الموضوع: كنت هموت النهاردة على الدائرى

السلام عليكم ،،،
الموضوع مبدأيا كدة ... حسبى الله ونعم الوكيل فى الناس المستهترة اللى بتشيل حاجات على عربيات نقل ومبتربطهاش كويس .
كنت رايح النهاردة انا وعائلتى 6 اكتوبر لخطوبة ابن عمى هناك وكنا خمس عربيات ... اتنين منهم كانوا أمامى وفى ملف لقيت اللى قدامى علطول بيدى اشارة يمين وكنا فى اقصى اليسار بجانب الفواصل وفجأة لقيت امامى شوال مليان حاجة ومكبوس على الأخر بالحاجة دى وكان وضعه عرضى على الطريق كأنه سيارة واقفة .
طبعا العربيتين اللى قدامى شافوه من بعيد فتفادوه بسهولة .... لاكن انا فوجئت بيه مره واحدة امامى والمسافة بينى وبينه كانت حوالى 8 متر فقط وانا كنت على سرعة فوق الـ 100 ساعتها .
قمت مرة واحدة وفى اقل من فمتو ثانية كاسر الدركسيون يمين ورامى على الحاراتين اليمين على السرعة العالية دى وقمت لامم تانى الدركسيون مرة واحدة علشان اعدل العربية .
لولا ساتر ربنا اللى كان يمينى ورا شوية عربية نقل كبيرة بس هو استوعب الموقف لان عربيته عالية واكيد كان كاشف الموقف .
والحمد لله برضوا ثبات العربية كان ليه عامل فى تدارك الموقف ده لانهما كانت خطفة وردة فجائية بسرعة كبيرة .
واخيراً حسبى الله ونعم الوكيل فى المستهتر اللى وقع منه الشوال ده لانى متأكد ان بكرة ممكن الواحد يسمع مجموعة حوادث بسببه .
اللهم سلــم .

المشاركة الأصلية كتبت بواسطة ranger

للأسف دي ظواهر منتشرة كتير
حصل معايا موقف مشابه بس اللي حصل انه مكانش شوال
كانت عربية نقل بتغير كاوتش على اقصى اليسار على الدائري برده

حسبنا الله في كل مستهتر
يعني اخينا دا لو كان غير حارته بدري كنت انا اشوف العربية دي واخد حذري
انا دايما لما بلاقي حاجة غلط في الطريق بغير الحارة وبدي اشارة من قبلها بكتير
عشان اللي جاي ورايا يكون كاشف الطريق كويس ومزنقهوش لأنك متضمنش ان اللي جاي دا هيعرف يفادي وان كان هو هيعرف متضمنش عربيته تساعده وسرعته تساعده واللا لا
ربنا يسترها مع الجميع يارب

موضوع العربية اللى بتلاقيها عطلانة يااااااما حصل للواحد ... ممكن تنشاف من خلال زجاج العربية اللى قدامك وبتاخد بالك وتستعد .
لاكن الشوال ماكنش باين خالص مع انه كان مليان حاجة على آخره ... والمشكلة بقى العربية اللى كانت قدامى ادت اشارة يمين مش انتظار وانا كنت شايف من خلال الزجاج عنده ان الطريق فاضى وهو قالى بعد كدة انه كان فاكر انى كاشف الطريق وشفت الشوال ده .
غلطتى ان المسافة بينى وبينه مكنتشى بعيدة كفاية لتدارك الموقف بسهولة .

المشاركة الأصلية كتبت بواسطة sharpvision

الحمد لله على سلامة حضرتك وكويس انها جت على قد كده وعرفت تتصرف..

الحمد لله التصرف ده من عند ربنا حاجة لا ارادية كدة .

المشاركة الأصلية كتبت بواسطة eldell

الحمد لله انها جت على قد كده والف حمد لله على سلامتك

الله يسلمك وربنا يستر على بقية الناس اللى هتعدى بعدى وهيتعرضوا لنفس الموقف ده .