الموضوع: اكتر موقف مضحك حصل معاك من ولادك

بمناسبه الموضوع ده فانا احب اطمنكم اني عايش حاليا في احلك الظروف مع الاخ العقيد محمد النوبي
بنت اخويا جنه سنتين وشهرين والاخ العقيد سنه وثلاث شهور
جنه زقته كام مره كده من بدري تقريبا من اسبوع
وتشاء الظروف ان امها تسيبها عندنا وتروح مشوار
ام محمد في المطبخ وانا في الصاله
وجنه في الاوضه مع محمد يقوم البيه جايب عصايه وطالع يجري ورها في البيت وعمال بيزعق (ائه أئه أئه) خلصتها من ايديه بالعافيه وده لازم يضربها فوق دماغها
المصيبه اني مش متخيل انه يعرف الكلام ده ولازم ينتقم
ده غير انه رهيب مبينامش خالص لو نام نص ساعه يفضل باقي اليوم صاحي

ههههههههههههههههه
كلنا في الهم شرق
اقصد في السعادة بيهم شرق
الهانم مريم سنتين وطبعا الشهرين اللى فاتوا التليفزيون مش بيشتغل غير على قنوات الاخبار اخر شهر فبراير مراتي مصممة تشوف التحرير اشمعني انت بتنزل قلت خدها هي والولاد من غير ما اقولهم رايحين فين وهوب في التحرير
طبعا هي من كلامي فاكرة ان التحرير كله ثورجية واصحاب مطالب وعايزين البلد تبقي احسن ووووووووووووووو الكلام اللى صدعت دماغها بيه
نزلنا وكانت ايام المولد اياه وطبعا الولاد اول ما لمحوا بتوع الرسم - كان فيه شباب ماسكين الوان وبيلونوا وجوه الاطفال - ولازم يرسموا علم مصر
المهم رسمنا العلم على الوجه وجبت لهم اعلام صغيرة والانسة مريم على كتف مامتها اول ما مسكت العلم فوجئنا بيها بتلوح بالعلم ومصر مصر تحيا مصر
مصر مصر تحيا مصر
وطبعا الحروف كلها داخلة في بعضها ومش واضحة وفطسنا انا ومامتها واخواتها عليها من الضحك البنت عاملة لي زعيمة ثوريجة من يومها