الموضوع: الي كل خبراء الفيرنا.....هو ايه اضرار البنزين 80 ؟؟

موضوع ان ال80 فيه شوائب دة مش صح... الرقم دة بيدل على قابلية الوقود للاشتعال عند ارتفاع الضغط و كل ما الرقم ارتفع كل ما قلت قابلية البنزين للاشتعال تحت ضغط... اذا معنى كدة ان الرقم ملوش اى علاقة مدى نقاء او تلوث البنزين

موضوع النضافة بيرجع للمحطة... يعنى ممكن تخش محطة لسة معمولة جديد او متجددة و تفول 80 و الحياه تبقى زى الفل... و ممكن تخش محطة جربانة تحط 10 لتر 95 و يبقى نصهم كلاب ميتة

و قياسا على كدة نعرف ان قصة "بنزين 80 مينفعش للعربيات الانجكشن" برضة مش صح لان مفيش علاقة بين قابلية البنزين للاشتعال تحت ضغط و بين نظام التغذية بالوقود فى المحرك

طيب امال يفرق فى ايه 80 ولا 90 مع الموتور؟؟؟

يفرق فى نسبة الانضغاط... موتور العربية بيضغط خليط الهوا و البنزين قبل ما شرارة البوجية تحرقة... كل ما كانت نسبة الانضغاط دى عالية كل ما كان لازم الموتور يستخدم بنزين برقم اوكتين عالى (مقاومة اكبر للاشتعال نتيجة الضغط)

عادتا ما بتبقى العربيات الحديثة نسبة الانضغاط فيها عالية و دة بيحتاج بنزين باوكتين عالى... يتصادف دة مع كون العربيات الحديثة انجكشن... بس طبعا احنا عرفنا ان دة مش السبب فى اختيار درجة اوكتين البنزين

طيب يحصل ايه لما الواحد يحط بنزين باوكتين اقل من المطلوب؟؟

البنزين حيشتعل لما ينضغط و دة حيحصل قبل ميعاد الشرارة الصحيح بالتالى بدل ما القوة الانفجارية حتزق البستم لتحت عشان تولد قدرة تحرك العربية... القوة الانفجارية حتقاوم حركة البستم لفوق و تصتدم بيه... و دة سبب صوت التسقيف لان عمليا الموجة الانفجارية بتصدم البستم و هو بيتحرك من تحت لفوق و دى عملية مدمرة للبساتم

mmamdouh

تسلم ايدك علي المعلومات القيمه يا هندسه ... بجد انت جبت المفيد ( ما قل ودل )
احب اوضح نقطه بسيطه معروفه لناس كتير بس عشان متعلقه بالموضوع حابب افكر الناس بيها
ان لو المحرك نسبه الانضغاط فيه عاليه و بيشتغل بنزين 92 و ان عايز تحطله 80 و تطلع بأقل الخساير
انك تعمل كده :
1- توطي كهربه العربيه ( من الاسبراتير ) او بمعني ادق تبطأ شراره الاشتعال
2- تحط منظف دوره البنزين بالعبوه الصفرا اللي بتتباع ب 10 جنيه كل مره تغير فيها فلتر البنزين
3- يفضل استخدام بوجيهات 3 شمعه لتحسين الاداء ( بس ممكن تعلي صوت الموتور شويه )