الموضوع: كيفية صيانة وتشغيل تكييف الهوندا

ان شاء الله مع دخول الصيف عملتلكوا موضوع يهمكوا كلكوا وهو كيفية المحافظة على تكييف السيارة وكيفية اخراج اقصى قوة منة
ان شاء الله هنستعرض مكونات التكييف , وكيفية صيانتة والمحافظة علية , وافضل طريقة تشغيل



اولا : مكونات التكييف :
تكييف الهوندا بيتكون من :

1- السربنتينة ( المكثف) : والسربنتينة دية بتقوم بوظيفة تحويل غاز الفريون الى سائل عن طريق التبادل الحرارى بواسطة مروحة التبريد المثبتة علية

2- الكومبريسور : ودة ظيفتة انة بيقوم بدفع غاز الفريون عن طريق سير يتم توصيلة بعمود الكرنك الخاص بالمحرك

3- المبخر ( الكويل ) : ودة بيقوم بدخول السائل الية فيمتص الحرارة الكامنة بة عن طريق الريش الخاصة بة ثم ابقائها فى ضغط منخفض ليتم دفعها مرة اخرى

4- ال expention valve او صمام التمدد : وهو صمام وظيفتة ان يمر من خلالة الفريون ويخرج فى صورة spray او رشاش نتيجة لعملية الخنق التى تحدث بسبب وجود ضغط منخفض

5- مروحة دفع داخلية : وهى المروحة التى تدفع الهواء الى كابينة السيارة

6- المجفف : ودة بيقوم بتنقية الفريون واخراج الرطوبة منة

*عشان نبقى عارفين ازاى التكييف يعمل هشرحها بصورة مبسطة على خطوات :
1- يدخل السائل الى المبخر فيمتص حرارتة ويتحول الى بخار وكل ذلك يتم عند ضغط منخفض
2- يتم سحب البخار الناتج من المبخر عن طريق الكباس وتحويلة الى ضغط مرتفع وبالتالى سوف ترتفع درجة حرارتة لان طبعا الكباس بيحول الطاقة الميكانيكة الى طاقة حرارية
3- يتم تحويل هذا البخار الى السربنتينة وتتم عملية تبادل حرارى لان جسم السربنتينة مبرد بالماء والهواء فيتم تحويل البخار الى سائل ذات ضغط ثابت ( ضغط مرتفع ) وهو ضغط السربنتينة
4- اخيرا يتم تتدخل صمام التمدد لكى تبقى الضغط منخفض وذلك عن طريق استخدام انبوب ضيق

