منتدي هيونداي ام منتدي غبور

**outosend** · 15-04-2008 01:03 PM

اللينكات اللى انت حاططها ياابوعبد الله خطيره قوى بس ليا عليها ملحوظتين الاولى اناه كلها تقريبا على الهونداى الاكسل او السيارات من 92 الى 96 يعنى من فتره كبيره شويه
ثانيا ان فيها مخالفات اداريه ضرايب وحوارات ممكن ماتكونش ليها علاقه قوى باداء السيارات

وبعدين انا كنت خلاص هاجيب الالنترا الجديده هاتخلونى اغير رأيى ولا ايه

**atamim** · 15-04-2008 01:08 PM

سيبكم من كل دا و شوفوا كان فية عرض هدايا على شراء العربية

هنا فى اسكندرية وزعوا بس 6 كروت هدايا (تخيل اسكندرية كلها 6 كروت لية )و الباقى بقالى 3 اسابيع عمال اسئل على الحاجة جت ولا لسة كل مرة لسة

لحد ما قربت ازهق خالص الشهر قرب يخلص و يا الحاجة جت و اتوزعت على الحبايب يا اما .....................

**outosend** · 15-04-2008 01:13 PM

ياريت حد من الجماعه بتوع هونداى يوضحلنا ايه الكلام الغريب اللى فى اللينكات اللى بعتها الاخ ابو عبد الله الموضوع فعلا يحير

**mhalawa** · 15-04-2008 01:37 PM

ولا حد هيسأل ..... طالما مالكش واسطة ...وسياراتة بتتباع 100%

**أبو عبدالله** · 15-04-2008 01:47 PM

لا موجود برضه في الموديلات التانيه ولكن ليس هناك من مالكيها الكثير لكي نراها مثل الفيرنا
يعني كام واحد معاه جيتز هنا في المنتدى ومع ذلك افتكر ان في حد جابها لسه زيروا وكان لمبة الحرارة معلقه عنده

وبعدين احب اوضح نقطه مهمه
الا وهيا
من جرب عليه الكذب اتهم في الصدق

وغبور جرب عليه الكذب والنصب وكل انواع الاحتيال اللي موجوده في السوق

**ahmedfd** · 15-04-2008 02:11 PM

المشاركة الأصلية كتبت بواسطة أبو عبدالله

ولا تزعلو نفسكم
شوف المواضيع دي وانتم تعرفوا ان البلد كلها بتشتم فيه مش المنتدى هنا بس
وعلى راي المثل اللي ميشوفشي من الغربال ......

بس الرابطين دول يا أبو عبدالله مليانين معلومات مغلوطة جداً عن سيارات هيونداي بغض النظر عن غبور، و بالتالي ده يخلينا نشك في المصداقية خصوصا إن شكل الموقعين و أسلوبهم ساذج قوي.
يا راجل دول مفترضين إن في مخطط عالمي من هيونداي الأشرار في كوريا و أشركوا فيه مجموعة من قطاع الطرق بالدول العربية و مال حرام و ضحايا و جرائم و إنقلاب و إنفصال عجل و تسرب بنزين و و و و .... كل ده في موديل إكسيل اللي بقاله 10 و لا 15 سنة شغال و منه تكسيات و منه دوريات شرطة ده بقى أكيد أداة قتل متحركة و خلص على كل أصحابة من زمان ... ده كلام كوميدي جداً بصراحة ميدخلش العقل.، و لا إيه رأي حضرتك؟

و كمان من المغالطات الساذجة موضوع فيرنا و أكسنت... الموضوع ده إتقال قبل كدة كذا مره إن الأكسنت هيا الفيرنا و الإثنين الجيل الجديد للإكسل... و كوريا هيا اللي بتنزلها في أماكن معينة بأسماء معينة لأغراض تسويقية زي ماركات تانية كتير في العالم و الشكل اللي بينتج في مصر هوا الجيل الثاني منها قبل الشكل الجديد.
http://en.wikipedia.org/wiki/Hyundai_Accent
يعني إسم فيرنا ده مش إختراع غبوري ولا حاجة.

و ده رابط لأراء المستهلكين عن الهيونداي فيرنا أو أكسنت الجديدة و شكلهم كدة مبسوطين ... ولا إيه؟
http://www.mouthshut.com/product-rev...925068004.html
و شكراً

**SEATLOVER** · 15-04-2008 02:19 PM

المشاركة الأصلية كتبت بواسطة sharky

إزاى بس يا عمرو دى لازم يكون لها توكيل علشان الضمان يصلح عيوب التقفيل إللى موجودة فيها
يعنى حضرتك أجيب عربية و الاقى فيها عيوب تقفيل و أروح أدفع فلوس بره علشان مش محتاجة توكيل و أى حد بيفهم فيها

دى عربيات هيونادى المتجمعة فى مصر لازم يكون لها توكيل محترم علشان يظبط عيوب التقفيل

دا فيه واحد فى المنتدى غيروا نص موتور يبقى لو مش محتاجة توكيل يروح يدفع تمنه بره وهى مش مكملة 20000 الف

أنا معاك فى إن الكل بيفهم فيها لكن إللى بيجيب عربية زيرو معندوش إستعداد يدفع فلوس بره علشان يصلحها

