الموضوع: نسب تخفيض جير بوكس الصنى

و الله تسلم ايدك يا خالد باشا ....

استاذ دايما ....

لكن المشكلة .... نفسي افهم ... مش عارف

هو يمكن انا كتبت الموضوع بشكل رقمى مختصر لأن الصديق اللى سألنى كان فاهم اساسياته وبيبحث عن مقارنة بين المانيوال والأوتو

لكن لتوضيح الأمر بالنسبة لباقى الأعضاء نوضح الآتى

المتور شغلته انه يستفيد بالبنزين فى انه يلف، علشان يلفف العجلات، ونظرا للطبيعة المعقدة لموتور البنزين فهو له مدى معين من السرعات، أقل منه ميقدرش يطلع عزم مناسب، واكثر منه يتآكل بسرعة او يتكسر، وهذا المدى محصور بين 2000 و 3500 لفة للدقية للتشغيل الاقتصادى و بين 3500 لفة و 5500 للتشغيل الراياضى(طبعا احنا هنا مش بنتكلم عن محركات الفورميلا وان اللى بتوصل ل 11000 و 12000 لفة للدقيقة) ، ونظرا لأن السرعات دى للمحرك لو انا نقلتها مباشرة للعجلات هتخلى العربية يا إما تمشى بسرعات تصل الى 800 كيلومتر فى الساعة وهو امر مستحيل عمليا بسبب مقاومة الهواء أولا وقدرة الاستجابة للسائقين وطبيعة الطرق واشياء اخرى كثيرة ثانيا، يا إما لازم العجلات تكون صغيرة جدا بحجم عجلات سكوتر الأطفال علشان اقدر امشى بسرعات مقعولة، وده برضه مسألة غير منطقية ، أولا لأن طبيعة الطرق لا تسمع بهذا الانخفاض، ونسب الاحتكاك بين العجلات والأرض ستؤدى الى انعدام فاعلية الفرامل وانعدام فاعلية الديريكسيون ، كما ان سرعة دوران العجلات السريعة جدا هتئؤدى الى سرعة تآكل العجلات والبلى الخاص بها ومحاور الجر والكبالن، وبالتالى هذا بدوره غير منطقى، لذلك احنا بنلجأ لتخفيض سرعة المحرك، وده بيتم داخل صندوق التروس او ما نسميه الجير بوكس او الفتيس، وعادة يتم التخفيض على مرحلتين ، المرحلة الأولى هى مرحلة التخفيض فى النقلات والمرحلة الثانية هى مرحلة التخفيض فى الكورونا (وقبل ما نسمع الجملة الشهيرة التى لا يمكن ان يسلم موضوع كهذا منها وهى ان"العربيات الجر الأمامى مافيهاش كورونا"أؤكد ان كل عربية فىالدنيا فيها كورونا، فقط فى عربيات الجر الامامى تكون الكورونا مدمجة ضمن الفتيس فى قطعة واحدة لكن مجموعة تروس الكورونا موجودة بشكل منفصل داخل علبة الجيربوكس) ، المهم نرجع لموضوعنا، الفكرة انه يمكن تخفيض او رفع سرعة الدوران من خلال التروس عن طريق تصميم عدد اسنان كل ترس، يعنى لو انا عشقت ترس فيه 90 سنة بترس آخر فيه 30 سنة(وبالطبع قطر الترس الأخير اصغر بنسبة عدد اسنان هذا الى ذاك، يعنى قطره ثلث قطر الترس الأول) وقمت بتدوير الترس الأول ذو ال 90 سنة فإنه كلما دار الترس الأول الكبير لفة واحدة سيدرو الترس الثانى الصغير 3 لفات فى عكس اتجاه دوران الترس الاول، وهكذا يمكننى زيادة سرعة الدوران ، والعكس بلعكس طبعا بمعنى انه لو دورت ترس صغير متعشق فى ترس كبير فان الكبير سيدور ابطأ من الصغير بنسبة عدد اسنان هذا الى ذاك، وهكذا يمكننى تخفيض السرعة
هنا هيكون عندنا سؤالين: الأول هو، طيب لما نقول ان احنا عندنا ترسين نسبة التخفيض بينهم 1 الى 2.7894 (مثل الأرقام المعقدة الموجودة فى المشاركة الاولى) ، هو فيه حاة اسمها ترس فيه 2.7894 سنة؟ والحتة من السنة دى بتتعمل ازاى، الاجابة ان الموضوع ابسط من كدة، لو احنا عشقنا ترسين واحد فيهم فيه 53 سنة والتانى فيه 19 سنة هتكون نسبة التخفيض بينهم 53/19 =2.7894
