-
الى كل ملاك m11
السلام عليكم ورحمة الله وبركاته .. من فضلكم ياجماعه محتاج من كل الناس الى معاها السيارة السبرانزا m11 يقولولى اية الاعطال المنتشرة فيها علشان انا قررت اشتريها ان شاء الله ومحتاج اعرف كل مشاكلها عشان يبقى كلامى معاهم فى التوكيل واضح واستفسر عن كل المشاكل دى وهل لقولها حل ولا لاء وعلشان بردة لو حاجة هتتشاف اثناء المعاينة علشان الواحد يبقى واخد بالو بردة وهحاول افهمهم انى اترددت اكتر من مليون مرة فى شرائها نتيجة انى سمعت عنها بعض المشاكل المكررة زى مشكلة الدينامو وتسقيف الموتور وتيل الفرامل وفتح الزجاج بالكهرباء بالاضافة الى الغاء الاير باج من السيارة المصرية على عكس الصينية وبصراحة كدة محتاج منه شهادة ضمان شخصية لو همضية على وصولات :bill: حتى علشان ابقى معايا الحق لو رحتلهم تانى فى مشكله ولا حاجة .. ومحتاج من حضراتكم كمان تعرفونى اية اللى المفروض اخد بالى منه اثناء شرائها لان محسوبكم ابيض ياورد فى العربيات يعنى كويس انى بعرف اسوق وكمان افضل الالوان ليها اية .. وجزاكم الله كل خير ...
-
بص حضرتك الدينامو وتقريبا مشكلته اتحلت وهي اصلا كانت عبارة عن شربون بس هما مكسلين يعملوه
التيل هما بصراحة بيركبوا نوع وحش جدااااااااااا بيعمل مزيكا وانت ماشي وهو هو نفس التيل بتاع 516 يعني ممكن تجيب نوع كويس من برة وتركبه عادي
بالنسبة للتسقيف انا شايفها تعود علي السواقة مش اكتر عشان هي هي نفس موتور 516 وكمان تيجو 1600
غير كدة العربية كويسة وتعتمد عليها في حجات كتير ثبات اكثر من ممتاز في السرعات العالية والفرامل ماشاء الله تمااااااااااااام جداجدا وعن تجربة اكتر من مرة....دي حكايتي معاها بقالها سنة وكام شهر معايا وعامل 29000 ك...
-
طيب يا استاذ سامح انت غيرت التيل امته ياعني فضل معاك كويس لحد امته ولا من اول ماستلمت العربية و التيل مش كويس و بعدين انا نفسي افهم هى كل العربيات الاسبرانزا كده زي ال a113 برضه لما سألت عليها قالولي برضه هتضر تغير فيها حاجات اول ماتشتريها و هتكلفك اكتر من 1000 هو ايه النظام مايعملوها كويسه من الاول و خلاص
طيب و عايز اسأل حضرتك على قطع الغيار بكام ياعني التيل لما حضرتك جيبته جيبته تقريبا في حدود كام وياعني انا متهيألي ان اي حاجه تخص الفرامل لو فيعا عطل بتبقا حاجه مقلقة شويه و ربنا الحارس بقا
انا بقيت نفسي حد يقعد معايا و يقنعني واحده واحده بالعربيه دي دي تحويشه العمر يا جماعه و مش عايز ارميها في الارض
ومعلش صدعتكوا
ارجو الافادة
-
شكرا ياسامح على ردك وافادتك بس كنت عاوز اعرف ضمانها اد اية وهل الحاجة بتتغير فى الضمان بسرعه ولا بتاخد وقت وهل بياخدوا منك فلوس او حاجة ويقولك النص علينا والنص عليك زى مابعض الشركات التيت بنت التيت فى مصر مابتعمل .. وعاوز اعرف كمان استهلاك البنزين فى ال 100 كيلو اد اية واحطلها بنزين اية وافضل الالوان فيها اية .. وجزاك الله خير
-
انت ناوى تشترى عربية m11 بردة ياستاذ forget20 ولا اية ؟؟
-
اه يا أتاذ katoba محتار اوى مش عارف اعمل ايه و نفسي حد يفيدني انا لاحظت ان حضرتك برضه داخل في كل مواضيع الاسبرانزا و مهتم بيها انا اقصد ال m11 طبعا و مش عارف اوصل لقرار زيك بالضبط ياعني هو الواحد حط عينه على العربيه بشكل كبير بس ده لوحده مش كفايا انا مثلا كان معايا الشاهين بجد عربية ممتازة معايا بقالها اكتر من 10 سنين اهو بس مش عايز اقولكم هي مريحه قد ايه و مابتتعبنيش و قطع غيارها في كل حته اينعم فيها عيوب بسيطه بس انا كنت مرتاح بيها و هي قدمت خلاص و عايز اغير و الاسبرانزا فخامه و شياكه و امكانيات عاليه جدا ربنا ييسرلنا الامر و يعدي الي جاي على خير و لا اييييييييييييييييه
-
ضيف على العيوب مكن الازاز و شوية اصوات تزييق على صوصوة في بعض السيارات .
