حد تعامل مع مصر للتأمين؟

**zico900** · 01-04-2011 06:22 AM

السلام عليكم
واقف في كمين من الالف البعدي عليهم و انا راجع البيت....و العسكري شاف الرخص و قالي اتفضل و قام قايل لمحمدين يفتح الكمين علشان اعدي....سحب السور المتحرك ده علشان اعدي...و انا بعدي قرر ان كفايه عليه كده و راح زقه على ربع العربيه الاخراني!!!!!!!!!

نزلت اتفرج....يا سلام...يعني امبارح محكوك في الباب الشمال....انهرده اتخبط في الرفرف اليمين! معلش يا باشا و احنا بنقف كده للصبح و و و .......الحمدالله

معلش طولت الموضوع...سؤالي انا مأمن مع مصر للتأمين بس عمري ما اتعاملت و لا امنت اصلا على عربيه قبل كده....اه الاجراءات؟ ولا ملهمش دعوى طالما مش حادثه عربيه ولا اه؟ وانا ان شاء الله عايز اصلح خبطه في اليمين و حكه في الشمال....هشرح ازاي الموضوع ده؟؟

**dr_radioooooo** · 01-04-2011 10:27 AM

مصر للتأمين

ربنا يستر

**Salamonti** · 01-04-2011 02:09 PM

أنا ماتعاملتش مع مصر للتأمين قبل كده

بس نصيحة عامة..
أي شركة تأمين بيبقا فيها بند في الوثيقة يجبرك انك لازم تبلغ عن الحادث خلال فترة معينة من تاريخ وقوعه
الفترة دي بتختلف من شركة للتانية وغالبا بتكون من يومن لأسبوع كحد أقصى

مش دي المشكلة
المشكلة بقا انها بتطلب منك وصف تفصيلي للحادث وحصل ازاي وكده
وبعدين بيقارنوا اقوالك بتلفيات العربية
اذا وجدوا ان التلفيات غير منطقية ومش مطابقة للرواية بتاعتك بيرفضوا يعوضوك
يعني ماتبقاش انت بتحكي ان عربية خبطتك من اليمين وتكون مقدم في التلفيات تغيير مراية شمال مثلا !!

فأسلم حل للتعامل مع شركات التأمين هو عدم الوقوع في فخ الوصف التفصيلي للحادث

اللي باقوله دايما لما اروح للتأمين كالتالي:

ركنت العربية (في المكان الفلاني) بشكل عمودي على الرصيف وسافرت شغل ورجعت لقيتها مخبوطة كده
ربما بقا الناس اللي كانت بتركن علي يمينها وشمالها هما اللي خبطوها الله أعلم

**zico900** · 01-04-2011 03:29 PM

شكرا على النصيحه

هما ليهم دعوى بالحاجات الزي كده؟ زي الموقف البتكلم عليه ولا يقولك احنا مالنا انت مكنتش في حادثه؟ (لا قدر الله)

**WalidAdel** · 01-04-2011 03:34 PM

انا بتعامل مع شركة مصر للتامين و الحمد لله شركه كويسه و التعويض بيتصرف علطول لي في الحاجات الكبيره
الحوادث اللي بتعدي التصليحات 4 و 5 الاف جنيه بعيد عنك يعني
انا من راي لو الحادثه بسيطه بلاش تتعب نفسك و تروح و تيجي علشان 100 ولا 200 ولا حتي 500 جنيه
ولو هيا بسيطه توجهه لاي سمكري في الحرفيين هو هايعمهالك و خلاص لانك لو استفدت بالتامين في الحته دي السنه الجايه هايغلوا عليك او ممكن هو لما يشوفها بسيطه هايقولك بلاش احسن و اعملها بره
بالنسبه للاجرءات بقي
حضرتك بتعمل محضر تثبت فيه اللي حصل بالظبط و سبب الخبطه ايه و هيا واقفه مثلا او اي حاجه من دي
و بعدين بتروح التوكيل تعمل مقايسه هاتتصلح بكام الخبطه دي و تخالي التوكيل يبلغ شركة التامين بناءا علي البوليصه المقدمه من حضرتك
و شركه التامين تقوم بارسال مندوب المعاينه علاشن يعاين التلفيات و هايشوف المقايسه و ليه الحق في رفض اي حاجه مالهاش علاقه بالحادثه و بعدين بعد كله دا يمضي علي المقايسه بعد الرفض و كده و يقولهم اشتغلوا في العربيه
بعد ماتخلص العربيه حضرتك بتحاسب التوكيل علي التصليحات و نروح بالفاتوره للتأمين و تقدمها و تستني الشيك بقي لما يطلع بالفرق بعد خصم نسبة الاستهلاك بتاعة حضرتك
ارجوا اكون وضحتلك سبب انها لو بسيطه تعملها بره احسن