الموضوع: زيارتي الاولي لتوكيل بروتون و خبر عن بيرسونا اليجانس

السلام عليكم

امبارح و بعد تفكير عميق و اقتناع شبه تام بجين 2 و بيرسونا قررت اني اروح التوكيل في طريق مصر اسكندرية علشان اشوف و اعاين الجين 2 و البيرسونا حتي يصبح اقتناعي تام و دا كان اول لقاء مع الاسود.

قابلت الرجل المحترم الخلوق استاذ محسن صالح مدير المبيعات و بصراحة استقباله لجميع العملاء ممتاز حتي و هو مشغول جدا بيحاول دايما يرد علي كافة الاستفسارات و التساؤلات جزاه الله خيرا

في البداية اتكلمنا شوية عن بروتون عموما و عن موديلاتها و وضحتله اني مهتم بالبيرسونا و جين 2

اداني مفتاح بيرسونا و قالي اتفضل اتفرج براحتك علي البيرسونا اللي معروضة ذات اللون الشامبين و لما تخلص هاوريك الجين 2 اللي كان مدايقني اني البيرسونا المعروضة كانت 2010 و حاولت اعاين انا و واحد صاحبي كان معايا كل حاجة علي حد علمنا لاني مش خبرة خالص في موضوع العربيات ده. العربية ما شاء الله كانت علي حد علمي و رؤيتي كويسة بغض النظر اني البطارية اللي فيها ماكنتش شغالة و معرفتش ادورها ولا اسمع صوت ماتورها بس العربية ما شاء الله تحفة فنية.
قعدت في العربية و كنت مرتاح جدا و حسيت انها فخمة اوي و حسيت اني مميز فعلا و انا راكبها رجعت كرسي السواق للاخر و رجعت قعدت علي الكنبة وراه كانت ركبتي مزنوقة شوية في الكرسي بس انا اصلا طويل طولي حوالي 180 سم او اكتبر بحاجة بسيطة و رجلي طويلة و طبعا محدش هايرجع كرسي السواق للاخر كده و صاحبي برده عمل نفس الحركة و هو طوله اقل مني كام سنتي كده و لما قعد كان مرتاح جدا بالنسبة للسقف بتاع العربية ما شاء الله عالي و انا قاعد برده كنت مرتاح جدا جدا و فيه فرق كبير بين راسي و السقف.
بصيت علي التابلوه بس حسيت اني جودة خامته اقل حبتين من حاجة زي النيسان صني مثلا يا ريت حد ياكدلي لو كان كلامي صح الدركسيون او عجلة القيادة شكلها تحفة و المالتي فانكشن اللي فيها جميل جدا و منظم شكل الشاسيت ممتاز تصميم العربية من الداخل شيك جدا جدا جدا فعلا زي ما قلت انا حسيت اني مميز و انا جواها.
استصغرت شوية الزرار بتاع الانتظار حسيت اني صغير اوي لاني متعود عليه في عربيات تانية سوقتها قبل كده كان اكبر بكتير لاني سقت قبل كده كورولا صني مازدا3 سيفيك كامرين طبعا كل دول مش بتوعي دول تبع الشغل لاني مهندس و بسافر مناطق كتير والشغل بيديني عربية في المواقع لزوم التنقلات المهم بصراحة محستش بالشياكة دي اللي شفتها في البيرسونا غير في المازدا 3 و خصوصا الجديدة اللي هي الشكل الجديد " طبعا الموضوع ده اذواق "

بعد معاينة البيرسونا رحت اشوف الجين 2 و كان فيه عربيتين واحدة سوداء و التانية حمرا و اللون الاحمر ده رائع رائع رائع و حظي السئ برده كان الاتنين بيتسغسلوا و يتنظفوا علشان كده معرفتش اعاينهم اوي من جوه او اني اقعد في واحدة منهم حتي بس بصيت عليهم كده من بره و فتحت الشنطة و شفتها و ما شاء الله واسعة برده مش ضيقة ولا حاجة و تشيل بس عيبها اني فيه في الجنبين بتوع الشنطة اماكن الاطارات طالعة كده و دي واكلة حتة برده مش صغيرة من الشنطة

صاحبي عجبه الجين 2 و انا عجبني البيرسونا علشان حجم الشنطة و حسيت انها اوسع من الداخل عن الجين تو لاني معرفتش اقعد جوه الجين تو علشان كانت بتتنظف و شكلها بتتجهز للتسليم فبصراحة استحرمت قلت دي تلاقيها بتاعة حد حاجزها و ربنا يباركله فيها بلاش بعد ما اتنظفت كده تتوسخ

رحت مرة تانية اقابل استاذ محسن صالح و كالعادة كان استقباله غاية في الادب و سالته عن البيرسونا و قالي خبر الله اعلم بصحته اني المعروضة زي ما قال في اول المقابلة 2010 و لو عايز اشوف الاليجانس ممكن اجيله بكره تاني و اني ان شاء الله هاتوصله دفعة في غضون من يومين لتلات ايام و تمنها الاوتو ب 95 و المانوال ب 89

بصراحة انا مش عارف مدي صحة الخبر هل هو قالي كده علشان احجز مثلا او هي فعلا هاتوصل فعلا بعد يومين تلاتة
الله اعلم بس انا حبيت ابلغكم عن الخبر اللي عرفته و يا رب يكون صحيح علشان كل اللي حاجزين يدعولي و يستلموا عربياتهم اللي منتظرينها بفارغ الصبر.

ملخص زيارتي اني مرتاح جدا للبيرسونا و الجين 2 و فعلا عربيات شيك جدا و ربنا يسهل باذن الله و اشتري واحدة قريب بس ادعولي ربنا يسهل لي و يرزقني و اقدر اجمع تمانها لاني بحاول اليومين دول و الله المستعان و اخر خطوة باذن الله هاعملها علشان يكون قراري مبني علي اسس اني باذن الله متفق مع واحد صاحبي معاه جين 2 اني اجربها بس بعد لما ترجع من التوكيل لانه لسه عامل حادث اليم نتج عنه تدمير الرفرف الشمال الوراني و الفانوس الوراني و الباب بعد لما دخلت فيه عربية 132 ربنا يكفيكم الشر و هيستلمها من التوكيل بعد اسبوعين.

المشاركة الأصلية كتبت بواسطة elzamalek

ايووووووووووووووووووووووو ووون
وصلت امبارح علي الساعة 6 كدة

هاي لاين و فيها مثبت سرعة

ههههههههييييييييييييييييي هههههههههههه انا مش مصدق عينيا هايلاين و كروز كونترول