هو اي التهريج اللى بيحصل في ميدان التحرير

**wawoo** · 09-04-2011 12:34 AM

المشاركة الأصلية كتبت بواسطة otefa

وليه ماقولتوش ياعصام ياشرف ساكت ليه أنت معاهم ولا أيه؟!!!!

تعال التحرير و قولها محدش حيمنعك يعنى ..انا شوفت شيوخ 60 و 70 سنة و كاتبين رايهم و فى منهم اللى بيهتف كمان و الناس اللى متفقة معاة بتردد وراة ..

**otefa** · 09-04-2011 12:43 AM

المشاركة الأصلية كتبت بواسطة otefa

الموضوع مش تخاف من دبابة ولا طائرة
الموضوع تخاف على بلدك ووحدتها

**Hhassan** · 09-04-2011 01:06 AM

المشاركة الأصلية كتبت بواسطة medo_2060

احنا عايزين توضيح اكتر لموضوع الضباط الى فى الميدان..
اتصالات لشخصيات من ائتلاف الثوره وغيرهم اتصلوا النهارده ..ناس قالت ان الضباط طلعوا على المنصه والناس قالت لهم انزلوا..
وناس قالت المتظاهرين تفاعلوا معاهم ورددوا وراهم الهتافات المناديه باسقاط المشير... وكان فى واحد بعد الصلاه علطول بس كان لا بس مدنى ونظاره شمس كان ماشى معاه ناس كتير ومش معروف هو مين اتكلم وشكر الجيش وقال الضباط البواسل وبتاع وفى النهايه قال كلامى للجيش وليس المجلس العسكرى..
المهم الناس الى بتقول المتظاهرين تفاعلوا مع ضباط الميدان والى بيقولوا لم يتفاعلوا..الاتنين بيشهدوا انهم ضباط قوات مسلحه فعلا..
والاهم من كدا لسه حالا عرفت انهم هيعتصموا فى الميدان ومش هيخرجوا منه وناس كتير تعاطفت معاهم وهيعتصموا معاهم..والناس بتطلب من المشير يتكلم ويفهم الناس ايه النظام بجد لان الدنيا كدا اخر لخبطه والله فعلا..
ربنا يستر

انا شوفت الضباط دول وسمعتهم وقالو انهم هيعتصمو في ميدان التحرير وقالو كمان ان فيه 5 الاف ضابط معاهم
وربا يستر على مصر

**SeiffoZ** · 09-04-2011 01:26 AM

المشاركة الأصلية كتبت بواسطة human12

العدد فى الميدان من ساعتين ممكن فعلا يوصل لمليون مستريح
الحمد لله

الملاحظ : الاخوان لما يقولوا مش نازلين العدد مش بيبقى مؤثر

لازم ناخد الملحوظه فى بالنا

أنا شايف إن الإخوان ممكن يكونوا حشدوا شوية ناس ..

لكن خد بالك .. الإخوان ماقلوش إنهم هينزلوا إلا لما حسوا إن ناس كتير هينزلوا .. ده حتى أنا فكرت أنزل! ..

فقالوا نعمل كأننا إحنا نقدر و بتاع .. لكن فى النهاية مش هها كل حاجة .. بالدليل جمعة الغضب ..

الإخوان ماشركوش ...

فهما إنهزوا فرصة إنهم نسبوا لنفسهم أعداد مش بتاعتهم .. ده غير إنهم زودوا المتاظهرين ببتاع 10% بالكتير .

فمش مؤثرين قوى بردوا .

**hobiko** · 09-04-2011 02:08 AM

أنا مع الرأي إلي بيقول ...... إن قيادة الجيش مكنتش تقدر تضرب المتظاهرين في أيام الثورة الأولى لأسباب موضوعية بحتة ملهاش علاقة بالحب و الكره ........

لأسباب كتير أوي ......

أولها ..... خطر الدخول في حرب أهلية ...... و إن أفراد الجيش نفسهم ...... حينشقو على القيادة و ينضموا للثوار

صديق من الطفولة ..... ظابط في الجيش ..... يعتبر من الصفوة إلي بيتم ترشيحهم لقوات حفظ السلام الدولية ....... في عز الأزمة سألته ......

