اراء ومشاهد من التحرير النهاردة من الساعة 12-1.30
السلام عليكم ورحمة الله وبركاته
كان المفروض عندى شغل النهاردة وطبعا الاجانب خافوا يتحركوا ويطلعوا حتى برة الفندق.
وللاسف شفت ميدان التحرير والناس اللى واقفة فيه ومقصدش الناس كلها طبعا واللى شفته وسمعنه,اسف على اللفظ بس اللى حصل اودامى اسمه هبل.
طبعا الميدان مقفول من جميع النواحى وعربية الجيش المحروقة حاملة الدبابات قاطعة الميدان من عند المتحف وكانوا طبعا بيفضوا الكاوتش عشان الجيش مياخدش العربية وطبعا الكاوتش سميك ومليان فمعرفوش يفضوه.
رجعت لجان التفتيش على مداخل الميدان وبطاقتك لو سمحت.
اول ما تدخل الميدان تبداء المناقشات والحوارات الحادة والهادئة من ناس بيطلبوا من المعتصمين انهم يمشوا وكفاية كدة وانهم غلطانين عشان قعدوا بعد الحظر ورد المعتصم انه برده مش من حق الجيش يضربنا بنار حى.
تدخل شوية وتشترى كوبية شاى تسمع بقى : هو الجيش اللى وصلنا لكده بسكوته وبطئه وادى الفلوس طلعت برة.دول بيهربوا الفلوس عن طريق الانفاق لاسرائيل.طب ما اسرائيل بتضرب الانفاق هى مش عاوزة الفلوس ولا ايه.ايوة ما هما بيضربواالانفاق اللى مش بتطلع منها الفلوس.
ومظاهرة فيها حوالى 200-300 واحد بيشتموا شتائم حقيرة فى المشير وعنان.
والناس اللى واقفة وبتتمشى فى الميدان وناس واقفة تسمع لناس بتقول حاجات غريبة ولما الكلام ميعجبهموش يسيبوه ويمشوا.
كلام زى الجيش متواطئ ومش عاوزين الجيش وعاوزين مجلس مدنى من الشرفاء.ده حتى شرف اللى اخترناه من وسطنا معملش حاجة.
طب ما شرف شغال والبورصة رجعت والشرطة بدات ترجع وبدا يفتح ملف النيل ولسة عنده اقتصاد وسياسات خارجية و ديون وتعويضات وامظاهرات واعتصامات وضغوط.امتى بس هيعمل ده كله وليه يعملوا تحت الضغط.طيب ما نهدى ونديله فرصة.طبعا معجبوش الكلام وبدا يتلفت يمين وشمال وراح ماشى.
ومعرفش الممثل مين امبارح الله يباركله خد معاه الشباب وخربوا الدنيا عند السفارة.
واحد واقف يقول بكرة تعرفوا ان الجيش متواطى لما العادلى واللى معاه يهربوا قبل ما يتحاكموا ويقولوا اهالى مساجين كانت بتهرب قرايبها ودول هربوا.ارد عليه اقوله اه عمر عفيفى قال كده من مدة.يقولى اه ياما حذرنا.
واحد وشه متلخبط دم لونه بنى ومش عارف هو ساب الدم على وشه من امبارح ولا ايه اللى حصله بيصور مع قناة العربية وماسك طلقة وبيقول ضربونا بنار حى وقناصة وصاعقة الساعة يجيلها 2.30-3.00 ووقفنا ليهم ومشيوا بعد ما موتوا 4 منا وال3 ظباط المعتصمين معانا خادوهم.
وراحت واحدة ست داخلة ومعاها شنطة بلاستيك اهو الدم اهو صورها صورها.فتحت الشنطة طلعت كرتونة عليها دم نفس اللون البنى.وواحد معاها طلع كتافة امين شرطة واهو ديه خدناها منهم امبارح وراح راميها على الارض ودايس عليها واعد يقول خونة.
سالت واحد واقف شكله محترم وكلامه بيقول انه مثقف.كان كلامه بيقول كفاية على الجيش كده ويرجع يحمى الحدود ويشوف ايه حكاية اسرائيل اللى بتضرب الحدود ورفح اتبهدلت.تمام والله طيب وبعد ما الجيش يرجع.يجى مجلس مدنى شريف.طب ايه الخطوة الجاية.ايه اللى هيحصل بعد الاعتصام.رده كان بالظبط.ها مش عارف.وكررتله السوال تانى وتالت لحد ما قاللى يا عم انا لابس تى شيرت 25 يناير كده اشتريته كده متسالنيش ايه اللى الخطوة اللى جاية انا مدرس جمعة وسبت اجازة وبكرة راجع شغلى.
واحد بيتكلم مع معتصم وبيقوله طيب ما بلاش الاعتصام والميدان اللى باظ تانى واتبهدل والشوارع والمحلات اللى اتقفلت ونهدى ونشوف المجلس هيعمل ايه وادى الرسالة وصلت.لا احنا كدة بنضغط على الجيش ولازم بقى يمشى من شرم الشيخ عشان نفوق.
مطعم كنتاكى طبعا اتدمر واودام كنتاكى فى طلقة مضروبة فى العمود الاخضر ومعدية من الناحية التانية والناس مستنية اى حد من القنوات يصورها.اروح بقى ورا العمود عند الحيطة اشوف الطلقة وصلت لفين مش عارف.
ايه رايكوا طيب يا شباب الجيش مشى ليه والامن المركزى معاه,مش خوفا انه يضطر يضرب فيكوا فعلا بدل ما كان بيضرب فى الهوا.واحد يطلع يقول هوا ايه يا عم.الدم هناك اهو فى الارض.
واحدة بنت بتعيط ووشها متلخبط بالدم البنى برده وبتقول كان فساد حكومة مبارك ارحم من اللى بيعملوه فينا.
راجل كبير فى السن حوالى 60-65 سنة بيقول اتفرجوا على الجزيرة.وشوفوا الحقيقة.مفيش مذيع مصرى عنده شجاعة يقول حاجة.لسة بردوا بيضحكوا علينا.
اى حد فى الميدان تساله جبتوا منين الاسلاك الشايكة يقول الجيش كان جايبها على العربية اللى ولعت واحنا خدناها.طب هو ايه اللى وقف العربيه ديه بالعرض كده ولا الجيش سابها ومشى بعد ما ولعت.راح واحد طالع يقول لا لا العربية ولعت لوحدها الساعة 4.30.طب مين ولعها.مش عارف.طيب ما الجيش مشى والشرطة مشيت.مين بقى اللى ولع العربية.كانوا 3 حواليا وفى لحظة ال3 مشيوا.
كان فيه زى لجنة واقفة عند المتحف من شابين وبنت واودام المتحف اسلاك شايكة وبوابة الامن اللى هناك محطمة.
وطبعا اللى كسر وحرق العربية هو اللى كتب عليها:
http://img695.imageshack.us/img695/525/imag0078g.jpg
http://img146.imageshack.us/img146/6291/imag0077x.jpg
http://img824.imageshack.us/img824/6499/imag0076xq.jpg
والله اعلم معتقدش ان اللى واقفين فى الميدان دول من الناس اللى كانت واقفة امبارح.