الموضوع: ما هو تقييمك لوكيل بيجو و مراكز الخدمه

أنا شخصيا لي تجربة في ورشة ابورواش : واحب أدي كل واحد حقه : اولا المقابله من الناس هناك منتهى الأحترام والأدب والمكان نظيف جدا 0 ولكن في شخص هناك لاداعي لذكر اسمه بيعمل شغل عليك يعني يخلي لك البحر طحينه وان العربية ح تتكلف الالاف - بس هو عنده الحل السحري - وطبعا لازم توافق علشان تتحل مشكلتك - ويبتدي يعمل شغل عليك - اخر مره اخد منى 1620 جنيه - على ايه ؟؟؟ وكنت مضطر علشان السيارة تمشي للجراج لأ ني كنت مسافر يعني الفنيين هناك بيعملوا شغل لحسابهم من عملاء البيجو - ياريت الإدارة تنتبه لذلك

انا معايا بيجو ٣٠٠٨ و رحت توكيل مرغم في الاسكندرية، اولا التوكيل موجود في جزء من محطة بنزين، الناس هناك تحس انك داخل عمر افندي، و السيد المهندي اللي استقبلني افتكر اسمه عبد الحميد حسسني انه فاهم كل حاجة و قاللي على فكرة انت لازم تغير زيت الفتيس كل ٢٠ الف كيلو و ده سعره ١٢٠٠ جنيه لانه مختلف عن اي نوع موجود في السوق ، قلت ماشي اهي عربية مقلب، لما رحت فرع مرغم في القاهرة مهندس محترم جدا اسمه حتاتة قاللي مين قالك الكلام دح احنا بنكشف عليه بس كل ٢٠ الف و ده زيت فتيس احمر عادي، اصدق مين معرفش.. عموما العربية امكانياتها فوق الممتازة لكن التوكيل فاشل فاشل فاشل و اخرهم يشتغلوا في الموديلات القديمة زي اي ميكانيكي، لو بتفكر تشتري بيجو متروحش التوكيل و شوفلك اي مركز خدكة يريحك، بالمناسبة انا عامل تامين مع اليانز و توكيل بيجو مش بيشتغل مع التامين عدا كونتاكت، ليه معرفش..

السلام عليكم
طبعا مما لا شك فيه إن الصفة الغالبة على سمعة التوكيلات في مصر بشكل عام سيئة، وذلك لأسباب كثيرة. وطبعا توكيل بيجو له نصيب كبير منها للأسف الشديد رغم إن بيجو من أفضل الماركات ليس في مصر فقط بل والعالم. والدليل حب الناس لموديلات بيجو التي مازالت تجري في كافة الشوارع المصرية بموديلاتها المحبوبة بدءا من 504 وما قبلها وحتى 405 وما بعدها. وبصراحة ومن واقع خبرة واستخدامي للبيجو منذ سنوات لأكثر من سيارة 405 و 406 أنصح بالتعامل مع مركز خدمة أحمد عمارة بمصر القديمة رغم أسعاره المرتفعة نسبيا مع أنها أقل من التوكيل وكذلك انصح بالابتعاد عن التعامل مع التوكيل ومع مركز الجيزة (أول شارع الهرم) وأفضلية التعامل مع ميكانيكي متخصص عنهما، ومن الممكن التعامل مع مركز بزهراء مدينة نصر بعد سوق السيارات (ورشة عادية متخصصة)

شباب أنا عايز ا جيب 308 موديل 2011 بس لما سمعت كل انتوا بقولوه بتراجع و أنا كنت باردوا باشوف جولف باردو توكيل زفت
مش عارف اجيب عربية اه من بعد الي بسمعوا في كل المنتديات عن التوكيل او العربية
مع ان المعرض بيقول روح شوف بنفسك الخدمة
لو حد يفدني

انا ليا مشاركة سابقة عن توكيل بيجو الاسكندرية.. بس حصل معايا موقفين حديثا :
اول موقف الزجاج الامامي اتشرخ لوحده, مش من طوبة ولا اي حاجة.. كانت واقفة واتشرخ بالعرض
منظر الكسر كان غريب جدا عشان كدة صورته


المهم رحت اسأل على الزجاج فين و بكام. رحت لمودرن سرفيس اللي في طريق المطار, سألوني في تأمين قلت ايوة مع اليانز, بعد اسبوع ردوا عليا قالوا مفيش مشكلة هنغيره و سعره 3500 جنيه. معجبنيش السعر قلتله مش كتير؟؟ رد عليا ما معناه هو انت اللي هتدفع؟؟ سالته هو مش المفروض المنظر ده يكون متغطي تحت الضمان؟ قاللي لا وطلعلي شروط ضمان بيجو مكتوب فيها الضمان لا يشمل الزجاج.

بصراحة قفشت في دماغي انها ضمان مع ان معايا تأمين, قلت اسأل في التوكيل, اتصلت وعرفت ان لازم اقابل مدير الضمان في بيجو فرع دير الملاك مهندس اسمه احمد حتاتة.. رحت اقابله ملقيتوش واتفقنا انه يستناني تاني يوم عشان مواعيد شغلي متاخرة

تاني يوم لقيته مستنيني فعلا وشاف العربية, كان شاب في قمة التهذيب و مهندس فاهم مش حافظ, المهم صور الزجاج وقاللي لازم ابعت لفرنسا وهما اللي يقرروا, وعرفت ان سعره 2850 جنيه مش 3500 زي مودرن سرفيس. واشتكيتله من العك اللي في مركز اسكندرية وقابلني بمدير التطوير واستمع باهتمام وشرحلي ان الشركة عموما بتتطور جامد بعد ما اتباعت .

