الموضوع: هو اي التهريج اللى بيحصل في ميدان التحرير

المشاركة الأصلية كتبت بواسطة otefa

ها أقول لحضرتك وكلامي موجه للمبدأ وليس لأشخاص
العيب أن الناس لسانها يبقى سابق تفكيرها
العيب لما القوات المسلحة تقف مع الثورة ومايضربوش رصاصة عليهم وياريت ماحدش يقولي ده واجبهم ومن الشعب والكلام المثالي حتى لو كنت متفق معاه 100%..............بس كان ممكن يحصل زي ليبيا وسوريا يبقى نشكر الراجل كرمز للقوات المسلحة كوزير وقائد لمجلس القوات المسلحة ولا أول مانشم نفسنا نهينه...... ده مش وقت فتن خالص ومش ها قول أن ده مهما كان فهو رأي أقلية أغلب الظن.
ممكن الموضوعين ألي فوق يوضحو الصورة وياريت تشوفو تعليقات القراء ومعظمها ضد الهتاف ضد طنطاوي

الناس كلهم مش على مبدأ واحد ولا قدره واحده من التفكير
انت لو اتكمت مع ناس معاهم ممكن يقولولك هو نهويش عشان يفهم انه مش ملك على مصر ولازم يشتغل اكتر من كده (ده رأيهم و هم احرار - هما اللى بيدفعوا و هما اصحاب البلد)
المبدأ اللى المفروض يرسخ ان اللى شايف انه بيعمل اللى عليه و الناس لسه مش عاجبها يعمل اكتر و لو الناس لسه مش عاجبها يسيب حد بداله يشتغل

انا مش مع ان طنطاوى يمشى بس عندى سعه صدر كافيه انى ماحكمش على اللى بيقول كده و اقوله عيب

فيه نقطه تانيه

الناس هيه اللى اجبرت الجيش على انه مايضربش عليهم - اى واحد حضر من يوم جمعه الغضب عارف الموضوع ده و عارف العلاقه اللى نشأت مع الجيش فى الايام ديه - ده احنا حفظنا شكل العساكر فيه ناس كانوا بيناموا تحت الدبابه كل يوم و ده مكانهم و عشره صعب جدا حد يضرب فيهم
ده سلوك مصرى اصيل

ماينفعش ابدا تقولى ليبيا ولا سوريا ولا اليمن
انا بتوسم فى حضرتك رجاحه عقل اعلم انك تمتلكها بس فى الموضوع ده حضرتك ممكن تكون بتحكم باسبقيه مقارنه وضع دون اخذ المعطياط

اليمن و ليبيا هى قبائل تدين للقبيله قبل ما تدين للبلد - يعنى فى ليلبيا القذاذفه مع القذافى مهما عمل و علاقات النسب برضه عليها عامل - غير طبعا نسبه التعليم المتدنيه
فى الدول العربيه اللى حوالينا مافيش تقريبا حد ممكن تقول عليه دوله ليها نسب للدوله اكتر من الفبليه غير مصر و تونس و لبنان بنسب متفاوته اللى بتعلوا فيها نعره الوطن على النعره القبليه
ودول الجيش عمره ما هيضرب فى الشعب عشان الجيش من الشعب مش قبيله معاها سلاح

عزيزى يا ريت بلاش موضوع الجيش انه ماعملش زى مش عارف مين لان ده اهانه لاى جندى مصرى انه يتقال كده - لان ده مش حاجه المفروض نقولها- ده واجب

و تانى و تالت و عاشر - الشعب اجبر الجيش بأخلاقه انه مايقدرش يمد ايده عليه
انا كان بين ايديا ظابط بيعيط و دموعه مش قادر يمسكها و انا بسأله بهستيريه هتضربونا انتوا كمان انا قرفت موتونا و خلصونا بقى و هو عيط و قالى احنا عمرنا ما هنضرب اهالينا و الناس ملمومه و حتى السواق بتاع المركبه عيط و الناس اللى راكبه

دول المصريين اللى بنراهن عليهم اللى ماينفعش نقول عليهم كويس انهم ماضربوناش

و الكلام اللى بيطلع كل شويه الجيش احسن حاجه يشد و يوريهو و يقعدهم فى بيوتهم - الكلام ده لما الواحد بيقراه بيستغرب

كل الكلام اللى الناس قالت عليه ده ماحصلش ولا هيحصل - يا ريت بلاش كل شويه نعيد نفس الكلام عشان بجد كفايه موضوع الجيش ده