لو عايز تشوف الجزء الأول ...... في الرابط دة
http://www.nilemotors.net/Nile/208977-a.html
--------------------------------------------------------------------------------
بفتح الجرنال الصبح لقيت فودافون منزلة إعلان جديد ........ تعلن شركة فودافون عن إطلاق خدمة; كلمني جزاك الله خيرا ...... إيه دة ؟؟؟!!! أنا بيتهيألي ولا إيه ...... أشوف صفحة الرياضة المنتخب حيعمل إيه ..... خبر جديد .... اتحاد الكره يعلن انه تخلى عن العقد مع اديداس وسيكون الراعي الرسمي محلات التوحيد والنور ...... إيه الجنان دة ؟؟؟!!!! هي بايتة معايا من امبارح ولا إيه ؟؟؟!!!! اشغل التلفزيون ...... روتانا إخوان : مش هتقدر تحلق ذقنك ..... نهار اسود ......
قمت مخضوض من النوم ...... خير اللهم ماجعله خير ...... حلم أيوة حلم ..... لسه مبقاش حقيقة ...... أنا أكلمه اشوفه فين ..... أيوة يا عم إنت فين ؟؟ ...... أنا هنا ..... عايزين نكمل كلامنا بتاع امبارح ..... مقلتليش الجيش حيعمل إيه معنا ؟؟؟؟
ماشي يا معلم أكملك ...... بس الأول أسألك فيه حاجة من إلي أنا قلتهالك المرة إلي فاتت كانت مفاجأة بالنسبة لك ؟؟؟
طيب مش مهم ..... بص دي الحتة إلي في الفيلم إلي حنبطل فيها نلعب ثوره و نبدأ بقى نلعب سياسة ....... عشان خاطر البلد دي ...... دة معناه اننا حنهتم جداً بالقبول والتأييد الشعبي أكتر بكتير من مطالب الشرعية الثورية .......
بس لو إنت شايف إن الكلام دة غلط و ان الثورة لازم تفضل في الشارع حتى النهاية ....... أحب أهنيك ..... إنت السبب اننا عمالين نخسر ....... لو عايز بقى تسمعني ...... فتح خلايا مخك الرمادية كدة و ركز معايا ......
الأول لازم نفهم إيه إلي بيحصل حوالينا ...... احنا مكانا فين من مين ؟؟؟
فاكر لما المجلس العسكري إجتمع مع البرادعي و عمرو موسى و الجنزوري يوم 28 فبراير قبل ما شفيق يمشي ...... و قبل إعلان إن الإستفتاء حيكون يوم 19 مارس ب-3 أيام بس ؟؟؟؟؟ قالوا كلام كتير .... بس في حاجة أنا وقفت عندها ......
وتناول اللقاء الحديث حول وجود اقلية متحدثة ومتكلمة لاتعبر عن الأغلبية الصامتة التي يجب أن تتحرك وتدلي برأيها وتعبر عن وجهه نظرها بكل وضوح وصراحة حتي لاتهيمن الأقلية علي الأمور.
عارفني إنت ؟؟؟ أحب أجي على راس القرد و أشمها ...... فكر معايا مين الأقلية المتكلمة ؟؟؟ إنت طبعاً ...... مين بقى الأغلبية الصامتة ؟؟؟ ال-65 مليون إلي عمرهم ما نزله الشارع في الثوره و مش عاجبهم كلامك ولا تصرفاتك ( راجع النقطة رقم 1 في الجزء الأول ..... لو مش عايز تراجع براحتك .... حرية بقى )
الكلام ده معناه إيه ؟؟ ببساطة الجيش مش متقبل شوية عيال (أنا أسف يا باشا) يقعدو يقولولو ثورة و شرعية و دستور و فلول و الكلام دة ..... عمالين يزنو و يعملو مظاهرات و هو مسحول معاهم .... لأ الكلام دة لازم ينتهي
امال هو كل شوية يقعد مع الناس دي و معانا ليه ؟؟؟؟ بيجمع معلومات يا عم إفهم بقى ..... أنا لما أعرف إنت بتفكر ازاي ؟؟؟ و ناوي تعمل إيه ؟؟؟ أعرف ازاي أسبقك ..... و أحجمك ..... و أوقفك
بعد اللقاء ده أعلن الجيش ميعاد الإستفتاء ...... و في يوم 7 مارس إلتقى الجيش مع رؤساء الاحزاب والقوى الوطنية ...... كلهم قالو تصريحات ...... بس محمد بديع قال إيه ؟؟؟؟؟ ......
بينما اقترح محمد بديع مرشد الإخوان بضرورة إجراء الانتخابات البرلمانية أولا ثم الرئاسية
لاحظ إن الاخوان و السلفيين ..... لم يعلنو موقفهم رسمي إلا بعد اللقاء ده بأسبوع ....... مش قبل كدة
الجيش بصراحة لعبها صح ..... مين أقوى قوة سياسية منظمة معها الفلوس و الكوادر و الأدوات ؟؟؟ ...... مين إلي قادر فعلاً على حشد الناس في مظاهرات ؟؟؟ ...... مين إلي كان واقف على المنصة جمب عصام شرف في التحرير ؟؟؟؟ خد بالك امتى التوقيت مهم قوي ...... عصام شرف كان واقف في التحرير جمب محمد البلتاجي قبل ..... قبل ..... تصريحات بديع و لقاؤه مع المجلس العسكري
إيه مش فاهم ؟؟؟؟ تاني مرة عشان البيه ...... الجيش شاف في الاخوان انهم القوة المسيطرة ..... و إلي في نفس الوقت بتحظى بقبول شعبي ( أكتر منك طبعاً يا فقري) ..... و كمان معجونين في لعبة السياسة و عندهم إستعداد يعملو صفقات سياسية مع أي حد عشان المصلحة .......
