الموضوع: هل تفرقنا الثوره بعد ان جمعتنا

بدايه الموضوع انا الحمد لله مصرى مسلم ملتزم لكن مش اخوانى ولا اتبع اى جماعه سلفيه وان كنت متدين بطبعى ككل المصريين مسلم او مسيحى

وعمرى ما كنت ليا اى مذهب ليبرالى او يمينى او يسارى او حتى حلزونى

انا بس كنت بحب البلد ودلوقتى بقى عندى حساسيه من اى حد ضدى فى البلد

بقيت ديكتاتور وانا اللى خرجت فى يوم علشان اخلع ديكتاتور

كنت بحب الشيخ محمد حسين يعقوب واكتشفت انى هاجمته علشان كلمه قالها

كنت بسمع للشيخ محمد حسان واكتشفت انى اعتبرته من السلفيين اعداء الثوره

كنت بحب ابراهيم عيسى ونواره نجم وعمر طاهر بقيت بشكك فى اللى قال نعم واللى قال لاء

بعد ما كنت فى يوم بصلى والمسيحيين بيحمونى بقى فيه حساسيه من المسيحيين والماده الثانيه

بعد ما كنت بسمع حد بيقول ان اللى فى الميدان كلهم اخوان كنت بضحك واقولهم وانا انضميت ليهم امتى مش لما ادفع الاشتراك واطلع الكارنيه

بعد ما كنت فرحان وحاسس ان الاخوان واقفين جنب المسيحيين قصاد الخيل والبغال ومعاهم كل مصر

اكتشفت انى من يومين بدأت اهاجم الاخوان والسلفيين والمسيحيين واى حد حتى لو انا مش مع اى حد

اكتشفت اننا اتفرقنا واستعجلنا قوى

الصندوق اتحط قدامنا كأنه تورته واتقال مش هياكلها الا واحد والباقى كله هيتفرج عليه وهو جعان (ليه مخدناش فرصه اننا نقدر نتفق)

وكلنا جرينا وراها مع اننا كنا من كام يوم كلنا واقفين مع بعض علشان نفسنا البلد تبقى احسن

دلوقتى فعلا حاسس اننا استعجلنا لما رجعنا بيوتنا واحنا مش عارفين اى حاجه ولا عارفين الدنيا ماشيه ازاى

ضحكنا على النظام ولا النظام ضحك علينا لما حسنى راح الجنه فى شرم الشيخ (هو اساسا قاعد هناك طول مده حكمه) واكيد لما بيسمع اننا عاوزين نحاكمه بيقول خلوهم يتسلوا

ابتدينا نخون بعض بقى الاخوان انتهازيين وعاوزين يركبوا على الثوره والسلفيين كانوا رافضين لها وبعدين بيقولوا احنا اصحاب البلد

البرادعى جاى ياخد نصيبه وهو اللى مشاركش رغم انى بعتبره من الناس اللر بدأت فى الشراره

عمرو موسى من عملاء النظام ويحيى الجمل بيهاجم الدين والجيش بيضحك علينا والشرطه قتله وخونه وعاوزين يحققوا مكاسب وزياده مرتبات على حساب الثوره

حتى انا وابن خالتى وصديقى اللى وقفنا سوا فى يوم نفتش الناس اللى داخله الميدان بقى هو جاهل ومضحوك عليه وانا واخدانى الجلاله ومش راضى اهدى

وفى الاخر نسأل هى البلد ماشيه ازاى محدش يعرف كله مستنى اصحاب القرار اللى محدش عارف هما بيعملوا ايه وليه وازاى

الدستور هيرجع ولا هيبقى فيه اعلان دستورى

الماده التانيه موجوده بس فيه احتمال تتعدل

الانتخابات هتتعمل بس ممكن تتعمل تانى لما نغير الدستور

الرئيس هينتخب بس ممكن يبقى منصب شرفى بعدين

الاخوان احتمال ترشح حد للرئاسه واحتمال تساند حد معين

نجيب ساويرس كان مع الثوره ولا هو منتفع منها وعرف يحسبها بدرى

المظاهرات الفئويه لناس عاوزه ترفع الظلم ولا ناس ماشيه بمبداء ان بيت ابوك وقع الحق قالب

