الموضوع: تجربة 4 سنوات متصله مع عشق حياتى الأوبترا

طبعا كلنا هنقول هو مين دا اللى لسه هيتكلم عن الاوبترا
أنا واحد اخترت الاوبترا من الاجنس بشكل تلقائى جدا ياعنى هتاخد العربية انهو قلت العربية السودا دى ( لانى مكنتش اعرف اسمها حتى )
المهم ياجماعة ركبت العربية ورحت بها لدرجة انى مكنتش اعرف فيها حاجه خالص بس زى ما بنقول الزمن بيعلم.


أتكلم بقى على تجربة 4 سنين من قيادتها واستحمالها ليا

العربية دى ياجماعة جبتها اتوماتيك لانى مكنتش ساعتها بعرف اسوق غير اتوماتك الوقتى بقيت مجرب بسوق جرارات كمان ههههههههههههههه

العربية ياجماعة مليانه عيوب تنرفز بس جنب مميزاتها هنقول العربية دى ربنا كرمنى بها

نتكلم على العربية بقى بلاش رغى

طبعا العربية من حيث الشكل الخارجى رائعة وتصميمها رائع وسهل جدا مع شوية تعديلات بسيطة تبقى سيارة شبابية اوى

نيجى نتكلم عن الشكل الخارجى شوية الفوانيس اللى قدام كبيرة جدا جدا وكرستال ودا بيسهل جدا فى فرش النور على الطريق بمعنى انك مش بتحتاج اكتر من الواطى لو الطريق عتمه كحل وكمان الفانوس مزود بلمبة عالى ولمبة واطى وطبعا كلنا عارف ان لمبتين احسن من لمبه واحد 2 بول وطبعا فوانيس الشبورة فعلا فوانيس شبورة مش اسم بس لانى فى اكتر المناطق شبورة ببقى شايف الطريق جدا وكمان كل العربيات ماشية ورايا ومطمنة ودا بيرجع لوضع فانوس الشبورة بمقاس وبزوايا واتجاه معين علشان مش يبقى اكسسوار على الفاضى لكن علشان يقوم بعمله مظبوط .

تجربتى مع النور الزينون

الزينون ركبته فى الشبور تحفة ومش بنور غيره على الطريق خالص ومش بيضرب فى عين حد لانه مسلط على الارض فمش مضر
طبعا الغرور اشتغل وقولت اركب فى العالى وتم التركيب لكن مش عاجبنى لان العاكس بتاع اللمبة العالى صغير ومش منور الفانوس كله فطبعا مبقاش عملى معايا تم الفك فورا

بالنسبة لاداء العفشة

العفشة عملية جدا ومريحة جدا وناعمة جدا مع الجنط 14 الاصلى ولحد الان مفكتش فيها مسار عير تربيطات بسيطة فقد
تم تركيب جنط 16 وندم العمر كله جالى لان اقل نقرة بقيت بحس بيها وحسيت انى ركبت 128 تانى وطبعا بقى قدامى اختيارين اما اعدل العفشة اما ارجع لل14 تانى قولت انا هرجع تانى وكلنا عارفين المسمار اللى بيتفك مش بيرجع زى الاصل تانى


الماكينة والفتيس

الماكينة طبعا 1600 انجيكشن 4 سلندر بس متور جامد جدا بالنسبة لفئة السعر للعربية دى والفتيس اتوماتك 4 نقلات بس الكيك دون فعلا جبار جدا بينتش العربية بطريقة تحس ان قلبك بيسحب معاها والفتيس مزود بزرار الهولد ودا بيخليك تسقط نقله وتسبت عليها انا حرقت بيه على النقلة 3 ومشيت 120 كيلو بس طوت العربية كان عالى

نقل الغيارات جميل جدا ومتناغم والسرعة بعد 2500 لفة بتبقى جميله جدا ياعنى انا بمشى 160 كيلو والعداد على 3000 لفة ودا جميل جدا والعربية صوتها هادى

ثبات العربية
اقسم بالله العظيم العربية دى بيحصلها بلاوى على الطريق من غرز
واخر مرة خلتنى اامن للعربية انى عملت غرزة والله الناس اللى كنت ورايا وقفونى بعدها وقلولى احنا كنا هننزل ندور عليك فى الترعة العرزة على 15 كيلو وداخل الغرزة بوش العربية مش جنبها ولما جيت الم العربية ملقتش اى مشكلة فيها ودا بيدل على ثبات رهيب وطبعا الملفات بدخل اى ملف 120 كيلو ومفيش مشاكل لا عومان ولا اهتزاز ولا اى مشكلة

العربيةمن جوه

الصالون واسع جدا جدا بس فيها عيوب كتيرة جوه

اولا بالنسبة لسعر العربية العربية من جوه ناقصها بلاوى
الفرش قماش عادى جدا
الدواسات موكيت
الكاسيت شرايط بالذمة حد لسه بيسمع شرايط
التابلوه كلاسيك اوى وعادى خالص مفهوش اى جماليات
سماعات الكاسيت فى الابواب ورا وقدام ودا عيب لا بكون مركب 3 ورا بيكتموا السماعات اللى ورا برجليهم

الكنب اللى ورا بيتفرد مع الشنطة وبكدا اقدر انام فى العربية نصى فى الشنطة ونص فى العربية علشان لو المدام طردتنى


يبقى كدا ثبات وماكينة وفتيس وعفشة وتسارع عربية ميه فى المية بالنسبة لفئتها السعريه وامكانياتها

نيجى للعيوب

صاج ضعيف لابعد الحدودة
كبوت سندت عليه اطبق
خبطة بسيطة فى الباب الصاج بقى زى الورقة لدرجة انى مرضتش اسمكره وغيرته لان بعد السمكة هيتحتله حتت صاح تنشفة شوية

البرومة حد يصدق عربية بقالها 4 سنين بس جالها برومه فى الكعوب عن الفرد اللى قدام

لو فكيت اى حساس الكمبيوتر يسجل عطل ولازم اروح اعمله ريست

البنزين غول بنزين بطريقة صعبة ياعنى تخيلوا انها ساعات ممكت تعمل 120 كيلو فى الصفيحة بس طبعا بالكيك داون والحرق وكدا بس بردوا قليل لانى ركبت البومة وعملت فيها كل دا وعمل معايا 230 كلو فى الصفيحة

رموت السيارة طبعا ضعيف جدا ومش بيجيب اكتر من 6 متر ففكيته وركبت واحد امريكى جالى من بره بس روعة


طبعا انا طولت عليكم بس الاوبترا عربية اثبتت نفسها
وانا حاضر لكل سؤال وخصوصا انى بقيت بفك واصلح اى حاجه فى العربية وفى حاجات كتير اكيد نسيت اتكلم عنها

وشكرا