الموضوع: استفسار فى الجوازات

شكرا يا استاذ مصطفى على اهتمامك بالرد
لكن زى ما قلت انا نفسى تبقى فى ثورة على كل ما هو سئ، لأن الملاحظ فى البلد قبل 25 يناير ان كان فى حالة عصيان مدنى غير معلن ما حدش عايز يشتغل (الا من رحم ربى) ولو اشتغل عايز يعمل سبوبة والناس قاعدة تزهق فى بعض
اتمنى لو فى قناة اتصال تقدر توصل اقتراحاتنا
وده طبعا مش لاننا بنقول الامور تبقى همجية وبلطجة ولكن تفهم لتوصيل افضل خدمة
انا مش هجادلك فى موضوع الجوابات والمهنة اللى موجودة حتى فى الباسبور القديم وهتقولى ممكن تكون غيرتها، وفى النهاية انا عارف التعليمات لكن اتمنى يا رب نبقى فعلا بلد محترمة واحنا نستحق ده ودلوقتى ومؤهلين تماما

العفو ياجماعه ممكن تدخل على موقع وزارة الداخليه وتبعت الشكوى اللى انت عاوزها او الملاحظات اللى انتم شايفنها
عوز اقولك حاجه تخيل ان اخنا بنطلب شهادة التجنيد من مواليد 18/3/1941 وده هو تاريخ التجنيد الاجبارى للقوات المسلحه يعنى الراجل بيودع ولو جه يعمل جواز نطلب منه شهادة تجنيد بدل شهادة الوفاه
الموضوع ده يخص وزارة الدفاع لوحدها وحاولوا يحلوه كذا مره ومفيش فايده ووزارة الدفاع مصممه على القرار ده لانه بيدخل دخل كبير عن طريق الغرامه الى بتندفع من الناس اللى كانت هربانه من الجيش مع عدم مراعاه لاى سن وحالتهم الصحيه

المشاركة الأصلية كتبت بواسطة moustafa_saad

هو بيطلب منك جواب لو انت مقدم فى مكان غير توزيعك الجغرافى فبتجيبله جواب تثبت انك اتنقلت تبع المكتب اللى انتت رايح تقدم فيه الان بدل مايقولك غيرلى البطاقه بعنوان العمل الجديد ويعقدلك الدنيا فالجواب للتسهيل مش للتعقيد

كلام حضرتك جميل جدا وبرجع تانى واقول المشكلة مش فى الموظف لانه بيطبق قواعد جايله لكن المشكلة فى اللى بيحط القواعد وهو عايش فى كوكب تانى ومعتقد ان ده عين العقل..فحضرتك ليك تدافع عن شغلك لكن للاسف

لان ببساطة ردا على حضرتك:

- انا رايح اجدد باسبور مش اطلع باسبور جديد وبالتالى لن يكون هناك اى محل للتلاعب انى اطلع باسبورين او تلاتة حتى لو كنا فى النظام اليدوى

- موضوع الجواب حضرتك تقريبا فاهم كلامى غلط...أولا: الجواب لا علاقة له باثبات وظيفتى فى الباسبور نهائيا لانى مش رايح اغير الوظيفة انا عايز اجدده زى مهو...الجواب فقط علشان يرضى يطلعى الباسبور من المكتب ده...لكن الوظيفة فى الاخر حيجددهالى زى مهى فى الباسبور القديم مالم اكون عايز اغيرها.....ثانيا وده الاهم انا مكتوب فى البطاقة انى بشتغل فى وسط البلد..ومع ذلك الموظف يقولك هاتلى جواب من شغلك..طيب وهى البطاقة دى مش اثبات رسمى انى بشتغل فى وسط البلد!!!!! لا بالنسبة للموظف ده مش اثبات رسمى ولازم تروح تجيب جواب!!!يبقى ده للتسهيل؟..حيطلع جهبذ من عبدة الروتين يقول ميمكن تكون غيرت شغلك..حقولك طيب وايه يعنى برده مانا لو مغير شغلى ورحت القسم اللى انا تابع ليه حطلع الباسبور بالوظيفة القديمة

-موضوع ان الضغط بيبقى على القاهرة برده مش مقنع اولا لان الخدمة المفروض تروح للمكان اللى فيه الناس مش الناس هما اللى يدوروا على الخدمة وبالتالى لو فى ضغط على القاهرة يبقى الاعقل انى ازود المنافذ او الموظفين مش ابعت الموطنين يروحوا محافظة تانية....لان ببساطة احنا عندنا بطالة بالهبل يعنى لما تزود الموظفين فى القاهرة وتشغلهم (او تشغل اللى قاعدين على المكاتب مبشتغلوش) حيبقى اسهل مليون مرة من انك تخلى واحد ساكن فى الاسكندرية وبيشتغل هنا فى القاهرة يرجع اسكندرية تاني علشان يطلع الباسبور (فى حاجة على مستوى المجتمع بتقيس اد ايه اهدار لوقت وبنزين وزحام ويوم اجازة علشان الشخص يتنقل لمكان تانى فى محافظة تانية علشان يطلع ورقة)

