الموضوع: انفراااد لنايل موتورز: أقوي وأدق تقرير مفصل عن مراحل شراء نيسان صني بالتقسيط ...!!!!

السلام عليكم ورحمة الله وبركاته
الحمد لله نحمده ونستعينه ونستغفره ونعوذ بالله من شرور انفسنا ومن سيئات اعمالنا واصلي واسلم وابارك علي سيدنا محمد وعلي اله وصحبه وسلم , أما بعد
الاول بس بطلب منكم محدش يقطع عليا الخط وانا بتكلم علشان عندي كلام كتير نفسي اقوله
ان شاء الله تعالي التقرير ده لأي عضو ان شاء الله ناوي يقسط ويشتري صني
الموضوع ده انا هاقسمه 4عناصر أو بالاحري 4 جهات لاستلام الصني

البنك الوطني للتنمية (بالتعاون مع مصرف ابو ظبي الاسلامي)
وينقسم الي:
-1- الاستفتاء عن البنك من الناحية الشرعية للتقسيط.
-2- احضار الاوراق الخاصة لتقديما للبنك.
-3- الاستعلام واحضار الموافقة.
-4- احضار وثيقة التأمين.
أستاذ أحمد مصطفي (Ahmed .Tv ) ومنتدي نايل موتورز
وينقسم الي :
-1- فكرة شراء نيسان صني واقناعي بيها .
-2- متابعته المحترمة والمتواصلة جدا مع عملاء اوتو ايجيبت للمساعدتي للحصول علي احسن عرض للصني.
-3- استلام الصني من معرض اوتو ايجيبت في مدينة نصر
-4- مقابلة ابو حميد الجميل في السبع وحضر معايا صيانة الالف.
معرض أوتو ايجيبت بكل فروعه ومهندسيه.
وينقسم الي :
-1- الاستقبال فوق الرائع عند حصولي علي عرض السعر للصني مانويل 2011
-2- حجز الصني بمواصفاتها المطلوبة من قبل خروجها من المصنع.
-3- توريد السياره للمعرض في وقت قياسي واعطائي بيانتها كاملة لوثيقة التأمين
-4- الاستلام في الوقت المحدد بدون تأخير وتسلمي العربية تفصيلا.
-5-التراخيص.
-6- مكالمات ما بعد البيع.
صيانة الالف ومركز الســـــــبع.
وينقسم الى :
-1- حجز الصيانة.
-2- يوم صيانة الالف.
-3- مكالمات ما بعد الصيانة.

صــور واوراق هامة
ينقسن الى :
-1- صورة وثيقة التامين
-2- صورة اوراق البنك
-3-صورة عرض السعر
-4- صور لبعض الهدايا

كان هذا ملخصا سريعا واليكم الان السرد التفصيل.....

البنك الوطني للتنمية (بالتعاون مع مصرف ابو ظبي الاسلامي):

الحمد لله هداني ربي لشراء سيارة زيرو بعد ما بعت البولو اللي معايا واكيد طبعا زيرو وفي الوقت الحالي =تقسيط
المهم بعد رحلة بحث شديدة مرورا ببنك فيصل وعبد اللطيف جميل وصلت للبنك الوطني للتنمية وسألأت عليه أحد الشيوخ المعروفين (أحسبهم علي خير) وافتي لي بجواز التعامل معاه لما له من شرعية اسلامية.
اتصلت بالبنك وسألتهم عن الاوراق المطلوبة لتقسيط سيارة زيرو (وتسمي في البنك عملية مرابحة سيارة) لأنها تقوم علي اساس تمويلي بالمبلغ المطلوب وبيأخذوا نسبة ربح علي المبلغ الممول علي عدد سنين التقسيط واقصاها 5 سنين .
وكان الاوراق المطلوبة لمقدم 40% او 50 % هي صورة البطاقة ووصل كهرباء حديث
والاوراق المطلوبة لأقل من ذلك صورة بطاقة ووصل كهرباء حديث و مفردات مرتب من العمل الخاص بالشخص المقدم علي المرابحة ولا يلزم ضامن.
نسبة المرابحة 8.5%-9.0% بضمان وديعة في البنك
9.0%-9.5% لو المقدم من 40%الي 50%
9.5%-9.8% لو المقدم أقل من 40 % .... (وطبعا يتم الرجوع للبنك للمتابعه)

