ميكروباص خبطني و جري :(

**AhMeD EzZ** · 10-04-2011 08:37 PM

سلام عليكم

دمي محروق من ساعتها و بغلي

عربيتي لسة راشيشها من يومين

النهاردة في مصر الجديدة في موقف بتاع ميكروباصات و نقل عام

بلف من قدامة انا و ميكروباص المفروض ان الشارع الي طالعين عليه دة شمال بس!!

انا هديت و قفت لحد ما هو يلف و انا اطلع وراة

الحيوان مبرشم و ماشي مش شايف قدامة دخل يمين فيا و اكلكسلة مكمل فيا.!!

فيييييييييين البيه وقف و منزلش من العربية حتي !

انا نازي بغلي ما بصتش علي العربية حتي و جري عليه ناوي اطلع #@$%$%

لقيتة راجل كبير في السن شوية فمسكت نفسي شوية

بصيت علي العربية

لقيت الاكصدام ضاااااااااااااااع خالص و الرفرف اطبق

و نزلي التباع عمال يهدي فيا و يا بيه هتقبل عوض و مش هتقبل عوض و دة راجل غلبان اتكل علي الله

زعقت فيه و يا جدعان حرااام اكصدام لسة مكملش اسبوع اغرم فيه تاني 400 جنيه

انا ساعتها مكنش قادر امسك نفسي فصاحبي زقني في العربية عشان متهورش علي حد

جالي واحد قالي يا كابتن حرام تسيبة دة قاعد من ساعتها في العربية منزلش و عمال يشرب سيجارة !!

اتنرفزت اكتر و نزلت عليه بقي رايح اجيبة من قفاه

لقيتة بيقولي انا مكنتش سايق !!!

و التباع جي يقولي انا الي كنت سايق و هو نط مكاني !!

انا سمعت كدة خلاص بقي بقيت هسيح دمة و ربنا قدامي

و التباع بقي كمان بيبجح و يقولي مش كل حاجة عافية مسكت فيه و هاتك يا ضرب

في ساعتها هوووووووووب السواق يا فكيك و الناس خلعت من ايدي التباع و جري هو كمان

انا بقيت واقف متسوح و لا طلت اي حاجة

ربنا هداني و جبت واحد كدة شكلة قديم في الموقف و قلتلة عايز اسمة و رقم العربية

قعد يتصل شوية

جابلي الاسم كامل و رقم العربية و اسم صاحب العربية

انا من ساعتها بغلي و مش عارف اعمل ايه

حاسس اني كلت علي قفايا ضربة محترمة!!

يا ريت تشورو عليا اعمل ايه

**Deshahcoka** · 10-04-2011 08:45 PM

لا حول ولا قوة الا بالله :( كان عاوز ضرب النار ال تيتتتتتتتتت !

كدة زادت العملية قوي ....

والله مش عارف اقولك ايه ربنا ما يحكم على حد بالموقف ده لانوا ممكن بجد الواحد يتهور ... انا كنت ممكن عملت مصيبة !

**TAMERHASSAN** · 10-04-2011 09:02 PM

ربنا يعوض عليك

**eng.m7md.ali** · 10-04-2011 09:14 PM

كلهم ولاد تييييييت
ربنا يعوض عليك وولو عرفت تأجر بلطجية وتروح تجيب حقك متتاخرش لانه مش هيجيلك لحد عندك

**د.أحمد السعيد** · 10-04-2011 09:18 PM

ربنا يصبرك و يعوض عليك يا ابو حميد " فى اول ابتلاء"

و على فكرة أخذ العوض ليس حرام " من افسد شىء فعليه اصلاحه"

و ربنا يبدلك حسنات بصبرك و شوف لو عرفت توصل للسواق و تخلى زمايله يحكموا عليه

و اكيد انت متضايق لانك لسه مخلص رش العربيه

و انا حصل معايا موقف مشابه فى الاكصدام و يدوب بعد تظبيته بكام يوم اتخبط تانى فى نفس مكان الخبطة الاول !!

متحطش فى بالك المهم انت طلعت سليم و ربنا سترها معاك

**AhMeD EzZ** · 11-04-2011 03:07 AM

المشاركة الأصلية كتبت بواسطة د.أحمد السعيد

ربنا يصبرك و يعوض عليك يا ابو حميد " فى اول ابتلاء"

و على فكرة أخذ العوض ليس حرام " من افسد شىء فعليه اصلاحه"

و ربنا يبدلك حسنات بصبرك و شوف لو عرفت توصل للسواق و تخلى زمايله يحكموا عليه

و اكيد انت متضايق لانك لسه مخلص رش العربيه

و انا حصل معايا موقف مشابه فى الاكصدام و يدوب بعد تظبيته بكام يوم اتخبط تانى فى نفس مكان الخبطة الاول !!

متحطش فى بالك المهم انت طلعت سليم و ربنا سترها معاك

و الله يا دوك انا مكنتش عايز منة حاجة .. كنت هعمل محضر اثبات حالة و خلاص
بس الي حارق دمي حاجتين
برودة في الكلامة و تغليطة ليا عكس كوووووووووول الناس
و التانية هروبه .. الحمد لله علي كل شيء

**zago** · 11-04-2011 03:21 AM

حضرتك تشوف حد معرفه معاه جيب رانجلر وتروح تقف في خط السير بتاع الميكروباص ولما تشوفه تخش في الميكروباص من النص تعملهولو توكتوكين وتطلع تجري

بس ضميرك حيوجعك بعد فتره

الافضل تحتسبها عند ربنا ومحدش عارف هو لو مكنش خبطك وعطلك كان ممكن في الوقت ده تكون بتعمل حادثه لا قدر الله اشد من كده
بس ده ما يمنعش انك تروح الموقف تديله علقه كويسه

**maka** · 11-04-2011 03:24 AM

بس ياريس طالما انت جبت نمرة العربية و اسم صاحبها يبقى تعس باى طريقة ان كانت و تجيب عنوان صاحبها , و باذن الله بعد ما تجيب عنوانه و تليفونه تكلمه بالحسنة نفع ماشى منفعش يبقى تشوف حد فى منظقته يكون متسيط و كلمة مسموع يجبلك حقك و ابقى اديله اللى فيه النصيب

و ربنا يوفقك و يقويك