الموضوع: تحية طيــــــــــــــــــبة وبعــــــــــــــــــد

و الله يا دطتور أعتقد نفس شكوتك عندنا برضه لأن الفاتورة بتيجي برقم أكبر من إستهلاكنا بحوالي تقريبا 3 مرات

بصراحة الموضوع بتاع الكهربا ينرفز
مهو طريق الشكوى ان الكشاف مش بييجى عاقبته فى ان البيه الكشاف هيغتت على حضرتك و ممكن ييجى فى وقت انت مش موجود او الصيدلية مغلقة و يتبع اجراءات رسمية

انا عن نفسى بعمل حاجة انا شايف ان فيها مصلحتى
اول كل شهر بآخذ قراءة عدادات البيت كله و اروح الى مقر شركة الكهرباء و اسجل القراءات بنفسى مع المحصل ( اللى المفروض ييجى لغاية البيت ) و ادفع الايصالات اول بأول

و لو فيه مرة كسلت حضرته بيقوم كاتب قراءات جزافيه بتدخلنى فى شرائح كبيرة و بتبهدل الفواتير جدا و اقعد اضبط فى القراءات شهرين على الاقل و طبعا مش معقول انه يسيب الوصل من غير قراءة

المشكلة ان المحصل بييجى فى اوقات ممكن يكون صعب انه يدخل البيت او اكون برا البيت او فى وقت اكون نايم ( و طبعا بوابةالعمارة مقفولة )

و لذلك حليت المشكلة بمشوار اول كل شهر قبل يوم 10 فى الشهر علشان اعطيه القراءات قبل الايصالات ما تطلع

و حضرتك بفرض ان المحصل او الكشاف عنده ضمير .... طبعا الشعب المصرى لا يخلو من الظروف فتلاقى الراجل يطلع عمارة فيها 10 شقق يشوف 3 شقق و الباقى يا اما مغلقة يا اما الزوج مش موجود يا اما الاطفال اللى فى الشقة لوحديهم

فمتهيألى ان الواحد يكون ايجابى و يعذر شخص قد يكون زهقان من قلة مرتبه او المكان بعيد عنه جامد ...... و يبلغ القراءات بنفسه علشان مصلحته الشخصية

و فى القاهرة لما كنت ساكن فى المنيل ايام الدراسة بيعدى المحصل ميلاقينيش يسيب لى ورقة على الباب " برجاء ترك قراءة العداد و يرجع يأخد الورقة بعد يومين تلاته ( يعنى بييجى مرتين يا عينى ليه مخصوص ...شوف الضمير )

أحسن و أضمن حاجة فى موضوع الكهربا تروح الإدارة اللى أنت تابع ليها ( اللى قدمت فيها على تركيب العداد)

و تمليهم القراءة بتاعت العداد كل شهر ... من غير عك الكشافين ...

و ممكن كمان تدفع و تأخد الوصل من هناك و أنت بتبلغ الشهر الجديد