أجمل وأظرف الأمثال الشعبية ... شارك معنا

**kimo-nubira** · 14-04-2008 05:27 PM

شويه امثال شعبيه كده علي الماشي بس علشان خاطركم ...........

أخد ابن عمي و اتنشر عليه بكمي و آخد ابن خالي و اتنشر عليه بشالي

اجرى يا ابن آدم جرى الوحوش غير نصيبك يا ابن أدم لم تحوش

اخطب لبنتك و لا تخطبش لابنك

اربط البغل جنب الحمار ان ما تعلم شهيقه يتعلم نهيقه

اللى بيته من ازاز ما يرميش الناس بالطوب

اللى تجوز يوم الجمعة ما ينشفلهاش دمعة

اللى تخاف من العرسة ما تربيش كتاكيت

اللى تقول عليه موسى يطلع فرعون

اللى عاجبه من الكحل يتكحل و اللى مش عاجبه من البلد يرحل

اللى عنده عيش و بله عنده الفرح كله ( ده بقي بمناسبه طوابير العيش واللي بيحصل فيها ) ;) ;)

اللى فات مات و احنا ولاد دلوقت

اللى ما لوش كبير يشترى له كبير

اللى ياكل بالخمسة يلطم بالعشرة

اللى يخاف من العفريت يطلع له

امشى فى جنازة و لا تمشى فى جوازة

ان سرقت اسرق جمل و ان عشقت اعشق قمر

اللى ياكل على ضرسه ينفع نفسه

**د-احمد عبد اللطيف** · 14-04-2008 05:49 PM

المتعوس متعوس ولو علقوا على راسه فانوس
عاميه بت.... مجنونه والطرشه بتتصنت عل الباب
من امنك لم تخونه ولو كنت خاين
القوالب نامت والانصاص قامت
قالوا للحرامي احلف قال جالك الفرج

والتالي منقول من موسوعة الامثال الشعبيه http://amthal.m3loma.com/wasf_akwal.htm

أنا زي الساعة يوم أتكتك ويوم أهاتي ويوم أروح للمصلحاتي
أنا وأنت زي عمي شرشر أنا أغسل وهو ينشر
الحر من غمزه والحمار من رفسه
الذوق عطيه ما هو لقية
القمحية فرايحية والسمرة قمرة والبيضة صيده
الكبر فضاح يجي في الركب ويقولوا رياح
الكبير لما يتدلع زي الخشب لما يتخلع
المليح مليح لو قام من النوم والقبيح قبيح لو غسل وجهه كل يوم
المرضان من وجهه يبان
الناس في الناس والعنز في النفاس
الناس طبائع فيهم وديع وطائع وفيهم وضيع وضائع
الواشي زي الراشي كله عنده ماشي
اليد زي الريح تسر وتغدر وتداعب وتلاعب وتبطش وتقتل
اللي ما ينام في القيلوله يا جني يا ولد غوله
بيضة زي اللفت ولما شفتها قرفت
بابهم كبير وعقوده حمر ومن جوته شيء يقصف العمر
بلاد بني حسن ماء وخضره ووجه حسن
ثيابه مصقولة وجيوبه منخولة
حبله ومرضعه وجاره وراها أربعه وطالعه الجبل تدور دوا للحبل
خواتم مليحه في ايد قبيحه
رجعت حليمه لعادتها القديمه
رأسه يلف وعينه ترف وعقله راح يخف
رأس يبغاله دق بالمهراس
زي أبو نواس لا يرقد ولا يرقد الناس
زي عم مرزوق يحب العلو ولو على خازوق
زي البرشومي سهل أكله وصعب خروجه
زي الثومة حلوه ومذمومة
غضب المرأة زي الحريقة ينطفي في دقيقة
في السوق ديوك وفي البيت ملوك
ما يجيك الغنج الا عند الحمير العرج
ماهو كل مدردم بدنجان
يخلق من من الطين قلل ومن الاوادم علل
ياما تعيش وياما تشوف حتى الرجال تحني الكفوف

**د-احمد عبد اللطيف** · 14-04-2008 05:56 PM

بعض الامثال من الشعر العربي

بعض الناس مثل التاج تلبسه وبعضهم كقديم النعل ترميه

عيد باي حال عدت يا عيد (المتنبي)

كل ابن انثى وان طالت سلامته يوما على الة حدباء محمول (كعب بن زهير)

ويعني ان كل مولود مهما طال عمره سيموت ويحمل على الخشبه ليدفن

ومن الاقوال البليغه في الشعر
طرقت الباب حتى كل متني فلما كل متني كلمتني
ويعني طرقت الباب حتى تعب ذراعي فلما تعب ذراعي كلمتني اي رد على

**ابو سيف** · 14-04-2008 06:46 PM

المشاركة الأصلية كتبت بواسطة aif

يا سلام ... ولنعم الإمثال .... وعاوزيننا نقعدلكم في الدار ... إنسو ... ربنا يخليلنا النت ... انا بقي ح اخترع مثل مخصوص للرد علي هذا المثل الكيكذوب الهيكذوب .. علي رأي سبعاوي

خدي عندك المثل دة :
القعدة علي النت أحسن من 100 ست :D

هأوأوأوأو

هههههههههههههههههههههه على طول جاهز يا ابو ابراهيم
احب انا الرجاله اللى رافعه لواء الدفاع دة
و مستنيتش جيبت المثل اللى يرد وقتي

**emadkamel** · 14-04-2008 07:11 PM

قليل الأصل لا تعاتبه ولا تلوموا ، ده زي البقعة اللي لا تطلع برابسو ولا بأومو .

