غربلة في العربية!

**Ahmad** · 15-04-2008 11:03 AM

سلام عليكم,

عندي غربلة أو رجرجة جامدة شوية لما سرعة العربية بتزيد عن 60 كم/س و بتفضل قوية لحد مالسرعة توصل 100 كم/س ,بتقل قوتها بدرجة كبيرة.
أنا بحس ان الرجرجة دي من النصف الخلفي للعربية يعني مش في الدركسيون. علشان كدة مش مقتنع ان دة ترصيص .
كمان بسمع صوت زي جسم بيخترق الهواء بسرعة (vovovo)و دة بيظهر و بيزيد لما أزود السرعة(من أول 30 كم/س مثلا).
هل ترصيص العجل الخلفي ممكن يكون هو السبب؟
و هل يوجد أسباب اخري ممكن تسبب الغربلة دي و علي سرعات معينة فقط؟

شكرا.

**MKMAHFOUZ** · 18-04-2008 07:43 AM

السلام عليكم
شوف لازم تكشف علي العجل الخلفي اولا ممكن يحتاج ترصيص
كامل

**abdelaziz-waleed** · 18-04-2008 09:00 AM

انا خبرتي ضعيفة بس اللي حضرتك بتقول عليه ده معناه ان العجل محتاج ترصيص او الكاوتش عند حضرتك تعب فممكن حضرتك برده تكشف على الكاوتش

**Ahmad** · 18-04-2008 01:09 PM

المشاركة الأصلية كتبت بواسطة MKMAHFOUZ

السلام عليكم
شوف لازم تكشف علي العجل الخلفي اولا ممكن يحتاج ترصيص
كامل

المشاركة الأصلية كتبت بواسطة abdelaziz-waleed

انا خبرتي ضعيفة بس اللي حضرتك بتقول عليه ده معناه ان العجل محتاج ترصيص او الكاوتش عند حضرتك تعب فممكن حضرتك برده تكشف على الكاوتش

أنا رحت لواحد كويس بتاع ضبط زوايا و ترصيص و عفشة. قاللي ممكن اكس الكوبلن لو واخد خبطة يسبب الغربلة دي.
أنا مش عايز أكبر الموضوع الحقيقة, فقررت اني ارصص الاول كل العجل و بعدين اجرب , لو لسه فيه غربلة مضطر اكشف علي اكسات الكبالن.

بالمناسبة انا كشفت علي الكاوتش طلع كويس بس لقيت الجنوط فيها شوية خبطات فصلحتها و جربت بس الغربلة لسه موجودة. هارصص بكره ان شاء الله و اجرب و اقولكم النتيجة.

شكرا لمشاركتكم يا جماعة :)

**ahmedfra** · 18-04-2008 04:49 PM

متنساش تقول لنا عملت ايه

**Ahmad** · 01-05-2008 06:36 PM

بعد الكشف و القيام ببعض الاصلاحات البسيطة مثل ظبط الزوايا و الترصيص و استعدال الجنوط و تغيير رولمان بلي العجل, الصوت اختفي الحمد لله و لكن الغربلة مازالت موجودة. علي الارجح أكس الكوبلن هو السبب زي الراجل ما قال.

أنا عندي 3 احتمالات لعلاج المشكلة:
1. أفك الاكس القديم و أقوم بتصليحه عند الخراط و أركبه تاني.
2. أشتري أكس استيراد و أركبه بدل الموجود.
3. أشتري أكس جديد و دة مش موجود غير في التوكيل, و للاسف لا يباع الا بالكوبلن , و ثمنه 2800 جنيه (ناحية واحدة)

ماذا تفعل لو كنت مكاني؟ :)

**ahmed1981** · 01-05-2008 08:24 PM

المشاركة الأصلية كتبت بواسطة Ahmad

1. أفك الاكس القديم و أقوم بتصليحه عند الخراط و أركبه تاني.
2. أشتري أكس استيراد و أركبه بدل الموجود.
3. أشتري أكس جديد و دة مش موجود غير في التوكيل, و للاسف لا يباع الا بالكوبلن , و ثمنه 2800 جنيه (ناحية واحدة)

ماذا تفعل لو كنت مكاني؟ :)

2. أشتري أكس استيراد و أركبه بدل الموجود.

**engamrnour80** · 01-05-2008 08:32 PM

ميزانيتك تحكم الاختيار

**Ahmad** · 04-05-2008 11:14 AM

امبارح السبت رحت أصلح اكسات الكبالن, و اليكم ملخص اللي حصل طول اليوم:

1. بدأت بالحل الاول و هو فك الاكسات الموجودة و استعدالهاعند الخراط. و فعلا عملت كدة و رجعت ركبتهم تاني , و للاسف الغربلة حصلت برضه. الخراط أخذ 50 جنيه بالمناسبة.

2. بدأت بتنفيذ الحل التاني و هو شراء اكسات استيراد , و فعلا رحت جبتهم من الوكالة, و رجعت ركبتهم في العربية و طلعت أجرب.
و للمرة التانية وجدت فيه الغربلة برضه , بس بدرجة أقل شوية.
اشتريت الاكسين ب 150 جنيه.

3. طبعا كان اليوم خلص و ملحقتش أفك تاني, فاتفقت مع فني العفشة اني هاجيبلوا اكسات استيراد تانية بس بالكبالن بتاعتها و أشيل الكبالن اللي معايا استبن للزمن. الكلام دة هعملوا بكرة ان شاء الله.

أنا مش عارف انا بصلح في المكان الصح ولا لا ,هل ممكن يكون فيه سبب تاني للغربلة دي؟

عموما هبلغكوا بالاخبار أول بأول.

ادعولي :)

**Ahmad** · 07-05-2008 04:29 PM

سلام عليكم,

تم علاج مشكلة الغربلة الحمد لله.
اشتريت اكسات استيراد بالكبالن, و بعد ما ركبتهم و جربت , اختفت الغربلة تماما الحمد لله.
فني العفشة مازال مصًَر أن العيب من الأكسات, في حين أن بائع الكبالن قاللي أن العيب من رأس الكبالن الداخلية المتصلة بصندوق التروس.

أنا شخصيا مش عارف المشكلة فين لاني غيرتهم كلهم. بس المهم انها اتحلت :)
بس أنا احتفظت بالاكسات و الكبالن الأصلية علشان لا قدر الله لو حصل حاجة أبقي أجربهم تاني و أعرف ايه اللي كان تالف.
أخيرا أحب أقولكم أن ثمن الكبالن الاستيراد بالاكسات من الوكالة وصل 370 جنيه بعد شوية فصال خفيف.

شكرا لكل المشاركين يا جماعة .