الأول كان مجلس العسكري بقياداته بيقعد معاك ....... أخر مرة بعد الإستفتاء مين إلي قعد معاك ؟؟؟؟؟؟
جتمع اللواء محمود حجازي، رئيس جهاز التنظيم والتعبئة في الجيش المصري وعضو المجلس الأعلى للقوات المسلحة، مساء الثلاثاء مع خمسة شباب من ائتلاف شباب الثورة، هم عبد الرحمن سمير، وشادي الغزالي حرب، نصار عبد الحميد، مصطفي شوقي، وأسماء محفوظ، مساء اليوم الثلاثاء، بمقر مكتب هيئة التنظيم والإدارة.
وأستمر ثلاث ساعات، بتكليف من المجلس الأعلى للقوات المسلحة لنقل رؤية الائتلاف في المرحلة القادمة إلى المجلس العسكري.
التحشيشة عليت معك أوي ..... و بدأت تضرب خالص ...... كمل صفقات إيه ؟؟؟
الجيش قدم السبت ...... لجنة تعديل دستور في عضويتها ..... طارق البشري صاحب الميول للتيار الإسلامي ....... و صبحي صالح عضو الاخوان ..... فاكره ؟؟؟ إلي شفناه من سنتين أنا و إنت قاعد في كافتريا half time إلي على البحر في اسكندرية بيشيش مع محمد مصلحي نائب الحزب الوطني
و إترسمت الخطة ..... اللجنة تعدل الدستور بحيث إن مجلس الشعب هو إلي يشكل جمعية صياغة الدستور الجديد ..... طبعاً الاخوان و التيار الديني في الإنتخابات البرلمانية حيشكلو الأغلبية في المجلس ...... الدستور الجديد حيغير نظام الحكم في مصر لبرلماني ..... الاخوان يشكلو الحكومة .......
في المقابل الجيش ياخد إيه ؟؟؟؟ ...... بسم الله الرحمن الرحيم : الإجابة تركيا ...... زائد محدش يدعبس ورا الجيش ...... و عفا الله عما سلف
طب و احنا ؟؟؟؟ ....... انتو مين لامؤاخذة ؟؟؟؟؟ ...... شباب الثورة ؟؟؟؟؟ ..... إنت بجد صعبان علي
و نبي فهمني ..... ماتسبنيش كدة ......
إنت يا ابني ..... خطر على جيش ..... الثورجي المثالي إلي زيك لو وصل للحكم ...... حيفضح بلاوي كتير و يقلب في القديم ..... و يا عالم إنت ممكن تلاقي إيه في عالم صفقات السلاح
لكن الاخوان ...... عفا الله عما سلف
الجيش و الاخوان ..... عملو عليك روباطية ..... صدروك في كل حاجة تقلل من الدعم و التأييد الشعبي ليك ..... ده حتى لما مشى أحمد شفيق كان السبب واحد من الناس إلي محسوبة عليك علاء الأسواني
تاني يوم مشى شفيق ..... في قناة الحياه ..... يحيى الجمل زعلان و بيعيط عشان شفيق مشي ..... بعد كدة البلتاجي و ناصر عبد الحميد ...... سمعت البلتاجي قال إيه ..... دكتور شفيق اتظلم كان الرجل المناسب في الوقت غير المناسب ..... ناصر قال إيه ..... ولا علق على شفيق بكلمة ولا بان عليه التأثر ...... ده إستفز ناس كتير من محبي صاحب البلوفر الأزرق إلي حمل شباب الثورة كل المسؤلية ..... لكن ولا حد فكر في الاخوان ..... إلي فضلو مسخبيين ورا شباب الثورة في كل الصدامات ...... و عاملين فيها عم البريء
يا سنة سوخة ..... و بعدين ؟؟؟؟؟؟
ولا قبلين ..... الجيش واقف بيتفرج ..... واخد باله كويس أوي من إلي بيحصل .......
و كان الإستفتاء ..... الإستفتاء ماكنش على تعديلات الدستور ..... ما الجيش جة في الأخر بعد ما الدنيا ولعت و قال في حالة نعم أو لأ كدة كدة حيعمل إعلان دستوري ......
الإستفتاء ده كان عليك ..... على شعبيتك ..... على تأييد الناس ليك ...... مدى قدرتك انك توصل للناس ..... مدى قدرتك انك تقنع الناس بأهداف الثورة
فاكر بيان ائتلاف شباب الثورة قبل ما يعلن موقفه من التعديلات قال فيه إيه ؟؟؟ ...... قالو انهم مستنيين تأكيدات معينه من المجلس العسكري على إن مطالب الثورة حتتنفذ قبل ما يقولو موقفهم
بعد كدة طلع ..... بيانهم ..... بإنهم قرروا يقولو لأ
للأسف الثورة بدأت يوم 25 يناير ........ و خلصت يوم 19 مارس
اديني نفس ...... حمدلله على السلامة ......
أنا فاضل شوية و أعيط منك ...... دبرني يا وزير ..... إيه الحل ؟؟؟؟؟ نقفل و نروح على كدة ؟؟؟؟
-----------------------------------------------------------------------------------------------------
الكلام ده كله داخل اطار التهييس و الهبل و التحشيش ...... برجاء عدم ذكر مكان الغرزة عند النقل
بس لو التهييس ده عجبكوا ممكن اكمل ..... مش عاجب خلاص يا دار ما دخلك شر
