السلام عليكم يا إخواني
الحمد لله بفضل لله إستلمت يوم الجمعة النيسان التيدا ورخصت النهارده الحمد لله
أولا بشكر منتدى نايل موتورز اللي ساعدني كتير علي إتخاذ القرار وعرفني بناس محترمة جدا
طبعا بشكر أ/ أحمد مصطفى علي تعبه معايا وأ / عبد الخالق من معرض أوتو إيجيبت مدينة نصر علي تفانيه الصراحة وعدم بخله بأي معلومة في العربية من شرح للعربية ووظائفها والضمان والصيانات اللي خالاني أبقي مبسوط ومطمن لخدمة ما بعد البيع.
نيجي بقي للعربية بشكل سريع وده ميعتبرش تقرير لإني لسه بستكشف :
أنا تقريبا سوقت العربية النهارده حوالي 150 كيلو معدش ال 100 سرعة ولا 2.5 /3 ال RPM.
العربية بسم الله ماشاء الله ناعمة جدا في المطبات والنقر بتاخد وتدي معاها والعزل جيد جدا لدرحة أني مخدش بقالي أن العربية دايرة وروحت مدور وعملت العملة السوده دي مرتين :_Alshmokh11:.
العربية داخليا مريحة جدا والمقاعد والوسع حاجة ما شاء الله عليها
العربية إرتفاعها ماشاء الله برضه ممتاز علي المطبات
الفرامل حلوه بتستجيب معاك كويس جدا
نيجي بقي لشويه الحاجات العجيبة اللي حصلتلي :
وأنا رايح أرخص سمعت صوت حاجه كده بتزن جايه من ناحيه فتحات التكيف مش عارف ده ايه بس إختفى بعد كده أويمكن مركزتش اسمعه مع الزحمه والكاسيت ححاول بكره اصح أشوف هيتكر ولا لأ
لما ببقي فاتح القزاز اللي جنبي تلت كده أو نصه بيبقي في صوت كأن القزاز بيلق بيخبط يعني مش عارف ده عادي ولا لأ
مسند اليد مغطي شويه علي فرامل اليد لدرجه اني نسيت ومشيت 3-4 كيلو والفرامل مشدوده طبعا ماكنتش لأخرها بس أني بملكهاش من مسند اليد ومخدتش بالي الا من الصفارة (ربنا يستر ميكونش في حاجه حصلت) وطبعا لوكانت مشدوده علي الاخر مكنتش مشيت انا بعده وقفت وجربت اشدها علي الاخر وأطلع العربية مطلعتشي.
حاجه تانيه مش شايفها مفيده من وجهه نظري وهي الفوجات لانها مبتشتغلشي لوحدها وبتشتغل مع النور الوسط فيغطي عليها ويبقي ملهاش لازمة لان كل الناس بتعتمد عليها في مصر في كشف الحفر والنقر مش عارف بقي في الضباب اكيد هتبقي مفيده.
برضه من التركيز الشيد أو الهسس حسيت انها بتحدف شويه شويه يمين وشويه شمال روحت اكشف علي الكاوتش وأظبطه كله 33 لقيت اللي ورا مظبوطين واللي قدام يمن 40 واللي قدام شمال 32 المهم ظبطهم بس لسه هاجس الحدف عندي هبقي اخد رأي أ/احمد مصطفي في الموضوع ده ما أقابله.
طبعا انا مجرتش بالعربية عن ال 100 عشان اعرف ثباتها وكنت ماشي في طريق الواحات 80/90 وجت عربية مقطورة طايرة حسيت بيها بتهز العربية مش عارف برضه ده عشان كنت فاتح الشبابيك ولا ايه بس ال POWER تقيل وحلو مش خفيف هوا يعني .
ده كده كان رأي عنها بشاركم فيه مش بعرف ارتب إسألوا زي ماانتوا عايزيين وان شاء الله اقدر اجاوبكم
تحياتي لكم
أحمد