بلية العجل

**أحمد علوان** · 23-03-2011 10:10 PM

كان عندي استفسار يا ريت اي حد من الاخوة في المنتدى يجاوبني علية ويشرحلي اية هي بلية العجل
وكمان انا عندي طقة لما باحود شمال باسمع صوت طقطقة من العجلة اليمين والميكانيكي قالي كوبلن وعملة وبعد كدة بيوم الصوت رجع قالي فرامل وجبت تيل جديد ودلوقتي رفع العربية وطلع اول العجلة اليميم صوتها خشن والشمال لأ قالي دي بلية لازم تجيبها نغيرها
ياريت حد يفيدني ويقولي موضوع البلية ده واحسن نوع ليها وبكام وفين العربية بيجو 305 موديل 79
ملحوظة ان كنت راكن من فترة وقدامي بلاعة عالية قوي وجيت امشي لاقيت في حاجة قدام العربية رجعت شوية وطلعت بعزم معرفتش أعدي واكتشفت انها بلاعه ممكن ده اللي يكون قصر على البلية
يا ريت الرد الممتع المعتاد هنا في المنتدى مستني افهم منكم

**saadelden** · 24-03-2011 09:57 AM

هي بليه العجل بتتغير كل فتره مع الاستهلاك يعني
و هي موضوعا بسيط تقريبا البليه ب 30 جنيه و الميكانيكي يركبهالك عادي

مشكله البلي في الاستخدام و لو متركب غلط
يعني لو بتمشي بالعربيه كتير يبقى هتغيرهم كل 50 الف كيلو مثلا
و لو متركب غلط ساعات الميكانيكي مابيشحمهاش كويس ف بيقل عمرها

**tiger45** · 24-03-2011 10:55 AM

المشاركة الأصلية كتبت بواسطة saadelden

هي بليه العجل بتتغير كل فتره مع الاستهلاك يعني
و هي موضوعا بسيط تقريبا البليه ب 30 جنيه و الميكانيكي يركبهالك عادي

مشكله البلي في الاستخدام و لو متركب غلط
يعني لو بتمشي بالعربيه كتير يبقى هتغيرهم كل 50 الف كيلو مثلا
و لو متركب غلط ساعات الميكانيكي مابيشحمهاش كويس ف بيقل عمرها

+11111111111111111

ألافراط فى استعمال "متابع" و "+1111111" فى المواضيع قد يعتبر اغراق و بالتالى قد يعرضك لعقوبة لا داعى لها

برجاء اضافة مداخلات مفيدة للمواضيع منعا لتوقيع عقوبات

مشرف القسم

**أحمد علوان** · 25-03-2011 11:40 AM

مشكور جدا على الافادة
بس هل البلية دي ممكن تخلي في طقة لما احود وأكسر الدريكسيون جامد؟
واية احسن الانواع ؟

**saadelden** · 25-03-2011 12:12 PM

صوت الطقه دا ممكن من البلي لو بايش و اكشف علي البارات عند العفشجي لو ما اتطبظتش بعد تغيير البلي

**l0new0lf** · 25-03-2011 02:37 PM

بلية العجل صوت خشونتها او النحر بتاعها بيبان لما ترفع العربيه و تلف العجله بايدك
البلى ملهوش عدد كيلومترات معين يتغير عنده و ده لاسباب كتيره منها الظروف الجويه و طبيعة الارض و طريقة السواقه و الميكانيكي الى بيعمل لها صيانه او بيركب و برضه التصنيع علشان فى بلى مغشوش كتير
فى محلات بلى محترم عندهم الالمانى فى شامبليون فى المنطقه الى حوالين كشري ابو طارق
خلى الميكانيكي يحل البلي و ينضفه و هات زيه
و نصيحه غير البليتين مع بعض متغيرش واحده لوحدها

**أحمد علوان** · 25-03-2011 10:33 PM

مشكورين على الردود اخواني
انا انهاردة غيرت البلية وجبت بلية ايطالي ب 75 جنية وكان فية صيني ب 50 جنية وكان فية حاجة انضف ب 185 جنية طبعا نفضتلها وجبت الايطالي
المهم بحد اما ركبت الطقة لسة موجودة والميكانيكي رجع قالي ده الكوبلن وهايودية للراجل اللي عملة يعمله تاني وانا قلتله انا مليش دعوة ومش هادفع فلوس تاني
ربنا يكرم والميكانيكي يظبط في الموضوع ده
وبالنسبة للبارات قالي كويسة وتمام
انا عايز اغير البلي اللي ورا عشان بيدي صوت هل اخير اللي ورا بصيني عادي ولا اخليني في ماركة تاني؟

**l0new0lf** · 25-03-2011 10:43 PM

بص يا سيدى الكوبلن لو فيه نحر مهما تملاه (تغير له بلى) برضه هيعمل اصوات
خبرتى فى البلى الصيني الموجود فى مصر تخليني انصح بعدم استعماله
و برضه بكرر النصيحه انك تغير البليتين مع بعض (اليمين مع الشمال) خلفى او امامى

**أحمد علوان** · 25-03-2011 10:52 PM

المشاركة الأصلية كتبت بواسطة l0new0lf

بص يا سيدى الكوبلن لو فيه نحر مهما تملاه (تغير له بلى) برضه هيعمل اصوات
خبرتى فى البلى الصيني الموجود فى مصر تخليني انصح بعدم استعماله
و برضه بكرر النصيحه انك تغير البليتين مع بعض (اليمين مع الشمال) خلفى او امامى

شكرا على النصيحة الغالية
وربنا يكرم وبكرة اشوف الميكانيكي هايعمل اية في الكوبيلن
وبالنسبة للبلي كدة بخ بقا في استعمال الصيني هخاخليني في الايطالي
ونظرا للظروف انا مش هاقدر اغير الناحيتين وهاكتفي باليمين بس مؤقتا