السؤال الثانى: طيب هو ايه الغباء ده، احنا ليه نخفض فى سرعة الموتور ونخسر طاقته، الاجابة هى مبيحصلش، فيه قاعدة ذهبية فى علم الميكانيكا بتقول ان كل فقد فى السرعة يقابله مكسب بنفس النسبة فى العزم، يعنى لو باستخدم راوفع او بكرات او سيور او تروس او نظام هيدروليكى او اى نظام ميكانيكى كانت الرعة الخارجة من امنظومة اقل من السرعة الداخلة للمنظومة، فإن العزم او القوم الخارجة من المنظومة تكون اكثر من تلك الداخلة للمنظومة بنفس النسبة( طبعا مع اعتبار بعض الفواقد البسيطة بسبب الاحتكاك) بمعنى انه لو احنا استخدمنا ترسين لتخفيض السرعة بمقدار 1/2.7894 ، لو كان الترس الأول(القائد) داخل له عزم 150 نيوتن متر، يبقى الخارج من الترس التانى(المنقاد) =150*2.7894=418 نيوتن متر، علشان كدة احنا دايما بنقول ان الأول والتانى عزمهم عالى، وعشان كدة العربية بتطلع على الأول بسهولة، وعلى التانى اصعب، وعلى التالت صعب جدا، وعلى الرابع مستحيل لأن مافيش عزم
نرجع تانى بأه لموضوع الجير بوكس والكورونا:
قلنا ان العربية بيتم فيها التخفيض على مرحلتين على التوالى: المرحلة الاولى فى الفتيس والمرحلة التانية فى الكورونا، المرحلة الأولى رقم التخفيض فيها متغير بحسب النقلة : يعنى مثلا لو خدنا الصنى المانيوال، نلاقى ان على الأول كل 3.333 لفة للموتور هيقابلهم لفة واحدة فقط على العمود اللى بين الفتيس والكورونا، او بشكل اسهل كل 10 لفات للموتور هيقابلهم 3 لفات على العمود اللى بين الفتيس والكورونا
لكن لو اديناها التانى، هنلاقى ان تقريبا كل 10 لفات للموتور هيقابلهم 5 لفات على العمود بين الفتيس والكورونا ، يعنى هنا بقت العربية اسرع شوية لنفس لفات الموتور، لحد ما نوصل للحامس هنلاقى ان الآية اتعكست وبقى العمود اللى بين الفتيس والكورونا اسرع من الموتور، يعنى هنلاقىان كل 10 لفات للموتور يقابلهم 13 لفة للعمود بين الفتيس والكورونا، وده علشان نحقق سرعة عالية للعربية بدون اهلاك المحرك
اما المرحلة الثانية (الكورونا)فهى نسبة تخفيض ثابتة(الكورونا ليها شغلانة اخرى بالاضافة للتخفيض النهائى لكن مش مكانها هنا علشان منعقدش الموضوع)، وعادة بتكون نسبة تخفيض كبيرة تترواح من 4 الى 5، يعنى 4 لفات من العمود اللى بين الفتيس والكورونا هيقابلها لفة واحدة من الكورونا، وده علشان الأسباب اللى شرحناها مسبقا اللى بتخلينا محتاجين للتخفيض، ، العمود اللى خارج من الكورونا متصل مباشرة بالعجلات وبالتالى العجلة بتلف بنفس سرعة دوران عمود خروج الكورونا، طيب لما نحب نعرف لكل نقلة لما الموتور يلف لفة واحدة يبقى العجلة هتلف كام لفة، يبقى نضرب نسبة تخفيص الجير بوكس على النقلة دى فى النسبة الثابتة للكورونا، يعنى مثلا على الأول، لما الموتور يلف عشر لفات لما نضربها فى 1/3.333 هيدينا 3 لفات للعمود بين الفتيس والكورونا، نضربها فى نسبة تخفيض الكورونا يبقى 3 مضروبة فى 1/4.167 يدينا 0.72 لفة، يعنى كل ما الموتور يلف 10 لفات واحنا مديين الغيار الأولانى العجلة هتلف تلات تربع لفة، لكن على الخامس مثلا الموتور كل ما هيلف 10 لفات العجلة هتلف حوالى تلات لفات وربع ، وعلشان نحول الكلام ده الى سرعة بنلجأ لأبسط معادلات الدائرة اللى بتقول ان محيط الدائرة بيساوى القطر مضروبا فى رقم ثابت يسمى "ط" بالعربى و"باى" بالنجليزى ويرمز له برمز يشبه حرف تى كابيتال الانجليزى لكن مع وضع شرطتين رأسيتين بدلا من واحدة وقيمته =3.141427
وبالتالى لحساب المسافة التى تقطعها السيارة فى كل لفة للاطار نضرب قطر الإصار فى ط، ولحساب قطر الاطار من ارقام مقاس الاطار نضيف مقاس الجنط(15 بوصة) بعد تحويله الى المللى متر بضربه فى معامل 25.4 الى ضعف ارتفاع الجنط(نحصل عليه من ضرب عرض الجنط185 مم فى نسبة الارتفاع الى العرض0.65) (ودى التلات ارقام اللى موجودة فى مقاس اى اطار) ، والرقم اللى هيطلع لنا نضربه * ط ونقسم الناتج على 1000 لتحويله الى متر ، وبكدة نقدر نعرف العربية بتقطع كام متر فى كل لفة للاطار وبالتالى نقدر نعرف لعربية بتقطع كام متر فى الثانية لما نضرب المسافة المقطوعة لكل لفة فى عدد اللفات فى الثانية، ولتحويل متر فى الثانية الى كيلومتر فىالساعة بنضرب فى 3.6 وبالتلى نقدر نعرف سرعة السيارة المقابلة للآر بى ام على كل غيار