لا تصاحب الأقرع ولا تأخذ منه نصيحة ، لو ربنا يحبه كان خلاها له صحيحه
(مع كل الاحترام لاصحاب البشره "اللميعه" :):)

**Chicco** · 14-04-2008 07:13 PM

مثل من تأليفي مقتبس من "اللي يعيش ياما يشوف "
"اللي يسافر ياما حيشوف و اللي حيقعد في مصر حيشوف أكتر "
مثل مقتنع بيه مؤخرا
"اربط الحمار مطرح ما يحب صاحبه"
مثل باحبه
"اللي مكتوب على الجبين لازم تشوفه العين "
مثل بيضحكني
" قالوا لجحا فين بلدك قال اللي فيها مراتي "
مثل بليغ
" من بره هلا هلا و من جوا يعلم الله "
:):)

**emadkamel** · 14-04-2008 07:34 PM

المشاركة الأصلية كتبت بواسطة Chicco

"اربط الحمار مطرح ما يحب صاحبه"
:):)

تعديل بسيط.... اربط الحمار مطرح ما الحمار (التانى) يقول

جوزناها علشان تتاخر راحت وجابته راخر: محبة الاهل والتكافل الاجتماعى

وشها سجن وقفاها مستشفى: كتييييييييييييير قوى بالشكل ده

لو النخله بتطرح ودع كانت أمريكا خلفت جدع: اكبر صح

ما تبان البضاعة إلا بعد الحمل والرضاعة: يعنى برضه مافيش فايده .... ولا خطوبه ولا بتاع

حط راسك بين الرؤوس وقول ياقاطع الرؤوس: !!!!!

قليل البخت يعضة الكلب فى المولد: :):)

إن قابلك الأعمى كل عشاه أنت مش أرحم م اللي عماه: يعيش على هذا المثل ما لا يقل عن 50% من المصريين (طبعاً العمى هما الـ 50% التانيين)

اللي معاه أمه .. ما تحمل همه: اكتر مثل حاسس بيه

**TaoTao** · 14-04-2008 08:56 PM

المشاركة الأصلية كتبت بواسطة mohamed_88sk

الحظ لما يأتي يخلي الأعمى سعاتي....

على ماقد ماهو مثل ظريف وفيه سخرية جامده ..
بس للأسف السخرية دي على توزيع الأرزاق وللأسف تأخد علينا (المصرين) حكاية الأمثال اللي تصطدم بالعقيدة..

اصطدام بالعقيدة؟؟ !!!!!!!!!!!!!!!!!!!!!!!!!!!!!!
لما الأعمى يبقى ساعاتي ده يبقى اصطدام بالعقيدة؟؟ !!!!!!!!!!!!!!!
يانهار أبيض (مش أي لون تاني احسن اطلع ملحد)
طب بص حواليك كدة وشوف كام أعمى حواليك شغالين جواهرجية مش مجرد ساعاتية (بس دول وصلوا لكدة بالقرع مش بالحظ)
يا جماعة الأمور المفروض تتحط في إطار مظبوط ماتتضخمش كدة

طب خد دي "في بلاد العميان .. يصبح الأعور ملكاً" وده مثل أفرنجي متعرب وفيه قصة جميلة جدا (أظن كتبها جول فرن أو هـ جـ ويلز) بتدور حوالين الحبكة دي.

**TaoTao** · 14-04-2008 09:05 PM

فيه مثل كانت بتقوله زوزو نبيل في مسلسل ""عائلة شلش" وأظن إنه من تأليفها بس ظريف:
اللي ربى ابنه عارف لِعْبُه ..واللي عامل عملية ريحته بنج" :)

**TaoTao** · 14-04-2008 09:13 PM

فيه الأظرف من المثل القصة اللي ورا المثل، أذذكر قصة مثل "وراه لايرقد"
وهي عن سيدة في الريف لديها ابن كسول جدا ويدعي المرض، فتضطر دائماً لحمله في مشنة على رأسها، وفي يوم رآها شيخ الغفر في السوق وسألها عن قصة هذا الغلام فقالت له "أنه مريض ولا يستطيع المشي وقد حار الأطباء في علاجه"، فقال لها "لدي علاجه، نزلي المشنة"، وما أن أنزلتها حتى انهال عليه بالخرزانة فقفز الولد من المشنة وانطلق يعدو فما كان من أمه إلا أن قالت لشيخ الغفر "وراه لا يرقد" أي كمل ضرب بلاً من أن يرقد مريضاً مرة أخرى. :)