الموضوع: رابطة ملاك الكيا برايد - كلاكيت تانى مرة!

موضوع بجد رائع يا موهاكى وبجد انت ليك حق العربيه ده عربيه محترمه اوى وجميله انا بقى ابوى الله يرحمه كان جيبه 1999 جديده وهى معايا انا حاليا عربيه موفره بتستحمل انا اشجع على هذا الموضوع الرائع بس انت قلى اعمل ايه وانا تحت امرك لانى انا جديد فى المتده ده
ولتانى مره بشكرك يا موهاكى وبالتوفيق

نبدأ بتجربتى مع العربية من موضوع سابق

أنا معايا كيا برايد 96 هاتش باك 1100 سى سى والعربية كويسة معايا والحمد لله حتى انى فكرت فى وقت من الاوقات لما اغير اجيب السيدان منها اللى هيا 1300 سى سى بإذن الله .

بالنسبة للبنزين العربية يادوب بتشم بنزين هى المفروض بتعمل من 5.5 إلى 6 لتر فى ال 100 كيلو لو ماشى طوالى وحوالى 7 لو ماشى فى المدينة ، ممكن تمشى العربية ببنزين 80 عادى خالص بس من حين لاخر ابقى حط 90 علشان تفوق العربية لان كتر ال 80 بيخليها تسقف وسحبها بيبقى زفت ولو مشيتها على 92 زى ما أنا عامل حتلاقى عربيتك جراية بشكل غريب ، قطع الغيار رخيصة جدا يعنى لو اشتريت العربية وغيرت طقم السيرفس حاتصرفلك بتاع من 200 إلى 350 جنيه أول عن اخر ويمكن أقل كمان كمثال سير الكاتينة ب 45 جنيه سير الدينامو ب 15 جنيه فلتر الهواء 20 البوجيهات 35 المساعدين صينى ب 290 والاصلى ب 400 تيل الفرامل القدمانى ب 45 والخلفى ب 60 طقم الدبرياج كله على بعضه يعمله بتاع 350 والطنابير بالبلى بالتيل الخلفى يعملوا بتاع 300 جنيه الفانوس الامامى أو الخلفى ب 70 جنيه وفانوس الاشارات ب 15 جنيه وعامة قطع الغيار متوفرة فى شارع دمشق عند الجندى وده احسنهم وعند حلمى سليمان فى التوفيقية ، العربية سهلة فى الميكيانيكا فمش محتاج حد مخصوص بس ماتعملش زيى وتروح لاى حد لانى اتلسعت فى الأول مع ميكانيكى مابيفهمش بهدلى الدنيا ولعبلى فى التاكيهات والكربراتير وخربلى الدنيا وكرهنى فى العربية حتى انى نزلت اعلانات لبيعها وحتلاقيها هنا بس ربنا كرمنى بواحد تانى رجع ظبطلى الدنيا كلها وساعتها حسيت بقيمة العربية .

العربية واسعة من قدام وورا يعنى أنا طويل شوية 183 وبرجع الكرسى لورا وعلى الرغم من كده اللى بيقعد ورا لو طوله عادى بيبقى مش محشور بل لو الكرسى اللى ورا راجع سنة ممكن واحد طويل يقعد ودى أنا جربتها بنفسى ولقيتنى قاعد مرتاح ورا ، العربية عريضة شوية عن الاونو فده بيديها ثبات احسن بس هى برضو ما تصنفش من الانواع الثابتة على الارض يعنى ماتتهورش وتزيد عن 100 العربية أنا جيبت بيها مرة 140 من قبيل التجربة وماكررتهاش تانى بس كتير كنت بامشى بيها على 120 ده ايام الشقاوة ، العربية عالية عن الارض وعمرى ماحكيت فى اعلاها مطب حتى لما كنت محمل العربية على اخرها وفيه تلاتة على الكنبة ورا برضو ما بحكش لان العربية عالية فعلا ، العفشة ناشفة شوية فأى هبد أو تكسير فى الأرض حاتحس بيه جوا ، ابعاد العربية كويسة جدا سواء من قدام أو ورا فسهل تحفظه بسرعة ، بالنسبة لاعادة البيع العربية بياعة ولو حبيت تبيعها الف من تلاقيه يشتريها على سبيل المثال أنا لسه من قيمة اسبوع لقيت الكهربائى بيسألنى لو عايز ابيع العربية

عيوب العربية أولا مافيهاش باور فبتعذب عذاب السنين فى الركن ثانيا مافيهاش تكييف فبتسلق جوا العربية ودى حاجة مرتبطة بفترة الصيف ثالثا الصاج خفيف شوية والعربية بوجه عام خفيفة يعنى لو ماشى على 80 أو 90 وجت من جنبك عربية ماشية على سرعة كبيرة أو نقل حجم كبير تحس ان الهوا بيهز العربية رابعا الشنطة تعتبر مفيش علشان هاتش باك خامسا المرايات الجانبية ثابتة مابتتقفلش فاللى رايح واللى جاى بيلطش فيها بس هى والحق يقال ناشفة قوى كذا مرا تتخبط المرايات منى خبطات جامدة ولا كأن حاجة حصلت اصلا .