معاك حق طبعاً يا شاركى .. اللى جايب عربية جديدة من حقة يكون لية توكيل محترم يسندة
ماهو عشان كدة راح جابها زيرو ... عشان يبقى مرتاح

بس انا قصدى ان ميزة الهيونداى انة مش محتاج التوكيل فى كل كبيرة و صغيرة .. ولو جربة مرة فى مشكلة و ماتبسطش عندة اختيارات كتير اوى برة و اوفر من التوكيل كمان من قطع غيار لصيانة لتركيب كماليات

خلى بالك يا شاركى انا قولتها مرة قبل كدة فى موضوع التوكيلات عموما ً
(ماحدش بياخد كل حاجة )
يعنى مش عربية منتشرة و حلوة و قطع غيارها معقولة وسعر اعادة بيعها حلو و توكيل رائع كمان
يعنى لازم يكون فى حاجة كدة (اوت) ...عشان انت اكيد فين ؟

**Sharky** · 15-04-2008 02:27 PM

المشاركة الأصلية كتبت بواسطة SEATLOVER

خلى بالك يا شاركى انا قولتها مرة قبل كدة فى موضوع التوكيلات عموما ً
(ماحدش بياخد كل حاجة )
يعنى مش عربية منتشرة و حلوة و قطع غيارها معقولة وسعر اعادة بيعها حلو و توكيل رائع كمان
يعنى لازم يكون فى حاجة كدة (اوت) ...عشان انت اكيد فين ؟

فعلا الحلو ما يكملشى

خلى بالك سلومة بيقولك إنت فين :D

**Adham_Sabry** · 15-04-2008 02:28 PM

يا جماعه اعتقد ان علشان الفيرنا منتشرة جدا .. وان اللي عنده مشكله بس هو اللي بيتكلم .. فلو افترضنا مثلا ان كفائه التوكيل 70 % ( زيه زي باقي توكيلات مصر مثلا )
بالتالي عدد الناس اللي عندها مشاكل كتيره وبيعرضوا مشاكلهم بينما 70 % الباقيين ساكتين وده اللي بيكون احساس ان غبور اسوء توكيل
تعالوا نعمل استطلاع لمالكي الفيرنا مثلا لو احنا اخدنا منهم العربيه وادينالهم 65-70 الف هايشتروا ايه ؟؟
اعتقد ان الغالبيه هترجع تشتري فيرنا تاني
اقترح فتح قسم (وليس موضوع) مخصوص للشكاوي

**Nile_Storm** · 15-04-2008 02:34 PM

بسم الله الرحمن الرحيم نبدا بالردود
في البدايه
ردودي لا تقصد اي احد من اعضاء نايل موتورز فكلكم و الحمد لله علي مستوي كبير من الوعي
اولا شاركي

"
انا شايف إن إللى بيحصل دا مصلحة لمالكى هيونادى

لإنه ممكن عن طريق المنتدى غبور يتعدل فى تصرفاته إللى خلته أسوء توكيل فى مصر

و خاصة إن المواضيع إللى معمولة من ملاك هيونداى نفسهم

و لما نيجى نتكلم على هيونداى يبقى لازم نتكلم برضه على غيور لإنه الوكيل الوحيد فى مصر لهيونداى "

كلامك كويس جدا لكن اللي ينرفز انك تلاقي اي حد معدي جنب منتدي هيونداي و يمكن حتي مساقهاش و لا يعرف عنها حاجه جاي يشتم و خلاص علي غرار الهيصه في الزحمه

الاخ ابو عبد الله

طبعا اولا تقبل احترامي لحضرتك كعضو مخضرم في القسم الياباني و خصوصا دايهاتسو و لكن اذا جاء احد بمثل هذه اللينكات عن دايهاتسو ماذا سيكون ردك خصوصا ان كانت بهذه الدرجه من السطحيه بصراحه حاسس انها متفبركه
و بدون دليل دامغ فلازم نتبين صحه هذه الكلام
و حتي ان كان صحيحا فهذا بمس غبور و ليست هيونداي
مظنش شركه عالميه بالحجم ده دماغها صغيره تعمل لعب العيال ده

سيات لوفر
هذا ما اريد توصيله
الفصل بين كونه منتدي للهيونداي ام منتدي لغبور

الاخ outsend
ولا تغير رايك و لا حاجه الالنترا ممتازه و هو ده اللي عاوزينه مروجي الاشاعات انهم يقللو مبيعات هيونداي شويه و بما ان الانترنت هو البوابه الاولي للبحث عن سياره فهتلاقي فيه هذه الاشاعات دوما
و برضه مش قصدي نايل موتورز محدش يفهمني غلط

و خلي بالكم انها بدات تطول منصور شيفروله ول مازادت مبيعاته مش كده ولا ايه ؟
و اختتم بمقوله سيات لوفر
(ماحدش بياخد كل حاجة )
يعنى مش عربية منتشرة و حلوة و قطع غيارها معقولة وسعر اعادة بيعها حلو و توكيل رائع كمان
يعنى لازم يكون فى حاجة كدة (اوت) ...عشان انت اكيد فين ؟__________________