الموضوع: ثورة ضد قانون الأيجار القديم

لما حصلت الثورة فى حاجات كتيرة اتغيرت وفى حاجات هتحتاج وقت عشان تتغير بس اللى اتعلمته واتعلمه غيرى من الثورة ان محدش يسكت على حقه وعشان كده قررت وقرر غيرى من اصحاب المشكلة الكارثية المسماة بقانون الأيجار القديم اننا نعمل جروب على الفيس بوك وكمان نعقد اجتماعات نناقش فيها مشكلتنا قررنا مانبقاش سلبيين زى الأجيال الللى قبلينا اللى معرفوش يرجعوا حقوقهم على الأقل نسمع صوتنا للغير فقانون الأيجار القديم هو قانون اتعمل عشان ينزع ملكية المالك وحقوقه ويعطيها بالكامل على طبق من ذهب للمستأجر فى بداية القانون ده كان الكلام على انه قانون لصالح الطبقة الفقيرة من المجتمع على حساب الطبقة الغنية ولكن بعد مرور عشرات السنين وتغير المجتمع المصرى اصبح عدد كبير من المستأجرين من الأغنياء وميسورى الحال واصبح الملاك وابنائهم و احفادهم من محدودى بل بعضهم اصبح من معدومى الدخل فالمستأجر اصبح هو المتحكم يدفع جنيهات قليلة يورث الشقة لابنائه لا يوجد ما يجبره على دفع صيانة للعقار او اى مبلغ اضافى عن الأيجار فالمستاجر الأن من الممكن ان تجده صاحب املاك هو الأخر ولكنه لا يستغنى ابدا عن الشقة التى يدفع فيها قروش قليلة فربما يحتاجها يوما ما ولماذا يتركها فلا يوجد قانون او حتى زيادة فى الأيجار تجعله مضطر لتركها العجيب فى هذا القانون انه القانون الوحيد فى مصر الذى اجبر فئة معينة على تحديد أجر معين لا زيادة فيه اطلاقا ولم يترك حرية التسعير كما يحدث فى جميع انواع السلع او حتى يتيح لك زيادة سنوية وقد ساعد النظام السابق على تفاقم هذه المشكلة وذلك بسبب استفادته المباشرة من خلال اجبار مواطن على دعم مواطن اخر وعدم رغبته بمواجهة الرأى العام حتى عندما تم تعديل قانون الأيجار القديم سنة 1996 لم يتم عملها بأثر رجعى بل وتم العمل بقانون الأيجار الجديد الذى يتيح للمالك تحديد سعر الأيجار والمدة كما يشاء بدون وضع اى قيود عليه مما اسقط الحجة الواهية التى كانت الحكومة تتعلل بها وهى الغلابة ومحدودى الدخل من الشعب فانقسمت مصر الى جيلين جيل الناس الغلابة اللى مش لاقية تاكل ومتقدرش تدفع غير ال4 او ال5 حنيه الشهرية وجيل الشباب اللى بيدفع 700 جنيه والف جنيه ايجار جديد او يشترى شقة بمئات الألوف فهؤلاء الشباب يجب ان يعملوا ليدفعوا الأيجار الباهظ ام من تعود على دفع الملاليم لنتركه كما هو ولكن لن نسمح بذلك بعد الأن فنحن نرغب بالتغيير اتمنى وضع مقترحاتكم وكيفية العمل على تغيير هذا القانون الظالم

[justify]بصراحة و مع كامل احترامي لصاحب الموضوع ، فإن المكتوب بالموضوع بعيد عن الحقيقة و مليان مغالطات و فيه خلط بين ملاك اجبروا من اكثر من 50 سنة على تخفيض الاجارات و مد مدة الايجار و بين ملاك ( في فترة الثمانينات و ما تلاها ) اختاروا بكامل ارادتهم التأجير و ليس التمليك مع علمهم بقانون الايجار و اكثر من كده انهم و بالمخالفة للقانون اخدوا (خلوات رجل) و سلموا الشقق على الطوب و كتبوا بالعقود بأنها كاملة التشطيب و كانوا بيقبضوا الايجار من لحظة توقيع عقود الايجار بالرغم من ان الشقق مش متجهزة للسكن و لسه بالتشطيب ، و ان كنت بتطالب بالغاء قانون الايجار القديم ، فيبقى البديل هو تمليك المستأجرين الوحدات السكنية لانهم في الحقيقية دفعوا اكثر من ثمن الشقق اللي هما قاعدين فيها ( خلوات + تشطيب الشقة + الايجار طول الفترة السابقة + عدم تحمل المالك لاي صيانة بالعقار ) ، و ياريت بس الاخوة اللي بيلبسوا الموضوع رداء الدين يبطلوا علشان الملاك اللي انتوا بتتكلموا عنهم ما هماش ملايكة بل في كثير منهم جشعين فرضوا على المستأجر انه يتكفل بكل تشطيب بالشقة و يدفع مقدم و بالغوا بالايجارات لحماية نفسهم من اي تضخم بالعملة كل ده بالمخالة للقانون . ياريت شوية موضوعية لان الموضوع ده يمس شرائح كبيرة من الشعب ، و ما هواش لعبة .

[/justify]