-
بص حضرتك بالنسبة للتيل انا غيرته وكنت عامل بالعربية 27 الف كيلو ومكنش تاعبني في حاجة انا بس خفت اتأخر عن كدة يعملي مشكلة في الطنابير وهو في التوكيل سعره 170ج من غير مصنعية تركيب واللي عفته بعدها ان سعره برة التوكيل 70 ج وهو هو نفس بتاع 516..
وانا عن نفسي لما جبت العربية ما غيرتش فيها اي حاجة خالص مش عارف عن حد تاني حصل تغيير ولا لا..
بالنسبة للضمان هما بيستهبلو شوية بس لو حضرتك نشفت معاهم هيغيرلك من غير كلام....لما كان عندي موضوع الدينامو اتغير من غير ما ادفع نص جنيه....ولما غيرت قربة المياه المهندس العسول اللذيذ اللي هناك كان عاوز يشتغلني وقالي ان ضمانها 10000 ك وسنة قلتله انا عارف ناس غيرتها علي الضمان قالي خلاص اصبر لحد ما نبعت للصين وترد علينا هي عالضمان ولا لا قلتله انت اكيد بتهزر راح قالي خلاص تدفع حسابها ولو طلعت عالضمان تيجي تاخد فلوسك ضحكت وخد منه الورق وطلعت علي مدير المركز استاذ هشام سيف بجد محترم جدا اتصل بالمهندس وساله ضمان القربة قد ايه قاله سنتين و 60 الف ك قاله يبقي تغيرله القربة حالا وفعلا ما دفعتش فيها قرش واحد....والحمد لله العربية ماشية تمام بس من كام يوم مكنة الازاز خلفي شمال علقت واتصلت بيهم وطلبولي تغيرها عالضمان الحد القادم انشاء الله......وربنا يهديك ويكرمك للعربية اللي تريحك انشاء الله واي سؤال تاني انا تحت امرك
-
السلام عليكم ورحمة الله
انا معايا العربية بقالها 5 شهور عاملة 7000 كيلو
حتى الان لا توجد مشاكل باستثناء صوت صفارة عند الضفط على الفرامل من التيل وكان الزجاج الخلفى اتكسر وغيرته برة الضمان ب 320 جنيه من غير المصنعية وللاضافة لقيت الازاز عند اول واحد رحتله يعنى لا لفيت ولا دورت.
اعتقد ان العربية جيدة
وربنا يوفقكم
-
شكرا ياجماعه على الردود والافادة وانا شايف ان العيوب الحالية كلها عيوب بسيطة وحلها سهل باذن الله بس انا كنت محتاج اعرف من اهل الخبرة يعنى اية تسقيف الموتور وكيفية علاجة او تلافى حدوثه وبالنسبة للبنزين احطلها بنزين كام؟؟ ومعدل الاستهلاك اد اية فى ال 100 كيلو ؟؟ وكمان عندى سؤال تافه .. هل فتح الازاز بيبقى من خلال الى سايق بس ولا كل شباك له زرار ؟؟ واشيك الالوان ليها اية ؟؟ انا اسئلتى كتيرة عارف بس انا بقالى كذا يوم شاغل بالى اسئله وبسال طوب الارض ولو شوفت واحد راكبها بيبقى عندى فضول اوقفة واساله .. وشكرا ليكم
Content Relevant URLs by
vBSEO 3.6.0 PL2