كميه مشاكل لا حصر لها في عربيتي الحقوني لحسن اخد العربيه و اعمل مظاهره

السلام عليكم و رحمه الله و بركاته
اخواني الاعزاء
الموضوع مش هقوله باختصار و لا هتكلم و انجز
لا هتكلم واحده واحده لاني متغاظ و عاوز اوصلكم المعلومه علشان تفيدوني
عربيتي بيجو 305
عملتلها عمره كامله
و طبعا علشان فك و تركيب الموتور اكيد في اسلاك مركبتش و شيء من هذا القبيل
المهم بعد يوم من استلامها لاحظت الاتي
1-بتغيب اوي في الدوارة
2-عداد الحراره و عداد البنزين مش شغالين
3-بقي و ده المهم و اللي خانقني لمبه الدينامو شغاله علي طول
قلت يمكن الدينامو مش واصل
دورنا العربيه و فكينا كابلات البطاريه لقيتها دايره
يبقي الدينامو شغال
قلت يبقي البطاريه
شحنتها علي التونجر و شغلت العربيه بردو نفس الشيء
انا متغاظ و مخنوق و قرفان
علشان العربيه صرفت عليها جامد و مش عارف اعمل ايه
و ان شاء الله النهارده هنوديها لكهربائي يشوف شغل جلا جلا اللي فيها ده
و عاوز معلوماتكم تدونا فكره عن الفروق بين البطاريه السائله و الجافه
مميزات و عيوب و كمان اسعار
الف الف شكر انكم استحملتوني

السلام عليكم....

بتغيب في الدوار بتهيالي مأخره كهربا...وبتهيالي الميكانيكي المسؤول عن الموضوع ده بس انت هاتروحله هايقولك بعد ما تخلص

تلين هاتيجي هاظبطلك التكهات والكهربا... والله اعلم.

موضوع امبير الحراره..في حساس راكب ع المكنه بيكون طالع منه فرده رايحه ع الطابلوه,الاسسلام المقطعه عندك في الحوض

امسكها واحد واحد ولمسها ارضي يعني في جسم العربيه..وانت فاتح كونتاك لما يتحرك الامبير اعرف ان هو ده السلك اللي المفروض يركب ع الحساس بتاع الزيت اللي في المكنه

امبير البنزين ملوش دعوه في الحوض خالص .. بس يمكن واحد كهربا من الحوض والاسلاك مقطعه

لمبة الدينامو منوره علي طول...بص ع الدينامور من ورا في فردتين او تلاته المهم في واحد كلبسه صغير,امشي معاه من الدينامو وشوف رايح فين لو مقطوع او مش راكب مكانه في الدينامو اللمبه تنور.. ده ي حالة ان الدينامو شغال...والمفروض الفرده دي راجعه ع لمبة الطابلون المنوره.والله اعلمـ


تحياتي لك


انا خدت بالي دلوقتي انك كاتب رايح للكهربائي...ان شاء الله يكون كلامي صح.ولو عايز كهربائي كويس عندي واحد استاذ وعنده ضمير ونضيف...في عين شمس الشرقيه شوف لو يناسبك انا تحت امرك اوصفلك هو فين او ابعتلك رقمه

اجرب و اقولك

ان شاء الله خيرـر...

طل الميكانيكي لما ركب الموتور عكس الكتاوت فاتحرق و حرق كتاوت النور و الكلاكس
و ركبنا من فضل الله كتوت تاني و اشتغلت
بس المشكله ان الدراع اللي فيه النور و الاشارات و الكلاكس شغال بمزاجه شويه يشتغل و شويه لا