ساعدونى لو سمحتوا يا وحوش الفيات ( بونتو كلاسيك )

بعد مساء الفل عليكم يا احلى منتدى و احلى اعضاء
ليا كام استفسار كده عايز اعرف اجابتهم لو تقدروا تساعونى
انا قدامى فيات بونتو كلاسيك موديل 2009 11000 كم فقط
1- اخبار قطع الغيار بتاعتها ايه يعنى موجودة و متوافرة و ياريت اللى يعرف مكان التوكيل و الصيانة فى اسكندرية
2- اخبار الثبات بتاعها ايه و لغاية كام كويسة على الطريق ( انا بتاع جرى )
3- السعر يكون حوالى رينج كام
4- لو حبيت اجنط و اركب كوتش اعرض تنصحونى بكده و لا بلاش
5- هل فيها اعطال متعارف عليها ولا هيا عربية كويسة

ارجوكم متبخلوش عليا بالمعلومة للى يعرف و متشكر ليكم كتير

بص ياباشا قطع غارها متوفرة طبعا في التوكيل وبره في القاهرة وفي اسكندرية وان شاء الله حد من ملاك البونتو في الاسكندرية يقدر يفيدك ....
بالنسبة لموضوع لمكان التوكيل في الاسكندرية هوا في مرغم - المنطقة الصناعية - خلف سجاد مكة تليفون 0185507000-018550800 وشغال من 9 صباحا لحد 5 مساء عدا الجمعة

بالنسبة للثبات انا مجربنهاش بس انا معايا الباليو وهيا شبه البونتو الى حد ما وهيا 1000 سي سي وبجيب بيها لحد 150 والثبات الحمد لله تماام وبردو حد من الملاك يقدر يفيدك اكتر

الجنوط اه عاادي بس تكون في الحدود المسموح بيها عشان العفشة

وبالتوفيق ان شاء الله ............

شكرا يا استاذ احمد على الرد و مستنى رد باقى الوحوش ايه يا جدعان محدش معاه بونتو

الثبات حسب انت بتقارنه بإيه
أنا سوقت عربيات مختلفة و شايف ان ثباتها معقول ولكن أقل من عربيات تانية كتير
يعنى ثباتها زى الفيرنا و اللانوس و الأفيو , فلو بتجرى كتير ممكن مش هتعجبك و موتورها حلو جدا قبل ال120 بس بعد كدة بيموت و يقعد سنين لحد ال160
الجنوط المناسبة ليها 15 مع كاوتش 195/50 , أنا مركب 16 حاليا (و كاوتش 195/45) و المقاس دة فاشل تماما مع العربية دى
قطع غيارها مش نادرة و مش منتشرة برضو و هتلاقيها فى كل حتة

مختصر الجدول حول البونتو كلاسيك (من وجهة نظري)

أنها سيارة جيدة جدًا


تتميز بعدة مزايا وفيها بعض العيوب

هي في المقام الأول سيارة مدينة (يعني مش بتاعة سفر على سرعات عالية) لأنها فوق 100 أو 120 مش بتسحب بسرعة)

الثبات بتاعة معقول جدًا (بل أكثر من معقول) باعتبارها سيارة مدينة في المقاوم الأول (والدليل احتوائها على سيتي باور)

كما السيارة مصنوعة طبقًا للمواصفات الأوروبية ودا بيديها أفضلية

درجة الأمان بتاعتها عالية لأنها تحتوي على 2 إير باج

من عيوبها - غير الظاهرة - أنها 60 حصان فقط (ولكنها مناسبة لحجمها واستعمالاتها كسيارة مدينة)

أما بالنسبة للجدل الواسع حول قطع الغيار
فمختصره (أن قطع الغيار غالية نسبيًا) ولكنها معمرة بمعني أنك لا تغير القطع الأساسية إلا بعد فترة طويلة وبالتالي فلا تكون غالية، وقطع الغيار متوافرة.

المشكلة الأساسية في قطع الغيار، هي - لا قدر الله - في حالة الحوادث أو المشكلات الطارئة التي تتطلب قطع غيار بشكل غير المعتاد، فبالتالي الموضوع هيكون فيه تكلفة عالية.

أما عن موضوع الجنوط
فالجنط الخاص بيها 14 مناسب جدًا، و15 هيكون برضه كويس
لكن أكتر من كدة هيكون كتير على العربية (أو بمعنى آخر ليس له لزوم)

سعرها حوالي 67500 إلى بداية 2011

ملحوظة:
عندما اشتريت السيارة كانت بها مشاكل تجعل الواحد يكره الفيات كله، منها مشاكل في العفشة، والمساحة الخلفية، والسرفو (الخاص بالفرامل) كان فيه مشكلة عيب صناعة، (ولكن دي كانت عيوب فردية) ورحت التوكيل مرتين ظبطولي العربية تمام التمام من غير ما أدفع ولا مليم، وكانت مقابلتهم جيدة جدًا (مع العلم إن التوكيل مثل أي توكيل غالي جدًا - ولكن فترة الضمان ممتازة، حيث أنها 3 سنوات بدون حد أقصى للكيلو متر).

أرجو ألا أكون أطلت عليكم، وأرجو أن أكون أوصلت المعلومة