بمناسبة الحر و التكيفات - انا جربت افتكاسة و نفعت ..!
السلام عليكم يا اهل الاوبل .. انا حبيت اشارك معاكم بافتكاسة عملتها فى التكييف بما ان كل الضغط دلوقتى على مواضيع صيانة التكييفات . الموضوع ببساطة ان كان عندى مشكلة فى سرعات البلاور ( المروحة الداخلى ) و هى انها بتشتغل بس على اخر سرعة (4) و طبعا كان رد جميع الصنايعية ان مقاومة المروحة باظت و لازم تتغير علشان مبتتصلحش و الاسعار من 150 ل 300 جنية و اذا لقيتها اساسا - العربية فيكترا A - المهم كان حل احد الخبراء انى اجيب واحدة بتاعت 97 و اشغلها بس مش هتبقى راكبة في نفس المكان مظبوط , و دا اكبر غلط لانها لازم تركب فى مكانها مظبوط علشان ليها تهوية .. المهم علشان مطولش عليكم فكيت المقاومة دى و قلت اشوفها مالها و اية تركيبها اصلا و هى موجودة تحت فبر المساحات جنب البلاور علطول و هتلاقو راكب فيها الفيشة بتاعت السرعات و فردتين البلاور , يتفكو براحة و بعدين في مسمار واحد فى الجنب و الناحية التانية لسان بلاستك كل المطلوب هو فك المسمار و سحبها بالراحة هتطلع بكل سهولة , المهم المقاومة دة عبارة عن جذء محول كهربى _ و هو الجذء الى لونة اخضر و دة تقريبا نفس اللون في كل الموديلات الي شفتها - و في الجنب في مقاومة صغيرة واحدة و هى دة المشكلة كلها علشان ببساطة لو المحول في حاجة صعب قوى يضرب كلة لانة اربع دوائر من جوة ( اربع سرعات ) و بالتالى احتمال كبير جدا ان المشكلة تبقى في المقاومة المهم قصيت المقاومة دة و رحت جبت واحدة نفس الرقم و المقاس ( مكتوب عليها ) من واحد بتاع حاجات كاسيتات و تلفزيونات ب 2.5 جنية و رحت لاحمها بمكوة اللحام و نقطة قصدير و ركبت كل حاجة تانى و قلت بسم الله الرحمن الرحيم و جربت و لاقيتها اشتغلت الاربع سرعات زي الفل .. الكلام دة من اسبوعين و انا قلت استنى علشان اجربها كويس و بعدين اقولكو و اهو بردو توفير فلوس و منخليش صنايعى يشتغلنا علشان هو كسلان يصلح .. و الي ميعرفش يقص و يلحم ممكن يفكها و يروح لاى حد بتاع تصليح تلفزيونات و يخلية يعملهالو و معتقدش انة هياخد اكتر من 10 جنية علشان الموصوع دة ميخدش دقيقة لو المقاومة موجدودة , و الى ميعرفش حد بيبيع المقاومات دى ممكن يجيب من النخيلى في باب اللوق .. ارجو ان الموضوع يعود على الكل بمنفعة و منجلكوش فى حاجة بايظة :C_laugh[1]:
