الموضوع: Tarek Gen2 بجد شخص يستحق كل الاحترام و التقدير علي مساعدته ليا

السلام عليكم
أخواني البروتونية الأعزاء ،
بعد التحية ،
أنا بكتب موضوعي ده مخصوص علشان أحيي شخص مميز يستاهل أني أكتب فيه مواضيع كتير و مهما كتبتها مش هقدر أوفي حقه عليا بجد ،
الموضوع كان بإختصار أني في يوم القدر أراد لي اني اعمل حادثه و لكن جات سليمه الحمد لله ، و كانت خلاصتها انه عندي باب السواق و جزأ من العتب و الرفرف اتطبق ، خاصة الباب اتطبق و خبطته كان رخمه حبتين ،
أنا بصراحه كنت حيران و قلقان و محبط من الخبطه دي خاصة ان العربيه جديد بقالها حوالي 4 شهور ، و كنت زعلان عليها ، و اتصلت بالتوكيل علشان أسأله عن التكلفه المبدأيه ، فقالي لن تقل عن 2000 جنيه علي الأقل
مع اني كنت مطمن للتوكيل لأني كنت عارف انه هيرجعهالي زي ما كانت ، لكن بصراحه احبطت جداً لما سمعت الرقم العالي اوي ده ، و بالصدفه لقيت صديقي العزيز * لــبيــد * Spiderloking ع الماسنجر
فحكيتله الوضع ، فهو قالي اوصل لشخص اسمه Tarek Gen2 و هو يعرف سمكري كويس هيقولك عليه ، ففعلاً وصلت للبروفايل بتاعه ع المنتدي و اتصلت بيه بالرغم انه مفيش اي سابق معرفه بيني و بينه
اول مره معرفتش اوصله لما اتصلت بيه ، فحاولت تاني مره و فعلاً رد عليا ، و الراجل اتفق اننا نروح لواحد هو يعرفه ، و فعلاً تاني يوم اتصلت بيه و اتقابلنا عن مكان قريب من شغلي ، و الراجل خيرني بين 2 سمكري ممتازين بس قالي علي واحد افضل هو يضمنه اكتر
و فعلاً روحناله ، و السمكري شاف الخبطه و قال انها لازم تتسخن لأن مينفعش تترد ع البارد لأن الباب كان مكرمش من الخبطه ، انا كنت زعلان انه هيسخن الصاج بس طارق شجعني شوية و قالي هترجع زي الأول
فاتفقنا اني اجيله تاني يوم علشان نروح للسمكري و نوديله العربيه و يبدأ فيها ، و جينا تاني يوم و انا في الشغل طارق كلمني و اتفقنا اقابله بس للأسف مكنش عندي وقت اروح معاه للسمكري علشان كان عندي ضغط ف الشغل ، فطارق من قمة ذوقه قالي انت روح كمل شغلك و انا هروح للسمكري و اقعد معاه لغاية ما انت تلخص
و فعلاً اديتله المفتاح بتاع العربيه و راح هو للسمكري ، بالرغم انه مفيش سابق معرفه بينا و حصل اني جالي اي احساس اني أشك فيه حتي خاصة اننا في أيام يعلم بيها ربنا بتمر بيها مصر كلها ، لكن سبحان الله انه الواحد بيطمن للناس من اول كلام بينهم ،
و لما خلصت شغلي روحت لطارق عند السمكري ، وهو الأسطي * عبدالله * و اتفقنا و بدأ يشتغل و ظبط الأداء بصراحة راجل متمكن و محترف ما شاء الله عليه ، و ظبط الدنيا زي الفل ، و بعدها روحنا للأسطي * محسن * البوهيجي ، راجل بصراحة محترم جداً و بشوش كده و تحس انه عنده ضمير ، مش زي اي صنايعي تاني
و راجل تحبه من اول نظره هههههههه بصراحة انا بقي له معزة عندي في قلبي ،
وديناله العربيه و بيتها عنده في الورشه ، و تاني يوم راح دهن الحتت المتسمكره في الفرن بدهان مستورد اتفقنا عليه ، و اتفقنا استلمها بليل منه ، و روحناله انا و طارق بليل و لقيت العربيه زي العروسه و بيلمعوها كمان ، بصراحه حاجه محترمه ، و اخدناها منه و روحنا لعبدالله السمكري تاني علشان يقفلنا الباب ، و كده رجعت العربيه زي ما كانت ،
و انا تاني يوم كان عندي ملاحظات بسيطه كده شفتها ، كلمت طارق فيها و هنروح بيها ل محسن البوهيجي علشان يعملها ،

فخلاصة كلامي ان عبدالله السمكري و محسن البوهيجي ناس محترفين و متمكنين من شغلهم أوي و أنصح بيهم بصراحة في التعامل لقدر الله لو فيه عند عربيتك حاجه

أما بالنسبه لطارق ، فبجد أنا مهما قلت و مهما اتكلمت مش هقدر اوفي حقه و رجولته ووقفته معايا ، بجد الراجل ده يستحق كل احترام و تقدير و فعلاً معرفة الرجال كنوووز ، و افتخر اني كسبت أخ و صديق زي طارق بصراحة
و ربنا يقدر باللي فيه الخير و ارد جميله ده في يوم من الأيام

أخوكم البروتوني / أحمد

ياباشا ماهو الاستاذ طارق معاه بروتون وحضرتك معاه بروتون وهو عمل مع حضرتك كل الواجب وانت كمان عملتله موضوع مخصوص بتشكره فيه لاااااااااااااازم تكونوا انتوا الاتنين محترمين لانكم كلكم ملاااااك بروتون وهو فيه مالك لسياره بروتون مش محترم ! مستحييييييل تحياتي لكل الناس المحترمه وربنا يباركلنا جميعا