امن الدوله اتحل ولا غيروا اسمه

الجيش نفسه يرجع ولا هيعجبه السلطه

خلاصه الموضوع

من اقل من شهرين مصر كلها كانت ايد واحده

ارجوكم بلاش نخون بعض

بلاش نشكك فى بعض

الوقت لسه بدرى على اننا ننقسم ومن ليس معى فهو ضدى

احترس من فضلك الثوره ترجع الى الخلف


شيوخى الاجلاء اعتذر اذا كنت قد اخطأت فى حقكم او اغتبت احدكم

اخوانى السلفيين والاخوان المسلمين والليبراليين وحركه 6 ابريل و9 مارس و25 يناير وبتوع الكنتاكى والاجندات والناس اللى جايه من سويسرا بتوزع بطاطين ويورو وحتى تامر بتاع غمره

انا مبقيتش فاهم اى حاجه وحاسس اننا اتضحك علينا

ومنسحب بره الموضوع لحد ما اعرف اى حاجه

المشاركة الأصلية كتبت بواسطة wesam_salom

خلاصه الموضوع

من اقل من شهرين مصر كلها كانت ايد واحده

ارجوكم بلاش نخون بعض

بلاش نشكك فى بعض

الوقت لسه بدرى على اننا ننقسم ومن ليس معى فهو ضدى

احترس من فضلك الثوره ترجع الى الخلف

الموضوع ابسط من كدة يا استاذ وسام

مصر كلها كانت ايد واحدة لما كان فى حشود معتصمة فى التحرير لها طلب واحد و هو سقوط النظام ..او سقوط مبارك "النظام كلة لم يسقط بعد "..و كانت اخلاق التحرير موجود و كلة ايدة واحدة ..

اما عند او اختبار او اول اختيار تفرق الناس بين نعم و لا "و دة طبيعى " و بعد ذلك بدا الطرفين يستخدمو كل الالعاب المتاحة والغير متاحة للحصول على اصوات الناس و كل واحد و شطارة

اللى يوقلك علم على الاخضر دة لون اهل الجنة
و اللى يوقلك نعم عشان دين الاسلام
و اللى يوقلك لا عشان نلغى المادة الثانية

و تفرق الناس و كل فريق عاوز يجنى ثمار التحرير بسرعة من وجة نظرة و تبعا لمصالحة و مصالحة جماعة و حزبة
و انا شخصيا مش مستغرب من حدوث ذلك لانة طبيعة البشر انهم يكونو مختلفين و يتكلتو فى جماعات واحزاب

ببساطة دى الطبيعة البشرية انها تبحث عن مصالحها ..كنا ايد واحد لما كانت المصلحة واحدة ..انما الان تفرق المصالح و كل واحد عاوز حتة سريعة من التورتة قبل ما الفرح ينفض .و كل واحد و شطارة بقى ياخد حتة باحترامة او يخدها بالتضليل و بالفهلوة و استغال سذاجة الناس ..المهم يخدها ..عملا بمنطق الغاية تبرر الوسيلة ..


احنا ليسة فى بداية الفرقة فقط ..استنى كمان كام شهر و حتشوف بنفسك المهازل اللى حتحصل فى انتخابات مجلس الشعب و حتشوف التخوين و العمالة وكل الاتهامات والاشعات على اصولها فى اتهام كل مرشح للاخر زميلة فى الدائرة او القوى السياسة اللى حتتنافس ..

حتلاقى داعية من عينة انتخبنا عشان تدخل الجنة و انتخبنا عشان نحرر فلسطين و كلام كبير كدة ..و المصيبة الاكبر ان حتلاق ناس تصدق الكلام دة و تتنتخب فعلا على هذا الاساس ..

طبعا مش عاوز احيكلك على الاعاجيب والاساطير اللى حسمعها و تشوفها فى الانتخابات الرئسية ..دى بقى حتبقى قمة حملات التشوية لكل مرشح ضد الاخر و الاشعات والاكاذيب والتضليل حيكون فى اوج عزة فى هذا الوقت و حتسمع و تشوف العجب من الكلام و الفعل من كل مؤيدين مرشح فى الاخر..

باختصار برضو انا مش مستغرب من كلة دة و بيحصل اسخم منة فى كل الدول الديمقراطية ..و هنا فقط حيظهر كل واحد على حقيقية ..و علينا وقتها نحكم عقولنا و نحكم ضميرنا قبل اى حاجة و قبل كل خطوة و نحاول نميز الثمين من الرث ..لانة حيكون صعب جدا تفرق وقتها ...

انا مش عاوز احبطك او حاجة قد ما انا عوزك تنسى احلام التحرير دى و تنزل لارض الواقع لان هناك طبيعة بشرية لا يمكن الحياد عنها و الشيطان شاطر بقى و انت عارف