1-3 قدمت الاوراق ومضيت علي اوراق الاستعلام الخاصة بيا في الشغل والمنزل (يعني يتم نزول مندوب للتأكد من البيانات انها صحيحة).
الاستعلام مدته 48 ساعه يوم للمتابعه في العمل ويوم للمتابعه في المنزل (ويوم المنزل مهم جدا يجب التواجد فيه ولو ليس نفس الشخص المقدم علي التقسيط).
انا شخصيا قابلت المندوب في العمل واخد صورة من بطاقتي وقابل المدير الاداري وسألوه عن نشاط الشركة ورأس مالها ... الخ.
وفي المنزل والدتي قابلته واخد صورة من بطاقتها وسألها علي وصل نور وخلاص.
وبعد الاستعلام تم الاتصال بي لإمضاء العقد وانهاء الاوراق المطلوبة وامضاء الشيكات الخاصة بالمرابحة واني وافقت علي المرابحة واوراق اخري وبعد ذلك يتم التعامل مع المعرض والبنك مباشرة.

1-4 كان التدخل مني من ناحية المعرض لمعرفة رقم الشاسية والماتور لاعطائهم لشركة التأمين لإنهاء الوثيقة المطلوبة للتأمين علي السيارة.
وتم احضار الوثيقة من شركة قناه السويس للتأمين بنسبة 3.2% من ثمن السيارة الاجمالي وبنسبة تحمل 4في الالف.واعطائها للمعرض .
وبكده تم انهاء الملف كامل في المعرض (الاوراق الخاصة بالمعرض من البنك + وثيقة التأمين + شهاده من مرور الدراسة برقم وشاسيه العربية للمرور اللي انا تابع ليه)....... ولم يتبقي الا تحديد يوم استلام العربية من المعرض.

أستاذ أحمد مصطفي (Ahmed .Tv ) ومنتدي نايل موتورز

احمد مصطفى -حسين جمال

2-1 أثناء تجهيز اوراق البنك كنت بدور علي العربية المطلوبة و الحمد لله رب العالمين بفضل الله تعالي نويت علي الصني بعد لف في المنتدي كتير واراء متفاوتة لكل ماركة مرورا باللوجان والبروتون والاوبترا .... حتي استقراري بفضل الله علي الصني ومساعدتي في الاختيار من قبل الاعضاء المحترمين وما لقيته من دعم من لديهم بكل ما تحتويه الكلمة ... مرورا بالمشاكل السمعية عن الصني (استهلاك بنزين- كنبة ضيقة – تقفيل مصري ..... الخ) وبفضل الله لم تسبب لي مشكله.

2-2 وكان من فضل الله عليا ان قابلت أ/أحمد مصطفي ووتوسمت فيه خيرا (احسبه علي خير ولا ازكي علي الله أحدا) و بدأ معي مشوار البحث عن افضل سعر للصني مرورا بالسبع واوتو ايجبت
و بتيسير الله رتبنا زياره لمعرض اوتو ايجيبت في فرع المهندسين وكان معي ا/أحمد مصطفى طبعا وقابلنا ا/عبد الخالق ... والحمد لله أخدت سعر ممتاز وهدية باركنج سينسور واعطيته اللون المطلوب والبديل له ان لم يوجد وكانوا في انتظار توريد العربية من المصنع وانهاء اجراءات البنك.

2-3 وقت الاستلام كان من فرع مدينة نصر وبلغت ابو حميد (أ/أحمد مصطفي ) انى حستلم يوم السبت واتفاجأت ان والدته كانت مريضة وانه مش قاعد في مدينة نصر ومع ذلك جزاه الله خيرا نزل معايا بدري علي معرض مدينة نصر وتم الاستلام علي خير.... واخذت هدية جميلة من أبو حميد (أ/أحمد مصطفي ) بعد ما استلمت العربية
وطلعت بعد كدا علي المرور علشان التراخيص وكان احمد بيكلمني وانا ماشي وطول اليوم علشان يطمن وصلت لايه.

