الموضوع: تقييم للبيجو 405 رؤا

قمت بشراء رؤا منذ حوالى شهر و نصف
و تقيمى لها بعد 5000كم معظمهم سفر بين القاهرة الساحل و العودة فى نفس اليوم ( اى حوالى 580كم فى اليوم اليواحد ) خدمة شاقة كالتالى
1- العربية بها موتور و فتيس جبار انتاج انجليزى شبيه بموتور البيجو ال504 القديم و لكن حقن اليكترونى و ليس كربراتير
2- الفتيس انجليزى الصنع ايضاً و عزمه شديد على العربية
3- الموتور انجليزى الصنع و لكن يحمل علامة ايران خوردو
4- صوت الوتور على بسبب الكاتينة الجنزير و ليست الكاوتش و ايضاً بسبب التاكيهات شواكيش و ليست اطباق زى الفرنساوى او المصرى
5- قمت بظبط التاكيهات بعد ال5000 كم صوت الموتور اختلف شويا طبعاً و فوجئت ان وش السلندر قريب جدا من ال504
6- الصيانة فى التوكيل *******
مهندسى الاستقبال فى التوكيل مش عاوزين يعملوا فى العربية ده حاجة خالص
و لكن الحمد لله طالما انت عارف حقوقك فين و ازاى تعرف تاخدها حتوصل للصح
اولا قمت بتغير المارش فى التوكيل بعد زيارة التوكيل 3 مرات و لازم المارش يعلق امام المهندس علشان يغيره
ثانياُ الكرونة و ده استلزمت منى ارسال ايميلات الى شركة ايران خوردو و ماسا و بيجو فرنسا و الحمد لله لاقيت اهتمام ساعتها من مكتب؟؟؟؟؟؟؟ و مدير عام صيانه بيجو مصر و الحمد لله اقتنعوا انها كرونة و غيروها
سبب تغيير الكرونة اعتقد انه العربية كلها خارجة من المصنع مفككة بدون مبالغة العفشة و الات الجر والخ ......
و ده عرفة بالصدفة لما رفعت العربية فى الجراج و بدات اتاكد من تربيط العربية لقيت لحد مصدات الكاوتش للكرونة سايبه فما بالك بباقى العربية
الحمد لله بعد ما ربط العربية قبل صيانة ال1500 فرقت معايا جامد و لكن فى حاجات ما عرفتش طبعا اربطها زى قلب الكرونة
و بالتالى ضربت
موضوع السحب الحمد لله كويس بالنسبة لسيارة 1600 ، 87 حصان دفع خلفى بصراحة السحب سحب عربية كبالن مش دفع خلفى
مقارنة بالبيجو ال405 موديل 95 كربراتير الاتنين واحد فى السحب
الفتيس فتيس انجليزى جبار موضوع تقل عصاية الفتيس لانها مباشرة على الفتيس و ليست اتياش زى المصرى او الفرنساوى على الاقل حتترحم من موضوع الاتياش و اسال مجرب و تقل عصاية الفتيس حله فى تشحيم العصاية من تحت من داخل الغطاء الكاوتش ( سهل جداً)
موضوع العفشة - - - العفشة الامامية ليس لها علاقة بعفشة ال 405 المصرى او الفرنساوى اولا تثبيت علبة الدركسيون على الانترة و ليس صدر العربية بيخليك تشعر بهزة الموتور فى الدريكسيون و خصوصاً ان قواعد الموتور لسه ناشفة جداً
و المساعدين شبيه بمساعدين البيجو ال505 ذات البيضة السفليه و ليست ال405 و لكن من خلال تجربتى للعربية اجد انها مناسبة جدا للسيارة
و العفشة الخلفية ( ورق السوست ) اعتقد انها اعتمد على فكرة السيارة البيكن فى التعليق الخلفى و لم يفكر فى وضع كرونة كبالن على نظام التعليق الاساسى للبيجو ال405 و لكن بعد تربيط العفشة جيدا و خاصة المساعدين اللى كانت مفكوكة و تجميع ورق السوست جيداً على كراسيها العربية اختلفت تماماً طبعا ما وصلتش زى العربية ال405 او اى عربية تعتمد على سوست حلزونى ناشفة شويه فى المطبات القوية اما فى السرعة ما حسيتش بفرق جامد بينها و بين السوست الحلزونى لان اكيد متراعى فيها و زن السيارة و وزن حمولتها و بالتالى تصميم السوستة و عدد ورقها
الاستبن مشكلة اساسية و لكن حتلها عن طريق استبن صغير تم تثبيته فى ظهر الكنبة و اصبحت مساحة الشنطة كبيرة و معقولة
الصالون الداخلى هو هو الصالون القديم مع اختلاف الخامات اللى انا شايف انها افضل بكتير من الخامات المصرى السابقىة و خصصاً جوانب الابواب ( كلها جلد )
بالاضافة الى خامة التابلوه حتى الان انا شايف انها افضل من خامة تابلوه السيارة المصرى و ان كان لسه ما دخلناش فى الحر الشديد
اقصى سرعة وصلت ليها حتى الان هى 150 كم/س و ال RPM كان 4.5 ال red zone بعد ال5.5 و الحمد لله العربية متزنة جدا على الارض بالكاوتش ال13 الرفيع منتظر اغير الى 14 او 15
و اجرب اعتقد حتبقى افضل
و اعتقد ايضاً ان بعد ضبط التاكيهات و تغيير الكرونة و تربيط العربية كويس ممكن توصل لسرعة افضل من ذلك و ان كان ان شايف ان مافيش طريق فى مصر امن لسرعة اعلا من كده
من الاخر العربية حلوه بل اكثر من رائعة لو حتجيبها كعربية للشغل او كعربية تانية من وجة نظرى افضل سيارة تستحمل الشوارع بتاعتنا فى فئتها السعرية

عاجباني بس مقلق من الوكيل هوا ليه عشان اخد حقي لازم صوتي يعلى و دمي يتحرق حرام
هي العربيه منتشره انتشار معقول ف مصر؟