أول حادثة ليا. الحمد لله ربنا ستر. محتاج مساعدتكوا يا شباب؟

السلام عليكم

ازيكم يا شباب. انا كنت جبت بونتو كلاسيك 2011 من كام شهر والحمد لله عربية ممتازة بمعني الكلمة وانا مبسوط منها الحمد لله

بس يوم الخميس الي فات عملت اول حادثة الحمد لله جت بسيطة اهي تاخد العين :pirate14:

الي حصل اني خبطت بمقدمة العربية في عربية تانية بس كنا علي سرعات قليلة فالي حصلي ان الفانوس الأمامي الوش بتاعة اتكسر والفنوس نفسة سليم والاصدام من الناحية اليميين هو ماسك بمسماريين في فتحتيين في الاكصدام من جوه فا الفتحتيين دول اتكسروا والاصدام نطر شوية لبرة.

سألت ناس بس قالولي موديهاش التوكيل لان اسهل حاجة عندهم شيل فانوس واكصدام وجيب جديد وكع يا معلم :grin28:

انا بسس عاوز اغير وش الفانوس واثبت الاكصدام. فكنت عايز مشورتكم يا شباب اعمل ايه اوديها التوكيل ولا اروح بره

ولو رحت برة حد يعرف مركز صيانة كويس يقدر يظبطهالي او حد قريب مني أنا ساكن في الهرم.

شكرا يا شباب علي اي نصيحة

اول الحاجة الحمد لله بسيطة و ربنا ستر و المهم انك حضرتك سليم موضوع وش الفانوس ده لو قصدك على الباغة مش هيبقى منظره لطيف :d لو ممكن تجيب فانوس من برة يبقى احسن بس اسأل الاول رجالة الفيات عشان موضوع الضمان و التوكيل و بالنسبة للاكصدام موضوعه سهل و التثبيت سهل في اي ورشة نضيفة و ربنا يباركلك في العربية ان شاء الله

انا واحد صاحبي معاه بونتو 2010 نفس الموقف معاه
الخلاصة:
الفانوس عامل 450 جنيه برة التوكيل و كمان من غير موتور و مش بيركب عليه الموتور بتاع القديم و الفانوس ابو موتور ب650 جنيه او 700
الوش بتاع الفانوس مفيش منه خالص يعني لازم تجيب فانوس

أطلع الحرفيين أو وكالة البلح , هتلاقى الفانوس الاستيراد يعمله حوالى 180 و زى الفل, ممكن يبقى فيه كام خربوش بس
بالنسبة للأكصدام, أى سمكرى شاطر يعرف يظبطه و هو بيركب الفانوس

شكرا يا شباب علي الردود والنصايح دي

ان شاء هشوف كدة اسعار الحاجت دي في الحرفيين والكيلاني وهتوكل علي الله في حاجة منهم

شكرا جزيلا يا شباب

الحمدالله انك سليم ، ربنا ستر

اخبار العربية معاك اية عشان انا بفكر اجيبها ومقلق من موضوع قطع الغيار

لو عايز وش فانوس ومش لاقى ممكن يتعمل عمولة فى شركة الاهرام للبلاستك بس فى المصنع الى فى الظاهر مش المحل العادى واى بيانات انا موجود

اقتباس:

---

المشاركة الأصلية كتبت بواسطة bayoumisoft

الحمدالله انك سليم ، ربنا ستر

اخبار العربية معاك اية عشان انا بفكر اجيبها ومقلق من موضوع قطع الغيار

---

ربنا يخليك يا باشا. وبالنسبة للعربية هي ممتازة الصراحة بس قطع الغيار في التوكيل غالية شوية انما برة هتلاقيها كتير وبسعر اهدي

واي استفسار انا في الخدمة يا باشا

اقتباس:

---

المشاركة الأصلية كتبت بواسطة Angel_wolf

لو عايز وش فانوس ومش لاقى ممكن يتعمل عمولة فى شركة الاهرام للبلاستك بس فى المصنع الى فى الظاهر مش المحل العادى واى بيانات انا موجود

---

+111111111111 تمام :plusone1:

اقتباس:

---

المشاركة الأصلية كتبت بواسطة engayman2006

ربنا يخليك يا باشا. وبالنسبة للعربية هي ممتازة الصراحة بس قطع الغيار في التوكيل غالية شوية انما برة هتلاقيها كتير وبسعر اهدي

واي استفسار انا في الخدمة يا باشا

---

شكرا يا باشا علي ردك واهتمامك باستفساري
اكمني كنت بقارن رينو لوجان بفيات بونتو تقريبا السعر متقارب طبعا مع اختلاف الفئة
بس اللي بيميز اللوجان انها منتشرة وقطع غيارها منتشره لحد كبير ووكيل محترم ومش غالي زي اوماترا
بس انا نفسي اجيب عربية هاتشباك وعجباني جدا البونتو وشكلها بصراحة تحفة وكمان 1300 بس