2-4 وبعد ايام من الاستلام بكتير وبعد ما وصلت بالعربية 1340 كم .... وبتيسير الله اتفقت مع ابو حميد علي يوم علشان اروح اعمل صيانة الالف .... وطبعا كلم المهندسين اللي هناك علشان ياخدوا بالهم من العربية

معرض اتو ايجيبت بكل فروعه ومهندسيه

3-1 كما وضحت من قبل وكان ترشيح شرائي من أوتو ايجبت لانه بياخد اكبر نسبة توزيع للسيارت من مصنع نيسان وبكده يكون وقت التسليم قريب مش بعيد .
وفي المقابلة اللي قلتلكم عليها قابلنا ا/عبد الخالق في فرع المهندسين –قمة في الادب والاخلاق والاحترام وقابلنا بوجه مبتسم –
أحسبه علي خير ولا ازكي علي الله أحدا , وقعدنا نتكلم شويه عن النيسان عموما والصني خصوصا وماشاء الله عليه كان بيستفيض في الشرح لاي سؤال حد يسأله .
(انا بقي استغليتها فرصه روحت اخدت جوله في المعرض وقعدت في البلوبيرد والتيدا والاكس تريل والليفينا ... أنا هاشوفهم فين تاني )
المهم حضرلي عرض سعر بالصني مانويل بالABS وعملي خصم مميزجدا وهدية بارك سينسور وطبعا ده علشان نايل موتورز وأ/أحمد مصطفي .
وأخدت عرض السعر وطلعت بيه تاني يوم علي البنك لانهاء الموافقة.

3-2 المواصفات اللي طلبتها زي اللون مثلا كان الفيراني الداكن ومن جوه الفرش رمادي ... ومانيول وABS ... وفي ساعتها كلم
المسئولة عن استقبال السيارات للمعرض وهي كلمت المسئول في المصنع وعرفوا ان العربية بالمواصفات ديه موجوده وهتبقي في الشحنة اللي جاية للمعرض ان شاء الله.

3-3 يوم الخميس كلمني ا/عبد الخالق وقالي العربية هاتبقي موجوده الخميس بليل او الاحد علشان المصنع بيقفل السبت والورق بتاعها هايجي علي الاتنين او الثلاثاء لان الورق بتاع العربيات بيجي بعديها بيوم او يومين.
وعايز بس اقول على نقطة مهمة فعلا ودى الفرق بين الموزعين المعتمدين المحترمين واى معرض خاص
هنا العربية لما جتلى جات من المصنع على طول , مش مركونة عندهم فترة زى المعارض الخاصة ومتبهدلة فى التراب وكمان اهتمامه بيه بعد حتى ما اشتريت من عندهم فى اى طلب بطلبه منهم بينفذوه مش زى المعارض الخاصة اللى بيبع ليك ومش بيوريك وشه بعد كدا

