربنا حايخسف بالبلد دى الارض من كتر الفساد اللى فيها