اماكن للصيانة خارج التوكيل

**AAAPRD** · 27-03-2011 05:22 PM

السلام عليكم
ارجو من اعضاء المنتدى المحترمين الافادة بخبرتهم فى الصيانة و اصلاح الاعطال خارج التوكيل
انا عربيتى( نيسان صنى 2008) خلصت فترة الضمان و اظن ان الافضل ان اتعامل مع حد برة التوكيل

و لا يفوتنى ان اشكر اعضاء و ادارة المنتدى على المعلومات الغزيرة و الروح الاسرية الطيبة الموجودة فى المنتدى

**sedyrohy** · 27-03-2011 06:26 PM

لو عندك مكانيكي و عفشجي و كهربائي شاطر اعرف ايه الي انت بتعمله في الصيانات الدوريه
و روح عنده اعمله

بس في نقطه
التوكيل مميزاته
فاهم العربيه
عارف ازاي يركب اي قطعه غيار
الاصوات الي انت بتسمعها عارف هيا جايه منين
عارف بيعمل تشك على ايه و يسيب ايه
بيعملك شغلك بكل امانه يعني مش هوايته تفتيح شغل العربيه
كل ده و انت قاعد في مكانك معزز مكرم في اقل من 5 ساعات

شوف بقى اي ميكانيكي او كهربائي او عفشجي حيعملك كل الي فوق

خليك في التوكيل احسن

**Opelvectra** · 27-03-2011 07:54 PM

بصراحة التوكيل اضمن بكتير علي الاقل لو حصل حاجة هترجعلهم

**Bishoy.Girgis** · 27-03-2011 08:01 PM

بص حضرتك انا برشحلك التوكيل بس صيانات العشرات فقط لا غير لأنها صيانات هامة جدا و بيتغير فيها حاجات مهمة في العربية و مش مهم صيانات الخمسات يبقي كده هتروح التوكيل كل 10 شهور لو استهلاكك 1000 كيلو كل شهر و بكده تبقي صاين العربية

**Ahmed.TV** · 27-03-2011 08:34 PM

الصيانات العادية بتاعت العربية كمل عادى زى ما كتاب الضمان قايلك بيتغير ايه كل قد ايه وهكذا

واى مكيانيكى شاطر تروحله وتعمل عنده الصيانات العادية

وكل فترة تروح على التوكيل عشان تظبط العربية بالكمبيوتر عشان قراءات الحساسات دى مهمة , ومش موجودة عند اى حد بره حتدوخ شوية عقبال ما تلاقى حد عنده جهاز كمبيوتر وفيه برنامج لسيارات نيسان , ويظبطلك الدنيا

ولو لقيت خير وبركة
مالقتش يبقا تروح زيارة للتوكيل كل فترة عشان تظبط العربية بالكمبيوتر

تحياتى