الموضوع: فيلم نظرية المؤامرة ....... الجزء الأول: انت مين ياد ؟؟؟!!!!

المشاركة الأصلية كتبت بواسطة hobiko

فاكر فيلم نظرية المؤامرة conspiracy theory بطولة ميل جيبسون و القطة جوليا روبرتس ...... فاكر لما كان طالع فى الفيلم لاسع و مجنون و فاكر ان كل حاجة بتحصل فى الدنيا لازم يبقى وراها مؤامرة......

انا انهاردة قررت اتقمص دور ميل جيبسون فى الفيلم .... حبقى مجنون و لاسع وحاعتبر ان كل حاجة وراها مؤامرة ..... وانى لما نزلت و سبت باب الحمام مفتوح و رجعت لاقيته مقفول .... ده أكيد اللى كان بيزرع اجهزة التصنت فى البيت عندى مش هوا الشباك .

هو ايه اللى حصل ..... الأستفتاء نتيجته طلعت نعم ؟ ما احنا كنا متوقعين كده ...... ايه ماكنتش متوقع نسبة نعم تبقى كبيرة كده؟ ...... خد شفطة من العصير (كان فين العصير ده لما كنا نايمين على الأسفلت فى التحرير) و ريح كده فى الكرسى و ادينى ودانك وخلي ليك عقلك ...... كفاية اللى عندى تعبنى اوى

1) كام واحد نزل الشارع لما مبارك تنحى .... 10 مليون 20 مليون ..... ال20 مليون دول نسبتهم كام من 85 مليون ؟ 20% ده معناه ان فى 65 مليون احتمال كبير جدا انهم مش عاجبهم اللى انت عملته ده ...... مفتقدين الأمن و الأستقرار بتوع النظام القديم ..... متعودين انهم يقولوا نعم مادام واكلين شاربين نايمين متجوزين ...... سيبك من اللى مقتنع فعلا بنعم من غير ماتكون كل الحاجات اللى فاتت دى مأثرة عليه ده غير ان ممكن تكون ليه اسباب خاصة ...... بصراحة انا متفاجىء ان نعم طلعت 77 % بس مش اكتر

2) مصر مش القاهرة و اسكندرية ...... بطل تفكر بطريقة ان مدينتك الجميلة دى هى مركز العالم ...... 20 او 25 مليون فى القاهرة و اسكندرية ..... و الباقى فى حتت تانية ممكن اوى تكون عمرك ما روحتها فى حياتك ...... خلينا صرحا مع بعض الناس بتاعت لأ ماعرفتش توصل للناس اللى فى الحتت دى ...... ولا حتى فى عن طريق التلفزيون ..... الراجل المحترم اللى قاعد يكلم عن عوار الدستور ..... و تناقض التعديلات .... والمادة مش عارف كام مع المادة دى تحطهم على بعض تتطلع تانى اكسيد النيتروجين ..... يا عم ده انا نفسى اتلخبط ...... كلمت قرايبك و اصحابك و جيرانك ..... محاولات فردية شجاعة بس للأسف غير منظمة

3) الجيش و الأخوان المسلمين و السلفيين و الحزب الوطنى الديموقراطى كانو بيقولوا نعم ..... حتروح فين انت يا صعلوك وسط الملوك (على رأى عمنا محمود السعدنى) ...... الجيش عايز يطلع من البهدلة دى ونعم ببساطة كانت معناها انه حيمشى فى اسرع وقت من وجع الدماغ يا عم الحج ..... و الباقيين نعم بتديهم احسن و اسرع فرصة للحصول على اكبر عدد من مقاعد البرلمان و بالتالى كتابة دستور جديد على مزاجهم ..... كل دول معاهم الفلوس و التنظيم و الأدوات ..... وانت معاك ايه ؟ يامولاى كما خلقتنى

4) انت ما بقتش بتمثل الشعب خلاص ..... الحقيقة انت عمرك ما كنت بتمثلهم ..... خصوصا فى نقطة طلباتهم واهتماماتهم الأساسية ...... اهتماماتك و اهتماماتهم مختلفين مش زى بعض ...... انت مهتم بالثورة ... عايز تمسك رؤوس الحزب الوطنى ... تحط مصر على الطريق الصحيح ...... هما مهتمين بالأمن الغذائى و المادى ..... عودة الأستقرار و الحياة الطبيعية بأسرع ما يمكن ..... الناس دى شايفين الجيش هو القوة الوحيدة المنظمة فى البلد اللى بتحقق شوية امان ..... انت بتكلم صح انا عارف ..... الجيش هو اللى ضرب الناس بالليل فى ميدان التحرير و قبض عليهم و عذبهم و رجع اعتذر و بعدين مشى المعتصمين بالعنف من الميدان و ادى علقة محترمة لطلبة اعلام و رجع يعتذر تانى ..... يعنى الراجل بيلسوع و يعتذر.... معاك فى كل ده بس انت متخيل ان الكلام ده كفاية عشان الناس ماتسمعش كلام الجيش القوة الوحيدة اللى حامية مصر دلوقتى و تقول لأ ..... لأ طبعا

بص ..... عشان برضه ما ظلمكش ..... الغلط مش كله غلطك ..... انت بس ماخدتش بالك من شوية حاجات بسيطة ..... انت كنت عمال تخسر الناس بانتظام ..... ماكنتش مركز فى أحلامهم و طلباتهم ..... عارف كام واحد مثلا خرجوا المظاهرات معاك و هما بيحلموا برفع الحد الأدنى ووضع حد اقصى للأجور ..... ليه الطلبات اللى من النوع ده مش على الساحة دلوقتى ايه اللى حصل ؟؟؟

احمد شفيق ..... خسرنا بسببه شوية ناس برضه ..... فى ناس كتير عاجباها شياكته ..... طريقة كلامه .... ادبه ..... رقته .... كلمتين الأنجليزى اللى بيتقالوا فى النص ...... فاكر انه لما استقال وبانت الفضايح اللى حكومته كانت مغطية عليها كده الناس بقيت معاك لما عرفوا انك صح ؟؟؟؟ لأ طبعا .... ده فى ناس عايزين ينتخبوه رئيس جمهورية ..... ده فى ناس اتغاظت اصلا من انك طلعت صح

انت برضه ماخدتش بالك ان الجيش مش بيحبك اصلا ..... حيحبك على ايه ؟؟؟ الجيش كان حابب الأستقرار اللى كان عايش فيه ايام النظام القديم ..... جيت انت عملت ثورة مش بس اتسببت فى انهيار النظام اللى كان مخليه فى استقرار و راحة ..... لأ ده انت خليته يشتغل كمان جامد جدا اكتر ما هو اتعود بكتيربقاله سنين.

انت فاكر انه مهتم بيك ولا بمطالبك ؟؟؟ انت فاكر انهم لو طالوك حيرحموك ؟؟ ده مش هبل .... ده منطق .... الشباب اللى اتسببوا فى انهيار النظام القديم بكل جبروته ...... يقدروا يهدوا اى نظام تانى طبعا بما فيه النظام العسكرى ..... طب بذمتك لو كنت مكانه ازاى حتسمح للشباب دول يستمروا و يكبروا و يبقى ليهم دعم و تأييد شعبى ..... لو ما كنتش اخدت بالك بس ..... الجيش كان بيسمع لك بس كل ما كان عدد الناس اللى كانوا فى التحرير كتير و بيسقع كل ما كان العدد اصغر و اصغر ....... هو مش بيحبك و لا عاجباه افكارك ..... هو ساكت عليك بس عشان يفضل محافظ على صورة مخلص الشعب و منقذ البلد ...... و عشان البلد تستقر شوية و يكسب شوية وقت ..... انت نسيت كنا بنقول ايه على قادة الجيش زمان ..... مش هما دول اتباع مبارك و اعضاء كبار فى النظام السابق ؟؟؟ عموما هما عارفين انت كنت بتقول عليهم ايه و مش عاجبهم برضه الكلام ده ...... يبقى مش ممكن حيسبوك .... طب يعملوا ايه ؟؟؟ ايه ؟؟؟ ايه ؟؟؟

.................................................. .................................................

الكلام ده كله داخل اطار التهييس و الهبل و التحشيش ...... برجاء عدم ذكر مكان الغرزة عند النقل

بس لو التهييس ده عجبكوا ممكن اكمل ..... مش عاجب خلاص يا دار ما دخلك شر

كلامك صح و كلام ليك غلط

كل اللي فوق زي الفل

و الكلام اللي بالازرق مالوش اي لازمه

100% احييك و بشده و ارجوك جرب تسمع قصيده التأشيره انا عامل ليها شير علي البروفايل بتاعي علي الفيس