الموضوع: قانون منع التظاهر

المشاركة الأصلية كتبت بواسطة skybird

هي بصراحة حاجه تحير
يعني مبارك انخلع بالمظاهرات ... شئ جميل
والثورة المضادة تستعمل نفس السلاح المظاهرات............. شئ مش جميل
حتى قائد الجيش اللي اتصل بيسري فودة على اون تي في قال فيما معناه "احنا مش عارفين نعمل ايه هل ندعي لمؤتمر وطني علشان تقولولنا نحل المشكلة دي ازاي"
انا راي ان ده فعلا الحل الصحيح
يا جماعة مفيش حل غير ان كل القوى الوطنية تتمثل وتشارك في ادارة المرحلة الانتقالية في مؤتمر وطني او جمعية وطنية اومجلس رئاسي علشان القانون اللي يصدر يبقى ساري وبقوة وبرضا الامة كلها
سيبكوا من التعديلات الدستورية وانتخابات مجلس الشعب ده كلام فارغ وترف سياسي مش وقته خالص لازم مؤتمر وطني مع مجلس الرئاسة يوصل البلد لبر الامان
و هتشوفوا بكرة المهزلة لما يصدر الاعلان الدستوري ولما تشوفوا خطة العمل ساعتها لكم هتقولوا امال عملنا استفتاء خسر البلد ملايين ليه ؟ وبعد ان عارضنا ترقيع الدستور بكرة هيلغوا الدستور ... امال سيبتونا نعارض في بعض ونطحن بعض ليه؟!!!!
تخبط في كل مكان
الجيش وحكومة شرف فشلوا في ادارة المرحلة الانتقالية بجدارة
و لو ان الدكتور شرف شكله مكبل و لا يستطيع اتخاذ قرار حتى باقالة رئيس تحرير صحيفه
والقانون المعيب ده بيحدفوه على بعض و بكره كل واحد هيتبرأ منه
عيب القانون ان صيغته مبهمه وممكن يتم استخدامه ضد الحق الطبيعي للتظاهر
اي نعم هو تم تقييده بجملة "بعض حالات الاعتصام والتجمهر والاحتجاج إذا أدت إلى تعطل الإعمال سواء العامة أو الخاصة والتأثير على المال العام أو الخاص ."
بس كان المفروض يتم تقييده بجمل واضحه لا لبس فيها مش عبارات مبهمة يضاف له عبارة " حفاظا على ثورة يناير من الثورة المضادة او من التخريب "
مش عايزين نكذب على بعض لازم نعترف ان قوة اي تظاهرة و بالذات التظاهرة العمالية هي في انها توقف الانتاج فمن غير المنطقي ان اقول اتظاهروا بس لاتوقفوا الانتاج .......... امال الضغط هيحصل ازاي ؟!!!
الخوف من القانون انه ممكن يستخدم ضد الثوار في المستقبل لو اعترضوا مثلا على " تولي جمال مبارك رئاسة الحكومة "
طبعا 77% من الناس فاكرة ان الثورة خلصت ومنتظرين المن و السلوى وفي الحقيقة احنا لسة في المعمعة لان اعداء الوطن لازالوا يعيثون في الارض فسادا
مشكلة المظاهرات حلها سهل جدا
ايه فيها لما يقيلوا عميد كلية الاعلام عضو لجنة السياسات في الحزب الوطني يعني هو ولا شباب هيموت من سؤ التغذية بسبب الاضراب عن الطعام
ايه فيها لما يشيلوا قيادات الصحف القومية واتحاد الاذاعة والتلفزيون الليثل هذا الكلام شاركوا في التحريض على قتل المتظاهرين كما اظهر بيان لجنة تقصي الحقائق يعني هما ولا الشرفاء المعتصمين ضدهم
هو الجيش مستكبر انه ينفذ مطلب مهم وحيوي من مطالب الثورة و لا البلد مفيهاش حد بعقلية هؤلاء العباقرة ؟
علشان كده الاسواني قال عالجوا المرض مش العرض يعني اللي عنده حمى تيفودية مينفعش اعالجه بخافض الحرارة واقول بقى كويس لان الحمى راحت واسيب ميكروب مرض التيفود من غير مضاد حيوي
بصراحة طريقة عقيمة للتفكير ولا تليق برجال دولة
لو كل قيادات الصف الاول اتشالت من كل المؤسسات في عملية تطهير حقيقية مش هنلاقي اعتصامات ولا مظاهرات
عصام شرف اخطأ لانه لم يشرك القوى التي حملته على الاعناق في المشورة
وممكن تكون محاولة لاحراجه
ولذلك اعتقد انه سيستقيل

قررت الا ادخل في جدال مع من يشكك في الجيش و يتهمه بالتكبر لمجرد اختلاف و جهة نظره معه ثم يغلط د.عصام شرف ايضا في اول قرار يأخذه في الوزارة الثورية
طيب خلينا نستورد ملاك يحكمنا
كل الحق في ان تعبر عن رأيك
و لي كل الحق في ان ارفضه
و ادعو حضرتك للانضمام لمجموعة دعنا ننظر للمستقبل
و نترك الجيش و الوزارة الثورية تعمل بلا مشاكل
و ادعو حضرتك للمشاركة في مواضيع كثيرة موجودة الان بها احتياجات حقيقية تحتاجها البلد في هذه المرحلة بدلا من وضع نقطة و نشد خط و نرجع نجيب من الاول ثم يحدث ايضا اختلاف ( عادي بقي ) ما هي اراء ثم نجيب من اول الخط و هكذا


م.حاتم السباعي