الموضوع: مازدا 3 بتكنولوجيا سكاي أكتيف ، هل ستنزل في مصر قريبا ؟

موقع مازدا غير عنوان الصفحات اللي فيها معلومات عن المضوع ده ، والروابط الجديدة هنا :

MAZDA: SKYACTIV TECHNOLOGY | Mazda Spirit

موضوع جامد. أنصح أي حد ناوي يشتري مازدا بالأنتظار لحد ما موديل 2012 ينزل. بالذات إن موديل 2011 مافيهوش ولا ميللي زيادة عن 2010 وزايد حوالي 8 آلاف جنية.

يا جماعة أنا لما شفت الفيديوهات دي ... انا احترامي لمازدا زاد اكتر ... مشاءا لله العربية دي بجد تحفة تحفة تحفة !!!
من كتر انشغالي بالموضوع دورت على النت لحد ملاقيت فيديوهات بتشرح تكنولوجيا سكاي اكتيف وبتوضح ايه الفكرة ورا كل تعديل وتطوير هايدخلوه على مازدا 3 في موديل 2012 ، الناس دي ماسابوش فسفوسة في العربية ماظبطوهاش اكتر ماهي أصلا مظبوطة ، ولا تقولي فلوانس ولا كورولا وللا لانسر ، مع احترامي للجميع ، الناس دي محترمين انهم مسكوا العربية كأنهم بيبنوها من أول و جديد وظبطوها أحلى تظبيط، هاتوا فيشار و طفوا النور ... وركزوا مع كل فيديو :

1- محرك بنزين بأعلى نسبة انضغاط في سوق السيارات في العالم (14:1) يعني كفاءة واستهلاك وقود افضل:

YouTube - SKYACTIV-G (Gasoline Engine) —A Technical Explanation by one of Mazda's Engineers—

2- صندوق نقل الحركة\السرعات الأوتوماتيك (6 سرعات مع تقليل تأثير نقل الحركة بالزبت لإضفاء احساس واستجابة نقل مماثلة لناقل الحركة اليدوي):

YouTube - SKYACTIV-DRIVE (Automatic Transmission) —A Technical Explanation by one of Mazda's Engineers—

3- نظام التعليق والشاسية والحفاظ على عامل المنافسة لدى مازدا أمام مثيلاتها في السوق وهو المتعة في القيادة (agility , handling and driving characteristics to be fun to drive zoom-zoom):

YouTube - SKYACTIV-CHASSIS —A Technical Explanation by one of Mazda's Engineers—

4- تعديلات مدروسة في جسم العربية لزيادة مقاومتها للصدمات مع تخفيض وزنها في نفس الوقت :

YouTube - SKYACTIV-BODY —A Technical Explanation by one of Mazda's Engineers—

ياترى الكلام ده كله هاينزل عندنا مصر في أول 2012 زي بقيت العالم ولا لأ ؟؟؟

تسلم إيدك يا MazdaFan على الفيديوهات التوضيحية الجامدة دي. أكيد حتنزل ف 2012. دي أساسيات عربية مش كماليات. بس الخوف إن غبور يرفع سعر العربية جامد.

المشاركة الأصلية كتبت بواسطة dr.amr

المازدا من اكثر العربيات المظلومه في مصر للاسف
معتقدش هنزل عندنا
انت كده خليتني اندم اني جبت اللي معايا وماستنيتش ده :)

انا بعت ايميلات لتوكيلات مازدا في دول الخليج ( السعودية و الكويت) من على موقعهم على الإنترنت ، وبعت برضوا لغبور عندنا في مصر اسألهم على التكنولوجيا دي هتنزل عندهم او عندنا في مصر وامتى؟ غبور لسه ماردش عليا (معرفش ممكن يرد أصلا ولا لأ :) ) ، لكن توكيلات السعودية والكويت ردوا عليا وقالولي انها هاتنزل وكانت الخطة إنها تنزل في حدود شهر 6 او 7 في 2012 ، لكن بعد أحداث الزلازل في اليابان قالولي ان احتمال "كبيـــر" الموضوع يتأخر عن كده كمان ويتأجل لآخر 2012 او حتى 2013.

يبقى مافيش ندم ولا حاجة ، ماحدش اشترى العربية دي ايا كان موديلهاوسمعت انه ندم أبدا ، وماكانش ينفع تستنى اصلا :) انا والله لولا اني كانت الفلوس مش مظبطة معايا ( ولسه مش مظبطة لحد دلوقتي ) والله كنت اشترتها وششششششششششششش ، ربنا يباركلك فيها ويسعدك بيها ويرزقك خيرها ويكفيك شرها :)

انا أصلا شكلي مش هاستحمل استنى المدة دي كلها وهاشتريها قريب ان شاء الله ...لأن بردو كل تكنولوجيا جديدة بتنزل بيكون طبعا في احتمالات وجود أخطاء وعيوب عبال ماتتصلح وتتظبط تاخدلها كمان سنة او اتنين يعني على 2014 او 2015 كده تكون اتظبطت ، مافتكرش ان حد "محتاج" عربية هايستنى كل ده ، بالإضافة كمان ان تمنها ممكن يكون غالي جدا ساعتها ...

بس برضوا عايزها تنزل عشان اشوف حد اشتراها واخدها منه لفه