عربيتي الجديده بتصقف وهي في التليين

انا اشتريت فيرنا مو 2008 1600 عامله 700 كم ..ومفول بنزين 92 .. حاسس انها بتصقف
(بالرغم من اني مش مشغل التكييف مستني لما الألف الاولي تعدي وابقي اشغله)..
يعني مثلا لما اكون في ملف ومهدي (بس لسه ماشيه) وبكون علي الغيار الثاني تصقف
واحيانا لما بكون طالع علي الأول تصقف (بس مش دايما )

مع ان كان معايا فورد اسكورت 1600 وكانت عامله 92 الف كم ..وفي نفس الملف وانا علي الثاني ما بتصقفش . ده حتي كانت بتبقي واقفه واطلع بيها علي الثاني بدون ما تصقف
مش كده غريب ولا ايه ؟؟ والمشكله فين ؟؟

انا طرحت السؤال ده في موضوع "دليل شامل عن الفيرنا بواسطه اسئله الاعضاء" في قسم هيونداي .. بس حبيت اطرحه هنا علشان اشوف آراء أكثر .. العربيه جديده يا جماعه وانا قلقان

ايه يا جماعه انا قلت هاشوف ردود كتييييييييييييييييييييييي يير
مش شايف حاجه ولا البس النظاره ؟؟..
فين الردود ؟؟

ممكن يكون البنزين مغشوش ابقى جرب تفول من بنزينة تانية و متخليش ال Rpm يوطى قوى علشان لو وطى جامد لازم تصقف

سيدى

شوف كتالوج العربية وشوف المفروض تستعمل بنزين برقم اوكتين كام؟
دا أولاً!
ثانياً: عربيتك لسه فى الضمان! روح بيها التوكيل و متستناش لصيانة الألف كيلو
ثالثاً: أنا شايف إنها بسيطة وإنها إما
نوع

إما نوع البنزين
أو سلك البوجيهات إن شاء الله

وربنا يوفقك

وديها التوكيل يشوفوهالك

بدال العربية فى التوكيل روح خد حقك انت دافع فلوس ولسة العربية فى الضمان

حصل مع خالي في البي ام دبليو 320

وكان بنزين 92 بس حطينا من موبيل 92 بعد ما خلص خالص التانك بقت تمام

حصلت كتير ان ناس حطوا 92 وطلع ميه ساقعه وحصل مع واحد صاحبي وكنت معاه

فضلت تصفق وبعدين طفت وجبنا ميكانيكي قال انتو حطيتوا في التانك حاجه قلناله لأ قال دي فيها ميه ساقعه

عادي فولها من موبيل او شل 92 او جرب 95 انا جربته بصراحه يا جماعه للكل أداء ال95 جامد جدا من هدوء الموتور وقوه سحبه

هو اللتر ب175 قرش

نسيت اقولك لو متضبطش ارجعلهم تاني لان فعلا ممكن يكون سلك البوجيهات او الموتور لاقدر الله مفوت لاني سمعت من اكتر من واحد ان في دفعة فيرنا مواتيرها مفوته وجديده

وربنا يستر وميكنش فيها حاجه يكون بنزين مغشوش

بس لو طلع عيب بنزين بلغ الشرطة علشان حرام نحط 92 ويبقى مغشوش كمان

التوكيل ثم التوكيل ثم التوكيل
أوعى تروح لأى ...........
معلش مش لاقى كلمه أقولها عليهم

لا متقلقش الموضوع دة لسة حاصل مع عمى تويوتا 99 و سالنا ميكانيكى قال من البنزين انت غير المحطة دى و مترحش تانى عندها

هي غالبا بنزين

ان شاء الله تطلع عيب بنزين

امس .. تانك البنزين فضي .. ذهبت امون ولم اجد في البنزينه غير بنزين 90
قلت امري الي الله هيا ناقصه ..المهم مونت 90 ..والعجيب ان التصفيق قل جدا بعدها ..
الأستنتاج :
1- زي ما قال الزملاء ان غالبا المشكله بنزين مخلوط بمياه
2- اظن التصفيق الحالي (نادر الحدوث) ناتج عن اني مش متعود علي العربيه .. كان معايا قبل كده فورد اسكورت 99 وكان مشوار الدبرياج طويل (الحساسيه اقل)
بينما الفيرنا مشوار الدبرياج قصير وبالتالي محتاج حساسيه ودقه لسه مش متعود عليها
وشكرا للزملاء

لاشكر على واجب وعموما الف مبروك العربية

هو ده الكلام
يا جماعة اللي يسأل عن مشكلة ويعرف حلها يقول في الآخر إيه اللي حصل عشان الكل يستفيد
وشكراً