كيفية صيانة وتشغيل تكييف الهوندا

**khaled_rafea** · 28-05-2011 09:32 PM

السلام عليكم أخوانى الأعزاء, النهارده رحت لمحمد سعيد اللى فى المعادى علشان أظبط التكييف, انا كنت مغير كباس الصيف اللى فات بواحد 97, طلبت منه أنه يغيرلى الفلتر و الأكسبانشن و حساس الضغط بتاع السربنتينة و يظبط الدنيا, قالى نكشف الأول, وصل خرطوم بالبلف بتاع الفريون و قالى شغل, لقى الضغط 30, المهم الراجل قالى بص ريح نفسك و متصرفش عليه على الفاضى, قالى لو غيرنا كل حاجة حيفضل ضعيف برده و هو ده أدائة, و ما دام مدينا ضغط يبقى الفلتر و الأكسبانشن سلام, كل اللى نقدر نعمله أننا نكمل شحنه و خلاص, طبعا أنا جالى أحباط شديد و خدت العربية و مشيت, مع العلم أن الراجل ده المفروض شاطر جدا و اللى قالى عليه ميكانيكى هوندا , دلوقتى طالب مشورتكم, أغير الحاجات دى و أصرف على التكييف ولا أنساه و أغير العربية كلها وقت ما ربنا ييسر الحال ؟؟؟ وجزاكم الله خيرا

**wael ahmed** · 29-05-2011 02:24 AM

خالد باشا هوه محمد سعيد ده جنب on the run اللى فى المعادى .؟؟ انا معرفش اسم الميدان بس هوه قريب من البنزينه ... واللى قالك عليه محمود بتاع الهوندا ...... لو هو ده انا روحتله قبل كده واحبطنى احباط السنين قالى الكباس بايظ وكشفت عند واحد تانى قالى سليم . بجد موضوع التكييف ده موضوع محير جدااا ..... انا ان شاء الله افضى بس كده من الامتحانات وانزل اكشف عند كذا واحد ...
بص حضرتك فيه 3
الصعيدى ورا بنزينة موبيل اللى فى الطيران ( جامع رابعه ) وفيه واحد وراه اسمه العفريت
وفيه برضه مركز مقار المركز بجوار مسجد ال رشدان امام ارض المعارض
بعنى ممكن حضرتك تكشف عند كام واحد من دول وشوف ايه النتيجه وان شاء خير يا كبير
تحياتى : )

**tarekzein** · 29-05-2011 10:13 AM

أنا شخصيا أفضل زيدان ياوائل

بس الأفضل تروحله بدرى من أول اليوم قبل الزحمه

**honda forever** · 29-05-2011 03:12 PM

بعد إذنكم يا رجاله أنا عندى إستفسار صغير
لما أجى أشغل التكييف الماسوره اللى بره مبتسقعش بسرعه يعنى بتقعد حوالى نص دقيقه تقريبا
تفتكروا إيه السبب وهل ده يأثر على أداء التكييف؟

**SAMEH_FOUAD** · 29-05-2011 05:15 PM

المشاركة الأصلية كتبت بواسطة ibrahim hassan

بعد إذنكم يا رجاله أنا عندى إستفسار صغير
لما أجى أشغل التكييف الماسوره اللى بره مبتسقعش بسرعه يعنى بتقعد حوالى نص دقيقه تقريبا
تفتكروا إيه السبب وهل ده يأثر على أداء التكييف؟

انت تقصد ماسورة الضغط الواطى , وطالما الماسورة دية مابتسقعش غير بعد فترة يبقى فية حاجة من الاتنين

1- الفريون قليل فى الدورة او نوعة وحش

2- الكباس ضعيف

وطبعا مهمة جدا لان دية لازم تعرق مياة ساقعة وايدك ماتقدرش تحطها من قوة التلج عشان التكييف عندك يبقى تمام

**honda forever** · 29-05-2011 05:58 PM

معلش عندى سؤال تانى يا سمسم
الحساس اللى فى السربنتينه إيه وظيفته؟
ولو السربنتينه متغيره بواحده مفيهاش الحساس ده هل فى أى مشكله من أى نوع؟
والفنى خلى الكهربائى يشغل مروحة الردياتير مع التكييف عشان السربنتينه كبيره وداخله ورا الردياتير هل فى أى مشكله فى كده؟
معلش بتقل عليك يا باشا

**SAMEH_FOUAD** · 29-05-2011 06:19 PM

المشاركة الأصلية كتبت بواسطة ibrahim hassan

معلش عندى سؤال تانى يا سمسم
الحساس اللى فى السربنتينه إيه وظيفته؟
ولو السربنتينه متغيره بواحده مفيهاش الحساس ده هل فى أى مشكله من أى نوع؟
والفنى خلى الكهربائى يشغل مروحة الردياتير مع التكييف عشان السربنتينه كبيره وداخله ورا الردياتير هل فى أى مشكله فى كده؟
معلش بتقل عليك يا باشا

اولا بالنسبة لوظيفة حساس الفريون ودة متركب على السربنتينة , وظيفتة تنظيم فتح وغلق الفريون حسب الضغط وطبعا بيفتح ويقفل عند الوصول لضغط معين

طبعا فى مشكلة كبيرة لو الحساس دة مش موجود ان كدة ممكن الضغط عندك يرتفع من غير تنظيم

طيب بالنسبة لتشغيل مروحة الردياتير مع التكييف اثناء عملة هيعملك تأثير على كهرباء السيارة لان كدة الضغط زاد عليها وهتلاقى التكييف لما بيشتغل العربية بترعش شوية ومش مظبوطة

دة غير انة غلط اصلا يكون المروحة بتاعة الردياتير شغالة على طول , لان دة هيبان معاك وانت مسافر مثلا هتلاقى الحرارة بتقل شوية لان المروحة شغالة دريك مع التكييف , وخلى بالك انة بيبقى حمل على الكتاوت لانة اكيد موصلهالك بكتاوت مروحة السربنتينة

**SAMEH_FOUAD** · 29-05-2011 10:23 PM

المشاركة الأصلية كتبت بواسطة ibrahim hassan

بالنسبه للحساس إنت كده قلقتنى معلش ممكن توضيح أكتر يعنى لو الضغط إرتفع إيه اللى ممكن يحصل
أما بالنسبه لمروحة الردياتير الحراره ثابته مبتقلش خالص والكهربا مبتقلش ولا العربيه بترعش مع تشغيل التكييف لأنه عاملها على كتاوت منفصل

على فكره الشغل ده معمول عند زيدان (الصعيدى) وهو جابلى سربنتينه من عنده بس بصراحه مش عارف فيها الحساس ده ولا لأ
ربنا يستر

حساس الضغط دة فايدتة ان لما الضغط يبدأ يعدى الطبيعى يروح فاصل الكمبروسير عشان مايزودش الحمل علية واول لما يلاقى الضغط بدأ ينخفض يروح مشغل الكباس تانى