3-4 الحمد لله اجراءات البنك خلصت يوم الثلاثاء تقريبا ومندوب البنك راح المعرض وخلص الورق مع المعرض وكان الاتفاق علي تحديد يوم السبت للاستلام.
والعربية كان في المعرض تقريبا وقتها , بس اجراءات البنك والوثيقة أخدت وقت زياده
*السبت 16-12-2010 كان اليوم الموعود لاستلام الصني بفضل الله , كنت في المعرض الساعه 10 الصبح وقابلت أ/أحمد حسن مهندس الاستقبال هناك اللى سلمنى العربية وبصراحة الناس بتوع نيسان قمة في الادب والاخلاق وشربت الشاي عقبال ما ابو حميد (ا/أحمد مصطفى) نورنا
*وبدا احمد حسن مهندس الاستقبال فى قراءة الضمان بتاع العربية وبتاع الكاسيت وبتاع البطارية وفهمني كل ضمان يسري ازاي ولا قدر الله يتعطل ازاي
ووصفلي أماكن صيانه نيسان المعتمده وأعمل ايه علشان افعل الضمان او لو عايز احجز صيانة.
*المهم خلصنا الامور الكتابية ديه وطلعنا نستلم العربية وا/عادل سعيد مدير المعرض كشف عليها الاول وعلي دهان العربية ودهان الكبوت والشنطة وكان مصر عشان يطمئن معايا ويطمنى ان الدهان تمام ومش فيه اى خدش
وبدأ ا/أحمد حسن يسلمني العربية من الخارج الي الداخل بدا يوريني المفتاح وبيفتح ايه ايه ووظائف زراير الريموت ايه وشلمني الشنطة والاستبن والعده والسنسور الركن والموتور بصينا عليه ووشرحلي ايه اللي موجود وايه الميه اللي ممكن ازودها وازودها منين وبعد كده دخلنا اعربية وشرحلي كل الزرير الموجوده ودراعات المساحات والنور والتكييف والادراج المختفة.
وبصيت على البطارية وبطيت على مياه الردياتير والاربة ومياه المساحة وكله تمام
الحمد لله استلمت العربية ودخلت مضيت علي استلام العربية وعلي استطلاع للخدمة المقدمة من اوتو ايجيبت ...
*واخدت الورق بعد كده وطلعت علي المرور وكان في مندوب تبع المعرض مستناني هنك علشان يخلص الترخيص واطلع رخصة العربية.

3-5 طلعت علي المرور وقابلت المندوب تبع المعرض وبدأنا في الاجراءات الفحص ثم ختم الطفاية مرورا بإنهاء التأمين الاجباري والفايل الخاص بالرخصة .
(طبعا انا روحت كام يوم بعديها علشان بتوع المرور الله يسامحهم وللعلم هي مرور السلام .. حسبي الله ونعم الوكيل)
وطلعت الرخصة واخدت النمر وخلص اليوم علي كده الحمد لله.(المصاريف كنت مسجلها بس نسيتها للأسف)

3-6 تاني يوم كلمت 16244 عشلان افعل الضمان واخد كود التفعيل .... واخدته تمام الحمد لله
ولغاية دلوقتي اتصلوا بيا 3مرات سواء من المعرض او نيسان المصنع علشان يعملوا استطلاع عن المعرض وطريقة الاستلام ولو في تأخير في الاستلام وكانت اخر مكالمة من يومين كده.
بعديها تقريبا باسبوعين كنت عايز اغير مكان السينسور علشان الشاشة مش باينة اوي ... اتصلت ب أ/عبد الخالق قالي ممكن تشرفني في معرض مدينة نصر وروحتله وقابلت ا/عادل سعيد وبصراحة نادي علي العامل اللي هناك وقله يغير مكانه ....... والمفاجأة
وانا بستلم العربية لقيتهم ركبوا ستاره علي الزجاج الخلفي وعليه كلمة (AUTO EGYPT) والتليفون بتاعها وحطولي شماسة في شنطة العربية.
والكلام ده حصل بعد ما استلمت العربية بحوالى 3 اسابيع تقربيبا , يعنى اهتمام بالعميل بعد البيع كمان
ودى حاجة بتميزهم فعلا

صيانة الالف ومركز الســــبع

4-1 الحمد لله العربية محترمة وبفضل الله راضي عنها وكانت عاملة 1340 كم تقريبا واتفقت طبعا مع ابو حميد (احمد مصطفي) علي ميعاد علشان يشرفني في صيانه الالف واعرف الدنيا ماشية ازاي واتصلت بيهم وحجزت الصيانة يوم السبت الساعه 3 عصرا
واتفقت مع ابو حميد وقابلته هناك

4-2 الحمد لله كنت هناك الساعة 2:40 تقريبا ودخلت قلتلهم علي الاسم ولقيت اسمي محجوز ... بعد كده قبالت مهندس الاستقبال(مهندسة رؤي) وقلتلها علي اللي لاحظته في العربية و اخدت الضمان وكود التفعيل وطلعت معايا تستلم العربية وسلمتالها.
وانا واقف قابلت م/محمد عمر (مدير صيانة السبع) ابو حميد عرفني عليه وطلبت منه طلب شخصي انه ينزلي الدبرياج حبة وبصراحة راح بنفسه يتأكد انه اتعمل وكان في كام ملحوظة (الشباك الخلفي بيصفر – غير تغيير الازيت وتربيط وغشيل العربية من بره ومن جوه _ وصوت الماتور كان عالى )

