إلى كل المتحمسين .. المتغنيين بالحرب مع إسرائيل ..

**SeiffoZ** · 30-03-2011 10:50 PM

أنا ملاحظ إن الصفحات عمالة تزيد على الفيسبوك ..

و المرشح الفلانى عايز يلغى كامب ديفيد ..

أنا مش ناوى أتكلم كتير عن القدرات العسكرية عارف إن فى أعضاء كتير ملهمش فى الموضوع ده و ممكن معندهمش ثقافة قوى ...

بس لازم ناخد بالنا من حاجة ...

لما نيجى نتكلم على إسرائيل ..إحنا مش بنتكلم على إسرائيل فقط ... بنتكلم على أمريكا ...
فى بينهم إتفاقية دفاع مشترك إتمضت فى الثمانينات ... و عامة هى مش محتاجة إتفاقية ..

فهنواجه سلاح الجو الإسرائيلى القوى + سلاح الجو الأمريكى القوى ..

لو إتكلمنا بالمنطق ... قد لا تستطيع أمريكا و إسرائيل هزيمة مصر بسهولة مثل العراق ..

لكن خسائرها هتكون فظيعة ... و قد لا يستطيعون سوى السيطرة على سيناء فقط .

لكن الأكيد .. لن نربح ...

ليه بقى .. لأن قواتنا المسلحة غير قادرة كيفا على مواجهة معركة مثل عدو شرس زى أمريكا فى الوقت الحالى .

قواتنا هتكون هائلة دفاعيا و تقريبا محدش يقدر يدخلنا غير بعد معارك قاسية جدا هيخسر فيها أمريكا و إسرائيل العديد من الطائرات و المشاة و المدرعات ....

ممكن ننجح و نصد الهجوم لكن منقدرش ندخل القدس ولا الكلام الحمصى ده ..

مش هينوبنا غير الخسارة ( العتاد و الرجال) و ليس الهزيمة .. و حصار بقى كام سنة عشان يقدروا يفكوا قوتنا

لكن فى الأخر الكفة هتغلب ليهم و قد نخسر سيناء مرة أخرى . و تبقى وكسة .

نيجى للأسباب الإقتصادية :

إحنا دلوقتنى بنمر بمرحلة صعبة إقتصاديا .. و أصلا إقتصاد مصر ضعيف البركة فى البهوات الحرامية ..

مش هقولك غير إن تكلفة طلعة الإف-16 بدون سلاح ... 2500 دولار ..

الدبابة الإبرامز الواحدة ... بتعمل 600 كم فى التانك .. و التانك 2000 لتر ... إضربهم يا معلم فى عدد الدبابات .

تكلفة القنبلة الgbu الموجهة من سلاح الجو 25000 ألف دولار .

أكمل ولا كفاية؟؟؟؟

ده غير تكلفة التعبئة العامة و الأكل و الباقى ..

هل إحنا قادرين على المصاريف دى إللى بدون جدوى ؟؟؟

نيجى بقى للذخيرة:-

سلاحنا مستورد ... ممكن نعتمد على نفسنا لفترة أثناء الحرب و على مصانعنا ... لكن هتجيلنا وقت و نقول محتاجين من برا .

رابعا :

مصر محتاجة شباب فى حالة البناء .. منجيش نموته و إحنا لسه محتاجين نبنى .. أقوم أهد؟؟

ولا أستنى أبنى و أبنى و أعرف أصنع سلاحى كامل .. و ابدأ البلطجة على خلق الله؟؟

أنا شايف ... إن الإلتزام بإتفاقية كامب ديفيد أمر حتمى ... و لو قلنا لأ ... يبقى بنحكم على نفسنا بالإعدام .

لكن لو إضطرينا .... فسيخلد التاريخ إسمى للأبد هههههههههه

و شكرا يا رجالة

**A.Saad** · 30-03-2011 10:53 PM

كلامك واقعى يا سيف

**أحمد كمال** · 30-03-2011 10:59 PM

و ما رميت إذ رميت ......

**zyadahmed** · 30-03-2011 11:11 PM

احيك على كلامك المشجع الذى يدفع للامام ويدعو للعزة والفخار والازدهار

ولا عزاء للشهداء فى كل الحروب العربية الاسرائيلية فى 48 / 56 / 67 / 73 / 82 / 2006 / 2008
ايها الشهداء لقد متم هباء وكان الاجدر بكم الانحناء مساكين لو كنتم انحنيتم لكنتم نجيتم

دفعت حيتكم مقابل لا شئ عبثا حاربتم المستحيل امجانين انتم كى تحاربوا امريكا واسرائيل ؟؟؟

**Dojuar** · 30-03-2011 11:17 PM

أولا: "((وَاعْتَصِمُوا بِحَبْلِ اللَّهِ جَمِيعاً وَلا تَفَرَّقُوا))"

ثانيا: "وأعدوا لهم ما استطعتم من قوة ومن رباط الخيل"

ثاثلثا: "كم من فئة قليلة غلبت فئة كثيرة باذن الله "

لو المصريين على قلب رجل واحد..انسى

الامريكان و غيرهم جبناء...شوف الفيديو ده

[youtube]http://www.youtube.com/watch?v=YbdjkR9zyhk[/youtube]

من ضمن التعليقات ان اللي بيعمل كده قطط...و ده المعنى الحرفي مش الحقيقي

**enas75** · 30-03-2011 11:27 PM

هو انا الوحيده اللي فهمت اللي صاحب الموضوع عايز يقوله ولا انا فهمت غلط
الموضوع مالوش دعوه بالحرب ......الموضوع ليه دعوه بالوقت وكيفيته.....ازاي تحارب وانت غير مستعد
الغاء معاهده كامب ديفيد يعني اعلان صريح بالحرب ......يجب الاستعداد له.....
"وأعدوا لهم ما استطعتم من قوة ومن رباط الخيل"
وبعدها تحارب.......
هو بيتكلم علي الوقت الحالي ....اللي بيستعمل دعايه انتخابيه....علشان يكسب اصوات ...بيداعب خيال كل واحد نفسه يحرر القدس
انا لما اقول كده حاجه ......لكن لما مرشح رئاسي يقول .....بيحكم كتيير علي اسلوبه في حكم البلاد
ممكن يعلن رفضه ليها وانها ليست علي مستوي الطموح....انما يتغني بالغائها كدعايه انتخابيه....يبقي ده عمره ماحيعمل حاجه ساعه الجد......حيقولي الكلام اللي انا عايزه اسمعه لكن تنفيذ مفيش......
انا مش عايزه مرشح رئاسي يقولي حلغي كامب ديفيد....انا عايزه مرشح رئاسي .يوصلني لكيفيه الغاء كامب ديفيد

**cheetos_892005** · 30-03-2011 11:28 PM

طبعا في فرق بين الشجاعه و التهور الناصري القديم

يعني اه سلام سلام لكن مش سلام بايد و الايد التانيه بتحركنا على هواهم خوفا من معادتهم او بطشهم

بتطاطي مره يبقى كتبت على نفسك تطاطي كل مره .......

الاتفاقيات القائمه نلتزم بيها

لكن لا مزيد من صفقات مهينه .....و في نفس الوقت صفقه زي الغاز نعيد النظر فيها ((بالتفاوض ))

و لكن لو حكم الامر .....ان الله معنا وده كفايه