الموضوع: حد تعامل مع مصر للتأمين؟

هل التأمين بيغطي حوادث زي دي من غير ما ادفع حاجه....ولا لازم احور عليه و اقوله حكني تاكسي و جري و الكلام المايع ده؟

بص ياباشا أنا دلوقتى أقولك اللى حصل معايا وأنت هتفهم كل حاجه
حاليا أنا عربيتى فى التوكيل بترش جنب يمين من تحت وكبود وبتغير بربيريز ورفرف يمين وبترش أكصدام أمامى من الحرف اليمين اللى واصل تحت الرفرف بسبب أيه بقى أن أنا ماشى على الكورنيش فى الشمال وجه ميكروباص بيستهبل وبيفادى عربيى قبل ما يعدي بعد منى راح لبس فى عربيتى مضيع الجنب اليمين وطلع يجررررررررررررررررى برضه
روحت جارى وراه جبته وزنقت عليه ووقفته أول ما جيت قدامه راح نازل من غير تفاهم راح شاتم وماسك شومه فى ايده وراح نازل على الكبود والبربيريز نزلت ليه والناس اتلمت راح رافع عليا ماطواه وعمال يقول للناس ده خبطنى وطلع يجرى وشويه يقولهم دا أنا سكران عقبال ما الناس فهمت ايه اللى حصل وكل اللى بيتلم عايز يضرب السواق السكران طبعا اللى هيموت خلق الله اللى هو أنا المهم راح ده بعدها رايح يركب عربيته وهيمشى رحت ماسك فيه المهم الناس حاشت وراح أتخن دكر واقف يقولى كلمه تغيظ بجد ما خلاص بقى ياكابتن جت بسيطه والحمد لله أنت بخير والله يعوض عليك وخلاص سيبه بقى روحت طالع فيه قولت ليه أنت ملكش دعوه وتطور الحوار أن الناس كمان مش عايزه تتكلم ولاتنطق بكلمه حق واحد علشان فى أيده مطواه المهم طلع عربيته وسط الزحمه وراح طالع يجرى جيت أجيبه تانى عقبال ماطلع من الحته اللى كنا واقفين فيها ولطريق أتزحم ووقف كان هو هرب منى ومازلت قصتى متعلقه معاه ....... ومش هسيبه ... روحت عامل محضر شرطه على طول باللى حصل وتانى يوم روحت سلمت العربيه فى التوكيل
وعمل مقايسه ب 6300 جنيه
وبعدها روحت التأمين
روحت التأمين وكتبت اللى حصل بالضبط فى الاخطار وسلمته وسلمت المقايسه وكتبت أنى عامل محضر .
أتصلت بى السكرتيره المسئوله هناك بعدها بيوم والصدمه كانت
الشركه مش بتعوض عن تلفيات مشاجرات
نعم
روحت قولت ليها طيب والعمل دلوقتى أنا الدنيا معايا خربنه زى كل الناس فى الوقت ده
راحت قالت لى تعالى بكره وأنا هقولك تعمل أيه
قالت لى أعمل محضر جديد وقول أن عربيه نقل محمله زنقت عليك وأنت على الطريق الدائرى مثلا وبعدها تعالى تانى هنا وأعمل أخطار جديد
قولت ماشى مع ان الكدب مش كويس بس أنا حكيت الحقيقه وأنا ما كنتش غلطان
المهم عملت كده وراح المعاين شافها
ووافق أن يعمل الكل الا الكبود علشان مش مقتنع أنه بسبب حادثه زى كده روحت للشركه تانى فى الاداره الرئيسيه أكتر من ثلاث مرات علشان أقابل المعاين المهم كلمته ورده كان بارد أوى وكنت على وشك أن أعصابى تفلت عليه
رحت داخل للمدير المسئول راح قالى خلاص متزعلش نفسك أحنا نشيل نصها وأنت نصها
قولت ليه علشان زوق حضرتك أنا موافق
مش هتفرق أهى جت على حاجه بسيطه وكانوا حوالى 400 جنيه تقريبا
ولسه مستنى العربيه تخلص من التوكيل وأدفع الفاتوره كلها نقدى وبعدها أودى الفتوره شركه التأمين وأنتظر حوالى 25 يوم تقريبا حسب ما بلغونى بكده والشيك يطلع بالمبلغ اللى فى الفاتوره
وفى النهايه أهو ده نصيبى مع عربيتى الجديده وشركه التأمين وربنا يحافظ عليكم ويحفظ طريقكم

وأسف أخيرا على الاطاله المريره

الله يكون في عونك....بس ان شاء الله هتأخد حقك من ابن التيييت ده

شكرا على الشرح المفصل وقول الحمدالله

أنتوا عارفين رغم أنى مش غلطان فى الحادثه دى كلها من أولها لأخرها
اللى مزعلنى أنى حكيت الحقيقه ومنفعش
كدبت عليهم كله تمام
بسأل نفسى ليه بس كده
وفى الاخر بقول الحمد لله على كل شىء
وشكرا