هما حطوا زيت شل 10000 = 3 لتر منفصلين 190 جنيه
فلتر بنزين = 50 جنيه
غسيل عربية =30 جنيه
ضريبة وكده =24 جنيه تقريبا
يعني اجمالي 300 تقريبا ......... إجمالي صيانة الالف .

*وكل ملاحظاتى اللى بشتكى منها اتعملت على خير
بعد تغير الزيت الاداء بقا افضل بكتير وصوت الماتور بقا اهدا من الاول وراح صوت التزيق من الزجاج واستهلاك البنزين بقا افضل من الاول بكتير والحمد لله

4-3 تاني يوم لقيت مكالمة من المركز نفسه واحده بتسألني عن العربية وهي كويسه معايا ولا لأ وهل قبلت مشاكل في الصيانة ولا حاجة ...... الحمد لله خلصت علي خير.

صــور واوراق هامة

عرض سعر اتو ايجيبت

اوراق المرابحة والبنك

اوراق وثيقة التامين

وفي النهاية
اشكر الله عز وجل علي تيسيره وكرمه وفضله انه كرمني بالعربية ديه وعرفني علي ناس محترمة جدا سواء كان في موقع نايل موتورز او نيسان بمعارضها او مراكز صيانتها

وأخص بالشكر واهديكم باقة من الورد تحية وتقدير لكل من :-

موقع نايل موتورز:

1-الموقع نفسه المحترم والناس اللي قائمة عليه بكل ود واحترام احسبهم علي خير ولا أزكي عي الله أحدا سواء في منتدي نيسان او غيره.
2- أعضاء نيسان المميزين في تعاملهم وتفهمهم للأي سؤال كنت محتاج اجابته بإجابة مفهاش خداع ولا أي حاجة.
3-أ/أحمد مصطفي ahmed.tv : (صديقي اللدود ) أحسبه علي خير ولا أزكي علي الله أحدا

الف شكر يابو حمييد علي المجهود والخدمات اللي عملتهالي وعلي تعبك معايا من اول الموضوع لغايه يومنا هذا ومع كل اعضاء المنتدي الكرام وفعلا الحمد لله اني اتعرفت علي شخصية محترمة وجميلة وتستحق الواحد يخدمها ويحبها من قلبه وبدون أي مقابل زي ما بتعمل مع الناس كلها شكرا جزيلا وربنا يرزقك الخير في الدنيا والاخرة وجزاك الله عنا كل خير.
البنك الوطني للتنمية:

أ/أحمد عادل ............... مسئول خدمة العملاء والمسئول عن المرابحة .
أ/محمد ممدوح ...........مدير فرع مدينة نصر.
أ/سلامة ..............مسئول خدمة العملاء
معرض اوتو ايجيبت:

أ/عادل سعيد ...................مدير فرع اتو ايجيبت مددينة نصر.
أ/عبد الخالق إبراهيم ......... مسئول مبيعات المستهلك فرع المهندسين.
أ/أحمد حسن .................. مسئول مبيعات المستهلك فرع مدينة نصر.
مركز صيانة نيسان (السبـــع):

م/محمد عمر ............. مدير الصيانة بالمركز
م/كريم أسامة ..........مهندس الضمان بالمركز
م/ رؤي ..............مهندس استقبال المركز.

شركة قناة السويس للتأمين:

أ/ أسامة صــــــــــلاح ............ مسئول المبيعات

واللي اللقاء في صيانة ال5000 ان شاء الله علي خير.
واتمنى ان التقرير يفيدكم

و أخر دعوانا
الحمد لله رب العالمين .. سبحان الله وبحمده ..
أشهد أن لا إله إلا أنت ... أستغفرك وأتوب إليك.