بعد كام يوم اتصل بيا المهندس احمد حتاتة وقاللي اتوافق على تغيير الزجاج تحت الضمان, وفعلا رحت واستلمت العربية تاني يوم بزجاج جديد واصلي و مدفعتش ولا جنيه.

كنت فاكر كويس اني اكتب الكلام ده في المنتدى من رمضان بس بصراحة انشغلت, لغاية ما كنت في اسكندرية وركنت في الجراج عادي وسافرت, جت زوجتي بعدها تروح مشوار العربية مش بتشتغل, في مارش لكن مش لاقطة كان مفيهاش بنزين.. اتصلت ببيجو اسكندرية, وصلوا و كشفوا عالعربية قال دي طلمبة بنزين.. والسبب ان زوجتي كانت بتسنى لحد لمبة البنزين ما تنور, قالوا مفيش مشكلة متغطية في الضمان.. وهييجوا كمان 3 ايام يركبوا الطلمبة.

عدى 3 ايام, اتصلت بيهم مش شغالين, كان يوم الانتخابات وخدوا اجازة, استنيت يومين لحد ما الانتخابات خلصت, قلتلهم طب ايه؟ قالوا الطلمبة مش موجودة في مصر.. طب ايه؟ هنبعت نجيب من فرنسا. طب امتى؟ قالوا DHL في خلال يومين.

استنيت يومين واتصلت ببيجو اسكندرية تاني.. طلبتوا الطلمبة؟؟ قال لأ . ليه؟؟ قال هتيجي بعد 20 يوم بالطيارة. قلت امال ايه حوار يومين ده؟ قال سعر الطلمبة 3300 جنيه ولو جت في يومين هيبقى 5000 والعميل يتحمل الفرق. قلتله هي مشكلتي ان معندكش طلمبة في المخزن؟ الرد كان هو السيستم كدة. طيب نشوف حل؟؟ قعد يقول نحط طلمبة مش عارف ايه مؤقتا لحد ما تيجي الاصلية.. لقيت نفسي داخل في حوارات عجيبة. والعربية متعطلة, قلتله اديني حد يحل الموضوع لاني شايف رسوم الشحن مش معقولة, مش هتوصل 2000 جنيه ابدا.. انا بشحن كتير من امريكا وعارف, قاللي كلم مدير الضمان مهندس احمد حتاتة. بالمناسبة سعرها عالي عشان هي طلمبة بالفلتر كاملة قطعة واحدة. واللي اعرفه ان طلمبة المحرك التوربو غير العادي وال3008 توربو.

اتصلت بيه لقيت الموضوع عنده فعلا ورقمي عنده من ساعة موضوع الزجاج.. قاللي سيبني ساعة وهارد عليك. رد عليا وقاللي بكرة هتجيلك عربية بيجو اسسيستانس من القاهرة ومعاهم الطلمبة, الفيلم الهندي بتاع فرع اسكندرية اللي بقاله 6 ايام انتهى في ساعة زمن ولقيوا طلمبة و وصلوا فعلا تاني يوم وركبوا طلمبة جديدة, دفعت مصاريف الانتقال فقط 200 جنيه.

طولت عليكم انا اسف, الخلاصة التوكيل فيه ناس محترمة.. بس في ناس بتقول اي كلام.. السياسة بتتطور لكن ما زال فكر عمر افندي موجود.. جزيل الشكر للمهندس احمد حتاتة مدير الضمان في بيجو.. راجل فاهم وواجهة ممتازة لبيجو, اهتمام بالعميل وتذليل للمشاكل.. وانصح لو حد عنده مشكلة في الضمان يتصل بيه . عذرا للاطالة.

الصراحه التوكيل كويس انا روحت مركز مدينه نصر اوتو سيرفس الناس هناك محترمه جدا والشغل كويس ناس فاهمه فى العربيه صح وخلصو الشغل بسرعه ومشيت والصراحه ملقتش موضوع الاسعار المهوله يعنى اغلى من بره مش قوى حاجات بسيطه وبعديها انا قررت مصلحش بر انا هشتغل من التوكيل على طول

انا اتعاملت مع المركز الرئيسي بابو رواش
والناس قمة في الاحترام
الاسعار مش مبالغ فيها
مفيش زحمة
وقت الصيانة قليل
العربية بتطلع نظيفة ومغسولة
انا لسة محتاجتش قطع غيار بس لازم اقولكم علي حاجة
انا كنت بروح عز العرب عشان كان معايا بروتون وبصراحة مقارنة بتوكيل بيجو مفيش مقارنة اساسا
عز العرب زحمة
ومفيش قطع غيار
والكوبلن ب 1400 جنيه ومش موجود
يعني رائي ان اللي زعلان من بيجو يشوف التوكيلات التانية عاملة ازاي