- الموضوع ده مش فى الباسبورات بس ده فى كل حاجة (لدرجة انى كنت بحاول افتح حساب من البنك الاهلى والراجل عايز يبعتنى جنب محل سكنى!!!!!!!!!!!!!!!!) اروح (اجدد) رخصة العربية والعربية ملفها عندهم فى مدينة نصر بقالها سنين والرخص مكتوب فيها عنوانى فى مدينة نصر والبطاقة قديمة مكتوبة على عنوان تانى...الموظف يقولى لا مينفعش تجدد!!!!!!!!!!!!!!!! ازاى يا (متخل.*#@$%) اذا كان العربية ملفها عندك جوا...يقولى هات وصل نور يثبت انك ساكن هنا!!!!!! واجيب وصل النور ولا يبصوا فيه..كان مثلا التجديد فى مدينة نصر حيدينى اعفاء ضريبى فبحاول اجدد هناك

ثورة يعنى ثورة على كل الاجراءات واللوائج وقبلهم طريقة التفكير





احب اقول قصة سريعة فى انجلترا فى التسعينات لاحظ شخص ان فى عسكرى بيقف يحرس حيطة فاضية جوا البرلمان بتاعهم...فسال ليه العسكرى بيقف هنا محدش عرف....لما راجعوا السجلات اكتشفوا ان فى الخمسينات كانت الحيطة بتدهن فوقفوا جنبها عسكرى علشان محدش يخبط فيها...ومن ساعتها وكل الموظفين اللى جم بعدهم بقم اتوماتيك من غير تفكير يوقفوا عسكرى يحرس الحيطة!!!!!! من غير مواحد فيهم يتعب نفسه ويفكر انا لو لغيت الاجراء ده حيحصل ايه

لو الموظف طلب منك جواب اثبات الوظيفه اللى موجوده فى البطاقه رغم عدم تغييرها فاحب اقول لحضرتك ده مش روتين ده اسمه استهبال من الموظف وتكبير دماغ علشان مايستغلشى لان مافيش حاجه فى تعليمات الشغل عندنا بتقول الكلام ده وكان المفروض تدخل لرئيس المكتب وتستفسرمنه وتاخد حقك فى انك تطلع جواز من غير جواب

تانى حاجه جميع مكاتب الاقاليم فيها عجز موظفين ومش راضيين يعينوا حد علشان بيقولك رئيس الوزراء مانع التعيين علشان ميزانية البلد اللى كانوا بيسرقوها المكتب الوحيد تقريبا اللى مفيهوش عجز وفيه زياده كمان تغطى الشغل وضعفه هو مكتب التحرير ومع ذلك مش راضيين يعملوا الموضوع ده لانهم تقريبا خايفين يحصل طوابير وزحام شديد على الشبابيك وخناقات بين المواطنين زى مابتحصل عندنا فى بعض الاحيان يعنى عاوزين نفسهم يبقوا مروقين دايما بدون مشاكل ويقفولك اصل دية المصلحه وبيجيلها شخصيات عامه واجانب واللذى منه ومش عاوزين قلق وزحمه كبيره وممكن تفقد السيطره عليها
دية وجهة نظرهم وزى ماقولتلك انا مقتنع بيها على الوضع الراهن ومش داخل علشان ادافع عن المكان لان انا مجرد موظف مش صاحبقرار او مسئوليه لكن فعلا جميع اماكن خدمات الجماهير فى كل الوزارات لازم تتعدل اوضاعها وتسهل على الناس موضوع الانتقالات والزحام كفايه ان انا بشتغل من 8 الصبح وفيى ايام كنت بمشى من الشغل الساعه 5 ووصلت فى بعض الاحيان للساعه 7 كمان خصوصا فى موسم الشغل وناس تانيه فى اماكن اخرى قاعدين من غيرشغل طول اليوم وبيمشوا الساعه واحده الظهر
فى سوء توزيع فى موظفى الدوله بطريقه رهيبه ولازم يهتموا باماكن الخدمات الجماهيريه اكتر من كده بكتير
ياريت ياجماعه تبعتوا اقتراح على موقع الوزاره بالموضوع ده

المشاركة الأصلية كتبت بواسطة moustafa_saad

لو الموظف طلب منك جواب اثبات الوظيفه اللى موجوده فى البطاقه رغم عدم تغييرها فاحب اقول لحضرتك ده مش روتين ده اسمه استهبال من الموظف وتكبير دماغ علشان مايستغلشى لان مافيش حاجه فى تعليمات الشغل عندنا بتقول الكلام ده وكان المفروض تدخل لرئيس المكتب وتستفسرمنه وتاخد حقك فى انك تطلع جواز من غير جواب

شكرا لتفهمك راى وانا عارف انك مبتدافعش لانك فى الاخر مش صاحب القرار

يالا منه لله الموظف كنا واقفين مجموعة كبيرة ومشاها كلها علشان موضوع الجواب ده

وبعدين لو مش عايز يعينوا موظفين ميجيب موظفين من جهات تانية
يعنى كل موظفين وزارة الداخلية شغالين ال24 ساعة!!! مفى ناس فى ادارات تانية قاعدين على المكتب

لو فعلا عايزين نخدم الناس المفروض الخدمات متبقاش بتخلص الساعة 2 المفروض تبقى بتخلص7 او 8 بالليل وتبقى بتتفسم على 2 موظفين شيفتات...مهو مش معقولة اى واحد عايز يقضى مصلحة لازم ياخد اجازة او يهرب من الشغل لان الطبيعى ان كل الناس شغالة فى الوقت ده....لو اتعمل الموضوع حيقلل البطالة بشكل محترم وحيخلى الزحام اللى طول اليوم يخف واهم حاجة حيريح الناس