أنا جيبت العربية وهى عاملة 170000 الف كيلو وفيه ناس حذرونى منها لان الموتور كده خلاص فى اواخره وكلام من ده بصراحة العربية كسفتهم كلهم وعمرها ما قلت بأصلها معايا ولا وقفت فى طريق وصوت موتورها لسه كويس على الرغم من عدد الكيلومترات الكتير بل وساعات بتجرى معايا جرى بابقى مستغربه من عربية 1100 وعلشان هيا مراعيانى أنا كمان براعيها وبحس ان كل قرش بصرفه فيها مش خسارة .

المشاركة الأصلية كتبت بواسطة johnghaly

موضوع بجد رائع يا موهاكى وبجد انت ليك حق العربيه ده عربيه محترمه اوى وجميله انا بقى ابوى الله يرحمه كان جيبه 1999 جديده وهى معايا انا حاليا عربيه موفره بتستحمل انا اشجع على هذا الموضوع الرائع بس انت قلى اعمل ايه وانا تحت امرك لانى انا جديد فى المتده ده
ولتانى مره بشكرك يا موهاكى وبالتوفيق

يامرحب بيك يا جون فى الرابطة عايزك تنقلنا خبراتك واللى شوفته فى العربية يعنى ايه المشاكل اللى قابلتك وايه المميزات والعيوب فى نظرك قطع الغيار بتجيبها منين واسعارها عايزك تنقلنا كل اللى تعرفه وشوفته من العربية علشان نعرف ايه العيوب المشتركة وابه افضل الحلول علشان نسهل على الناس

محلات قطع غيار الكيا
1- الجندى وده من افضل الناس وبيقولك وهو بيبيع ده اصلى ولا تقليد والمنشأ منين وليه كذا فرع واحد فى شارع دمشق وفيه فرع تانى فى جسر السويس قدام فندق السلام تليفونه 24516008 - 0123916567

2- حلمى سليمان مكانه فى التوفيقية هو على الشارع من برة قدام سنترال رمسيس علطول تليفون 25742326

3- سامى وكرم على نفس ناصية حلمى سليمان كانك رايح ناحية ميدان رمسيس قدام مستشفى الهلال الأحمر تليفون 25783118 – 25791742

4- بيبو مكانه فى معروف قدام ناصية أبو طارق بتاع الكشرى

المشاركة الأصلية كتبت بواسطة almohake

محلات قطع غيار الكيا
1- الجندى وده من افضل الناس وبيقولك وهو بيبيع ده اصلى ولا تقليد والمنشأ منين وليه كذا فرع واحد فى شارع دمشق وفيه فرع تانى فى جسر السويس قدام فندق السلام تليفونه 24516008 - 0123916567

2- حلمى سليمان مكانه فى التوفيقية هو على الشارع من برة قدام سنترال رمسيس علطول تليفون 25742326

3- سامى وكرم على نفس ناصية حلمى سليمان كانك رايح ناحية ميدان رمسيس قدام مستشفى الهلال الأحمر تليفون 25783118 – 25791742

4- بيبو مكانه فى معروف قدام ناصية أبو طارق بتاع الكشرى

أضف على ذلك رسلان في الحي السابع امام أبو رامي

ايوه كده ملاك البرايد بدأوا يهلوا يا مرحب بأبو صلاح

ملحوظة كان فيه حد فى الرابطة القديمة ذكر اسم تاجر فى الوكالة بيبيع حاجات الكيا استيراد ياريت نلاقيه تانى

تمام اوى يا ابو صلاح ويا الموهاك العربيه فعلا عمليه جدا وبتستحمل والبنزين قليل وكمان فى فرع للجندى هو كان قايلى عليه فى مدينة نصر واسف انى معيش رقم التلفون بس ممكن اجيبه وفى فى شبرا كمان فى شارع مسره واحد اسمه مينا بردو زى الجندى بس ممكن يكون اغلى شويه بس القطع بتبقى مضمونه فعلا وتلقى عندو كل اللى انت عايزه
زى ما قلت قبل كده احنا كنا جيبين العربيه زيرو ومش بمشى بيه كتير يعنى عامله بتاع 59 الف كيلو من 1999 وانا عن نفسى الحمد لله لغاية دلوقتى العربيه معملتهاش معايا وبكتب بس السيرفيس ومتابع ودى اهم حاحه فى العربيات عموما بس بصراحه مشكلته الوحيده اللى بتوجهنى فيه المشكله بجد الوحيده الشنطه صغيره وبسافر بيه ومش بتكفى شنطتين كبار حتى انا عن نفسى مش لاقى فيه عيب غير موضوع الشنطه وبردو ساعتها مجبناش السيدان عشان كانت تجميع مصر والهاتش باك كانت تجميه كوريه ففضلا التجميع الكورى احسن بس ومتابعين مع بعض يا شباب

أنا فعلا بعانى من مشكلة الشنطة دى علشان كده فكرت فى انى اركب البارين اللى بيبقوا على سقف العربية بالطول وممكن كمان تركب عليهم بارين كمان بالعرض وحيبقى شكلها النهائى عامل زى شبكة التاكسى بس على شكل افضل شوية ، عايز ابقى اسأل على البارين دول فى التوفيقية علشان اعرف تكلفتهم تعمل كام