ارجو ان كدة تكون الصورة وضحت شوية

يااااااااه ...

ماشاء الله عليك يا خالد باشا ....

ربنا يكرمك ...

شرح وااافي جدا ... و مبسط ....

تخيل اني فهمت لدوقتي ...

ربنا يبارك فيك ... و دوما بنتعلم من مواضيعك و مشاركاتك المهمة جدا جدا ....

ليس هناك كلمه توصف هذا العمل و الجهد البذول



يشرفنا تواجدك معنا

راسك أبوســـــــــــــــــــهـ ـــــــــــــــــــــــــ ا

المشاركة الأصلية كتبت بواسطة sab3aawy

يعنى لو احنا عندنا الموتور شغال على 3000 لفة للدقيقة فستتحرك السيارة الاوتوماتيك بسرعة= 116.1127كيلومتر فى الساعة
اما السيارة المانيوال فستتحرك بسرعة =111.59 كيلومتر فى الساعة




فان النسب قد تبدو واحدة تقريبا فى حالة التسارع لكن فى وقت السرعة الثابتة فسيكون محرك السيارة الاوتو اكثر راحة لنفس سرعة السيارة

متهيألى دى الخلاصة للى مستعجل

بارك الله فيك يا علامة المنتدى على الشرح الوافى
و ما الشرح الثانى بأقل تعقيدا من الاول


بهزر طبعا
شكرا يا بشمهندس