الاكسنت 2011 الشكل القديم ولا الكيا ريو؟؟

يا جماعة أنا محتار جداً جداً ... عايز اشتري عربية كويسة ومواصفاتها كويسة ووصلت حيرتي لنوعين

New Accent الشكل القديم أتوماتيك و Kia Rio السيدان أتوماتيك

الاولى سعرها حالياً أصبح 91 ألف أتوماتيك - سعر نهائي من المعرض والتوكيل بتاريخ أمس
والثانية أصبح سعرها 88 ألف أتوماتيك - سعر نهائي من المعرض والتوكيل

المواصفات واحده في الاتنين وطبعاً زي ما أنتوا عارفين الاتنين صناعة كوري

بس سعر الاولى accent غالي وخلاني أصرف النظر عنها أما سعر Kia فمناسب ليا بس خايف من قطع الغيار أو يكون في عيوب في العربية خصوصاً أن أنتشار الاكسنت في الشارع المصري أكتر من انتشار الكيا ريو - وخايف يكون السبب في كده عيوب في الكيا ريو كسيارة ...

فلو سمحت أفيديوني

رأي... كيا ريو افضل و متميزه اكتر

ماتقلقش من قطع الغيار لانها موجوده, و سعرها معقول, و مش علشان العربيه
مش منتشره يبقى ده معناه ان فيها عيوب, خالص... العربيه محترمه جداا

ربنا يوفقك للخير ان شاء الله...

انا من راي الاكسنت بص بصراحه غبور بقي يستهبل في الاسعار

شكراً كتييييييييييييييير ليكم على أهتمامكم بالرد عليا يا أجمل أعضاء ... وأنا لازلت برضو محتار

بما أن غبور بيستهبل في الاسعار فأنتا لما تيجي تبوص أنك بتشتري أكسنت ب 91 ألف أتوماتيك يعني سعرها قرب للانسر المانيوال الفاضية (سيارة ياباني) بقه مش معقولة أدفع الملبغ ده كلو في سيارة كوري

بس أنا برضو محتار والله أنا بحب العربيات الكبيرة السيدان ونفسي يكون كل الاوبشين في العربية وتكون أتوماتيك
كيا ريو أكبر من الاكسنت . بس الاكسنت اكثر شهرة

بس هرجع وأقول زي ما مستر ghazy12 قال مش معنى ان العربية مش مشهورة أن فيها عيوب .. هي العملية في الاول والاخر أزواق

بس يا مستر ghazy12 أنتا تعرف حد ركبها وجرب العربية الكيا ريو ولا لأ ؟؟؟ يعني هل هي كويسة ومريحة وعفشتها كويسة ومرنه ولا أيه ؟؟ وهل سواقتها سلسة ولا لأ ؟؟

شكراً كتير ليكم

تقدر تدخل قسم كيا يا باشا و تشوف كل المواضيع اللي عن الريو و تسأل
ملاكها بنفسك... العربيه كويسه جدااا, و أفضل من الأكسنت في رأي...

ربنا يوفقك للخير...

الريو افضل بكتير من الاكسنت من حيث التوكيل و الشكل(ازواق) و الكماليات هى هى يبقى ادفع غالى لية؟؟

أنتوا عرفين المشكلة في أيه ؟؟ أني دخلت قسم الكيا وعملت بحث قبل ما اعمل الموضوع ده .. بالعافية لما لقيت نتيجة للبحث . القسم كله بتاع الكيا بيتكلم عن الكيا سيراتو ومفيش كلام خالص عن الكيا ريو نهائي إلا لما صوروها في المعرض قبل كده ومعلومات عنها فقط وخلاص

أنتوا عارفين أنا هنزل أشوف توكيل كيا أركب في العربية برضو وأشوف شكلها عامل أزاي على الطبيعة يمكن الوضع ساعتها يختلف من وجهة نظري . أنا ركبت الاكسنت في أكتر من معرض وشوفتها هي واسعة من جوه بس العربية صغيرة الحجم لما تشوفها من بره معرفش أزاي :)

هروح توكيل كيا وأركب برضو العربية وأشوف النظام أيه وهرجع ليكم بوجهة نظري اللي كونتها من تجربتي .

وأنتوا برضو فيدوني باللي تعرفوه .......... مليش دعوة :)))))

ده تقرير استلام للريو
http://www.nilemotors.net/Nile/18904...cc-2011-a.html

هى الريو افضل , بس كانتشار ورخص قطع الغيار الاكسنت تكسب

بس وكيل ريوا افضل من غبور ميت مرة

وانا سمعت بس مش متأكد ان الريو هاتكون اخر موديل السنة دى بس , يعنى السنة الجاية مش ها تنزل ,