حتضربونا ؟؟؟ ....... أنا و زمايلي و كل إلي أعرفهم ........ عايزين نموت قبل ما طلقة تطلع في صدر مصري واحد

بالنسبة لضرب المتظاهرين بالطيران في ميدنة التحرير ....... مستحيل

انتو ناسيين في إيه تحت ميدان التحرير ........ انفاق المترو .......

كانت حتبقى كارثة هائلة ....... مش للميدان بس ...... لكل الفنادق و الجامعة الأمريكية و المتحف المصري ......

دة غير صورة مصر قدام العالم ....... بتضرب المتظاهرين السلميين بالطيران !!!!!

**A.Saad** · 09-04-2011 02:48 AM

تفتكروا اما حدة المظاهرات تزيد
هل هيستجيب للمطالب
ممكن لا
لسبب او لاخر
هيكون قدامه وقدام الشعب حاجة من الاتى :
الضرب بالمليان واجراءات عنيفة زى اعتقالات واسعة وايقاف الاتصالات وده معناه خسارة المكاسب والحرية المحققة حتى الان
انسحاب الجيش من العملية السياسية تماما وتفرغه لحماية الحدود الخارجية فقط
ساعتها هيبقى مفيش بلد
مش هتلاقى اكل ولا شرب ولا دوا ولا امن ولا شغل ولافلوس
وهتبقى الصومال لينا كالجنة للنار
الجيش مش ملزم يستجيب لطلباتكم
عارفين ليه
مبارك كان بيستجيب علشان يحافظ على نفسه او مدة رئاسته او حتى حياته
لكن الجيش معندوش حاجة يحافظ عليه
هيسيب الحكم ويتفرغ لمهمته وهيا حماية حدود الدولة
ده لو فضل جيش واحد ومحصلش بين اسلحته حروب

يوم 26 و27 يناير على الفيس
كنت بقرا مشاركات عن ارهاق الشرطة فى اليومين دول
علشان ينهاروا يوم 28 وميكونش فيهم اى مقاومة
والبعض اعتقد انهم هينضموا للمتظاهرين ضد الرئيس وبكدة هيتشال يومها
بحس داخلى حسيت ان البلد هتكون فوضى وان ده معناه انهيار للدولة ككل مش الرئيس بس
وللاسف ده حصل

ياريت اللى بيقول استمرار المظاهرات يعرف حاجة
ان الضغط اكتر من كدة معناه تدمير ذاته وشخصه قبل ما يدمر او يحاسب حد تانى
وان التاريخ كدة ممكن يكتب ان شعار الثورة اللى اتحقق
فوضى فوضى حتى النصر
فوضى فى كل شوارع مصر

**Ahmed Anwer** · 09-04-2011 03:57 AM

المشاركة الأصلية كتبت بواسطة itsonlyme

اعذرني ... بس تقديرك للأمور غير سليم
الإخوان شاركوا في جمعة الغضب 28 يناير وبكل قوتهم كمان.
العدد النهاردة ضعف العدد الجمعة اللي فاتت ... مع العلم اني كنت في الميدان النهاردة والجمعة اللي فاتت.
وشوفت بنفسي ناس كتير يرجع انهم من الإخوان.
وللعلم ... أنا كنت مستاء جداً من موقف الاخوان من عدم المشاركة الجمعة الماضية.
لكن لازم نقدر قدرتهم على الحشد ونحترمها.

بالضبط عندهم قدرة علي الحشد بس مش دليل علي الإنتشار أو القوة ،،

الناس اللي زيي اللي مش منتمين لأي إتجاه ،، الذهاب بيبقي بالنسبة لهم قناعة شخصية و حسب ما الظروف تسمح

يعني أنا مقدرتش اروح النهاردة و لا الجمعة اللي فاتت لمجرد إني عندي ظروف رغم إقتناعي بأهمية المشاركة

لكن لو عندي إلتزام حزبي أو نحو جماعة زي الأخوان الوضع هيختلف ،، هيكون أقرب للأوامر التنظيمية

زي المسيرات اللي كانوا بيعملوها في الإنتخابات ،، مكنتشي بتكون من أهل الدائرة ،،

و متنساش كمان عامل الوقت في المطالب ،، يعني الأول الدعوة بتبقي ضعيفة و بعدين تزيد تدريجيا فالجمعة الأولي غير اللي بعدها غير اللي بعدها