واضح ان فى صفقة حصلت لتنحى مبارك مقابل تأمينه و عدم محاكمته, طبعا الكلام دة مش موثق و مؤكد, بس لو أى حد طبيعى شغل مخه هيكتشف الكلام دة, و دة ببساطة نفس اللى حصل فى تونس قبلينا على طول
طيب مبارك مشى بقاله شهرين, بس فى حاجات محتاجة تفسير:
ليه قانون الطوارئ لسة ما اتلغاش ؟
ليه قتله المتظاهرين ما اتحاسبوش ؟
ليه ظباط أمن الدولة اللى عذبوا الألوف و موتوا المئات ما اتحاسبوش ؟ دة غير انهم حرقوا أغلب المستندات, بس لسة فى بلاوى و مقابر سرية و غيره
لية الوزاراء متغيروش لحد دلوقتى ؟
ليه رؤوساء المحليات ما اتغيروش ؟ و معروف ان الرشاوى شغالة زى الفل ؟
لية رؤوساء الصحف اتغيروا الإسبوع اللى فات بس يوم الخميس قبل المظاهرات ؟
لية رؤوساء الجامعات اللى كلهم فى الحزب الوطنى و أمن الدولة معينهم ما اتغيروش ؟
ليه "الثلاثى المرح" مبدأتش التحقيقات معاهم غير الخميس اللى فات قبل مظاهرات الجمعة برضو ؟
ليه مبارك و ولاده و بقية الشلة ما اتحاسبوش لحد دلوقتى ؟
لية الموظف بيقبض 400 جنيه فى الشهر و رئيس الجامعة بيقبض نص مليون لحد النهاردة ؟!
و أسئلة تانية كتييييييييييييييييييير
هتقولى الحاجات دى محتاجة تقارير و تفحيص و بتاع ؟ هقولك احنا 80 مليون مواطن, هتبقى معضلة لو جبنا منهم 1000 واحد بس نعينهم لإدارة الهيئات المختلفة ؟ الموضوع دة مش هياخد أكتر من اسبوع واحد بس, و ممكن نعمل انتخابات برضو للتعينات دى مش صعبة خالص خالص
و كل يوم نشوف فى التلفزيون و نقرى فى الجرايد عن فلان هرب, فلان هرب كام مليار فى طيارة خاصة, فلان حرق كل المستندات فى شركته من "ماس كهربائى"!
إذا كل يوم فى أدلة بتتدمر و أشخاص بيهربوا من العدالة و فلوسى و فلوسك بتتسرق, أكتر من اللى اتسرق
عندك استعداد تفرط فى حقك و حق عيلتك و أصحابك ؟ أنا بتكلم على حقك المسروق 30 سنة فى التعليم و الصحة و النظافة و أى حاجة تانية ؟
الجيش موقفه بطىء و محير تماما
ليه عمل استفتاء على 9 مواد فى الدستور و قسم الشعب نصين و بعدين عمل اعلان دستورى و نزل حوالى 60 ماده على مزاجه ؟
أنا مش بوقع و بقول الجيش عميل و بطالب بفوضى فى البلد
الجيش من الشعب, يعنى ظابط الجيش يبقى أخويا و أبويا و قريبى
المقصود قيادات الجيش, و أنا بقصد المشير طنطاوى و أغلب أعضاء المجلس العسكرى
مش مبارك المخلوع هو اللى معينهم ؟ و طبعا ولائهم ليه ولا مبارك أهبل و كان معين أى أشخاص و خلاص ؟
و مش لازم ننسى ان الشعب هو اللى قام بالثورة, مش الجيش زى ما حصل فى ثورة 52, و الجيش دلوقتى يعتبر معين من الشعب لإدارة شئون البلاد, لية بقى الجيش بيتمنن علينا كدة ؟
و اللى خلانى أستغرب أكتر و أكتر اللى حصل امبارح فى التحرير و راح ضحيته مصابين و قتلى, مش ممكن تكون دى محاولة علشان نتلهى عن محاكمة الرئيس الخلوع ؟ و لا علشان فى ظباط انضموا للمتظاهرين؟
أنا بستفسر والله و عايز حد يجاوبنى على أسألتى , بس اجابات مقنعة مش يقولى احتمالات ضعيفة "ان شاء الله يحصل كذا" و الكلام دة
فى ناس عارفانى كتير فى المنتدى من زمان و موقفى ثابت من 25 يناير لحد النهاردة و كنت بنزل كل المظاهرات و أنا مش فى أى أحزاب ولا معايا أجندات!
و هسيب بس حاجتين كدة برضو عايز رأيكم فيها
http://www.almasryalyoum.com/node/393064
الخبر دة على أساس اننا هنود ؟ رجعنا تانى لعصر الكنتاكى و اليورو و الأجندات ؟
و دى شهادة واحدة هناك و الله أعلم فى صحته
[youtube]http://www.youtube.com/watch?v=0wRkijPDqNE&feature=player_embedded#at=305[/youtube]
المفضلات