الموضوع: جوان المنافولد !!

المشاركة الأصلية كتبت بواسطة batviser

المانيفولد ملوش علاقه بالشكمان .... و الفرن ده حاجه تانيه غير المانيفولد ....

المانيفولد غالبا ما بيكون خلف الموتور .... و ده عباره عن المواسير الى بتوصل الهواء و البنزين الى الموتور .... و المانيفولد غالبا ما هتلاقيه متوصل بفلتر الهواء بواسطة خرطوم ... الخرطوم ده بيوصل بجزء من المانيفولد اسمه البوابه ... و ده الجزء الى بيتحكم فى كمية الهواء المطلوبه للموتور .... و ده عن طريق دواسة البنزين .... ايوه دواسه البنزين كل الى بتعمله انها بتحدد كميه الهواء الى داخله للموتور ... و على اساسها الكمبيوتر بيحسب قد ايه هيضخ بنزين جوه الموتور و ده عن طريق حساس ال tps ... الى بيقيس زاوية انفراج قرص البوابه و يبعتها للكمبيوتر .....
المانيفولد كمان بيركب فيه الرشاشات فى الانوس و جهاز ال egr .....

اما الفرن غالبا ما بيكون امام الموتور و غالبا ما هتلاقيه متغطى بصاجه مرسوم عليها يد و عليها علامه ممنوع .... يعنى ممنوع اللمس .. و ده لانه بيكون سخن جدا من شدة سخونة الغازات الخارجه من غرف الاحتراق فى الموتور ... و تحت الصاجه ديه فى مواسير على قد عدد غرف الاحتراق ... و واصله كلها فى بعضها على الشكمان .... و فى الفرن هتلاقى حساس الاكسجين ... و ده بيقيس نسبة الاكسجين فى العادم عشان يحدد جودة الاحتراق و بيبعت الاشاره للكمبيوتر علشان يحدد ان كان يقدم و لا يأخر كهربة الموتور عشان جودة الاحتراق تزيد و بالتالى كفاءة الموتور تزيد ....

وده بإختصار شرح لكل من المانيفولد و الفرن و اتمنى انى اكون افادتكم ...
و الله اعلم ...

انت راجل برنس تمام اوى بجد مكنتش فاهم اى حاجة وفهمت دلوقتى وشكرا اوى لكل الناس الى بتشارك بمعرفتها ومش بتتأخر بأى معلومة

الله ينور فعلا معلومات جامدة ومفيدة.
انا كنت في مرة عند الميكانيكي ووصل العربية بالكمبيوتر وبعدين راح نازل ولقيتة جاب مسمار برمة وحدة جلدة رفيعة كدة وراح حاطط الجلدة وسدها بالمسمار ولما سألتة هو كان في اية قاللي المنافولد الجلدة بتاعتة كانت مقطوعة.
ياسلام لو تفسير (وانا حاسس انها في الغالب اشتغالة علشان ياخد حق التوصيل بالكمبيوتر).