انا كنت نايم محستش بحاجه
عرض للطباعة
انا كنت نايم محستش بحاجه
محستش بيه من اساسه هو كان زى زلزال 92
انا اترعبت بطريقه (اصلي اول مره احضر زلزال / زلزال 92 كان عندي سنتين )
المهم كنت قاعد على الكمبيوتر و على نايل موتورز بالتحديد
فجأه لقيت ترابيزه الكمبيوتر بتتحرك قلت مش مشكله هي مش ثابته اصلا
و بعدبن لاقيت الكرسي كمان بيتهز قولت لالالالالا اهوه ده بقى ثابت يبقى فيه حاجه غلط
المهم قمت قايم بسرعه ووقفت في نص الصاله قعدت اتعجب و استغرب !!!!!!!!!!!
و فجأه لاقيت اخويا الكبير بيقولي تعالى اتفرج عليا و انا بلعب ميدل اوف اونور
اتاري محدش حس بحاجه في البيت قلت افتح الاخبار برضه ملقتش حاجه قلت يبقى تهيئات و انا اصلا من يومين كنت تعبان و عندي دوخه
جيت دلوقتي اكتشفت انه كان في زلزال قلت الحمد لله اني معرفتش ساعتها احسن كنت اتخض
الحمد لله
احساس ملئ بالخوف والرهبه الحقيقه
ربنا يسترها من توابع الزلزال اللي بيقولو عليها
انا كنت نايم وصحيت على الزلزال
حسيت ان حد بيمرجحني وانا نايم وكان احساس حلو قوي بصراحه . كنت مبسوط d:
بس الحلو مايكملش.. بعدها بشوية صحيت على صوت عربيتي وهي بتتخبط تحت @:
انا كنت مصرة ان الموبايل بيفايبريت ف الشنطة مع انه كان ف ايدي
كنت عالغدا كلهم قامو من عالتربيزة وانا ماسك سمكة مشوية. فقولتلها تعملي ميتة يقولو في زلزال هتتاكلي يعني هتتاكلي.
حسيت بيه من اول ما بدأ وعرفت إنه زلزال
كل العملته اني قلت لزوجتى لأنها كانت في المطبخ ومش حاسة بحاجة
طبعا طول الهزة استغفار وتسبيح
وعدت على خير والحمد لله
بالنسبة لزلزال 92 أو 95 بتاع 7 الصبح والبعديه فهو زلزال متوسط
(( الهم ارفع عنا الغلاء والوباء والربا والزنا والزلازل والمحن والفتن ما ظهر منها وما بطن ))
أنا بقى حكايتي حكاية ... كنت نايم وغاطس في سابع نومة وبحلم أني ماشي في الشارع وببص لفوق ليه مش عارف وأنا باصص مرة واحدة الدنيا غيمت غيوم كثيفة وأسمع أصوات أنفجارات مهوولة وأبص ورايا وألاقي الشوارع بتتفجر أنفجارات شديدة ومتتالية وبيخرج بحر من الأنفجارات دي مع نار كبيرة وهوب رحت ناطط نطة لازق في سقف الأوضة وطلعت أجري أقول يوم القيامة جه يوم القيامة جه ملقيتش مخلوق في الشقة قلت بس أنا مت وبتحاسب فين لحد مافقت من الخضة وأكتشفت لما كلمتهم أنهم برا بيشتروا حاجات .... الغريب بقى أني صحيت الساعة 3:30 دقيقة نفس اللحظة اللي أكتشفت بعدها بساعة تقريباً من المواقع أن كان في زلزال ساعتها أستغربت العلاقة بين الحلم والزلزال ( على فكرة كنت مستغطي كويس ) .
بغض النظر عن الهزار هي عظة وتذكره من ربنا أننا نتقرب اليه أكتر لأن ممكن في ثانية كلنا نبقى تحت الأرض اللهم ما أرحمنا برحمتك وأرفع مقتك وغضبك عننا يا أرحم الراحمين .