ثانيا : كيفية صيانة التكييف :
1- يجب التاكد من سلامة الكومبريسور الخاص بالسيارة لانة علية 70% من كفاءة التبريد
2- التاكد من نظافة السربنتينة وذلك عن طريق تنظيفها جيدا بضغط الماء , ثم تنظيف الفتحات المشعة بكمبروسير ماء خفيف الضغط حتى لا يؤثر على الفتحات او الريش الخاصة بة والتأكد من عدم وجود تسريب بها
3- تنظيف الفلتر الخاص بالفريون ودة بيكون موجود جنب علبة الباور واللى بيبقى فية العين اللى بتشوف منها اذا كان فية هواء فى الدورة ولا لأ
4- تنظيف الكويل ( المبخر) ودة مهم جدااااااااااااااااااا لازم يتنظف ودة مكانة موجود تحت التابلوة عند الكرسى الامامى اللى جنب السائق , وبيبقى داخل قفص من الفبر محاط باسفنج بيتم فكة وطريقة تنظيفة انة يتكبس هواء , ويتحط فى مياة عشان نتاكد ان مافيش فية تسريب , ثم يتم تنيظف فتحاتة المشعة وتنظيفة من الداخل بالمياة
5- تنظيف مروحة التكييف ودية بردة مهمة جدا انها تتنظف لتسهيل حركتها وانخفاض الصوت الصادر منها لانكوا اكيد هاتفكوها هتلاقوا فيها بلاوى , ودية مكانها موجود امام الكويل بالظبط ومتركبة لأعلى يعنى فى سقف التابلوة من تحت
6- يجب ان نتأكد من وجود زيت فى الكمبروسير ليتم حركتة بسهولة ونعومة
7- يتم تظيف الهوايات جيدا من عند الكابوت ودية هتلاقيها لما تفتح الكابوت هتلاقى الهوايات تنفخ فيها ببلاور مثلا وتكون فاتح زجاج السيارة
8- اتأكد ان كل المواسير سليمة , ومحكمة الغلق
9- فية حساس بيتركب على السربنتينة اسمة حساس ضغط الفريون ودة يتنظف كويس ويتركب وهتلاقية متركب على السربنتينة ناحية الفانوس الشمال بتاع السائق من الجنب
10- اهم حاجة عشان تحس بالشغل دة كلة يتم سحب الهواء كلة من دورة التبريد , ثم اعادة ملئها بالفريون الانجليزى , البولندى لانهم افضل انواع الفريون الموجودة فى السوق وبلاش الكورى او الصينىى تعبانيين جدا ويتم تعبئة الفريون والمحرك يعمل لضمان سحب الكمبروسير للغاز ثم بعد ذلك يتم تزويد عدد لفات المحرك للتاكد من سلامة ضغط الفريون عند عدد لفات الماتور العالية
11- طبعا فية سيارات فيها فلتر تكييف ودة مكانة موجود خلف درج التابلوة بس معظم السيارات الخليجى بتشيل الفلتر لانة بيعمل نوع من تقليل كفاءة التبريد لان الجو هناك مليان غبار فبيسد الفلتر وعموما الفلتر دة بيتغير كل سنتين
12- بالنسبة لنوع الفريون يجب وضع الفريون المناسب للكباس يعنى مثلا السيارات التى تم انتاها من عام 84 الى 94 يتم وضع لها فريون r12 والسيارات التى تم انتاجها بعد ذلك يتم وضع لها فريون a134 والفرق مابين الاتنين ان ال r12 يكون مضر بالبيئة ولكن سرعة انتشارة داخل السيارة اسرع , اما ال a134 يكون محافظ على البيئة وبطىء نسبيا عن ال r12 فى سرعة الانتشار
ثالثا : الحصول على افضل كفاءة من التكييف :
1- لا يتم تشغيل التكييف والسيارة باردة يجب ان يتم تسخين المحرك اولا ثم تشغيل التكييف
2- لا تحاول ان تزيد سرعة السيارة عن 4000 الاف لفة والتكييف يعمل اذا كان لا يوجد فى السيارة فصل للتكييف عند بلوغ عدد لفات معين للحفاظ على الكباس
3- اذا كانت السيارة مركونة فى الشمس فيجب ان تترك الزجاج مفتوح ويفضل زجاج السيارة كلة ثم تشغل المروحة فقط عند السرعة الرابعة ثم بعد ذلك التحرك بالسيارة لمدة تتراوح مابين خمس دقائق الى 10 دقائق ثم تشغيل التكييف على الدرجة الثالثة حتى يتم تبريد السيارة بدون وجود حمل على التكييف لانة طبعا مش هيفصل الا لما العربية تبلغ درجة حرارة معينة . وبعد كدة يتم تعلية السرعة الى الدرجة الرابعة .
المشاكل اللى قد تواجهنا وكيفية اصلاحها ودية هنستعرضها بطريقة السؤال والاجابة :
1- س : انخفاض كفاءة التبريد فى السيارة ؟
ج : ذلك يرجع الى وجود تسريب فى دورة الفريون ويجب الكشف علية عند متخصص , او ان دورة التبريد تتاج الى تنظيف واهمها السربنتينة
2- س : عند تشغيل التكييف المروحة فقط هية التى تعمل ولا يوجد برودة ؟
ج : فى هذة الحالة يتم الكشف اولا على سير التكييف لانة ممكن يكون اتقطع , او عدم وجود فريون فى الدورة نهائيا , واخر الاحتمالات ان الكمبروسير تلف
3- س :عند تشغيل التكييف المحرك ينطفىء او عدد لفات الماتور ينخفض لدرجة كبيرة تكاد تبطل المحرك ؟
ج : فى هذة الحالة انصح بعدم سماع كلام اى شخص بتغير اى شىء من مكونات السيارة ل ماهنالك ان يتم فك الثروتل بودى وتنظيفة جيدا هو وبلف الايدل كنترول , ثم ظبط مسمار الفاكيوم على جهاز كشف الاعطال دة بالنسبة للانجيكشن , اما بالنسبة للكربراتير فيتم ظبط الفاكيوم الخاص بالتكييف وظبط السلك عن طريق شدة قليلا وماتخليش حد يلعب فى الكربراتير
4- س : عند الضغط على الفرامل او كسر الطارة يمينا او شمالا اثناء تشغيل التكييف ينخفض عدد لفات الماتور جدا ؟
ج : فى هذة الحالة يتم الكشف اولا على مدى احكام دورة الفرامل وكذلك الباور واذا تم التاكد من سلامتهم هذا يعنى ان عدد لفات المحرك منخفضة ويجب تعلية الماتور واذا تم تعلية الماتور يجب ان لايتعدى 850 لفة
5- س : ارتفاع صوت المروحة الخاصة بكابينة السيارة , وارتفاع صوت المروحة الخاصة بالسربنتينة وصدور صوت من الكباس اثناء تشغيل التكييف ؟
ج : بالنسبة لارتفاع صوت مروحة الكابينة فيتم علاجها عن طريق فكها وتنظيفها من الاتربة ثم تزييتها بالزيت الخاص بالمكن وليس زيت المحركات او الفرامل ,
وبالنسبة لصوت مروحة السربنتينة فهذا يعنى ان ادائها قد ضعف واصبحت بليتها خشنة
وبالنسبة لصوت الكباس فان الكباس يتم فكة وتغير البلية الخاصة بة , والكشف على الزيت الموجود بة اولا
ان شاء الله اذا تم عمل كل الخطوات دية والتاكد من سلامة المكونات يبقى كدة بإذن الله هيبقى معاك تكييف تلاجة وللمحافظة علية بنفس الكفاءة يتم تنظيف الدورة بالطريقة دية كل 3 سنوات

واى سؤال انا فى الخدمة ويارب يكون الموضوع عجبكم
هذا الموضوع من مجهودى واهداء منى الى اخوانى فى نايل موتورز

المشاركة الأصلية كتبت بواسطة HISHAM80

سمسم باشا كنت عايز أعرف زرار max Ac في سيفيك الجديده بيشتغل ازاي أنا متهيألي مبيفصلش compressor

شوف ياباشا زرار max ac دة وظيفتة عمل اعادة تدوير للهواء الموجود + زيادة قدرة اندفاع الهواء

وخلى بالك انت دلوقتى مثلا بتشغل عندك ال a/c العادى , وبعد كدة بتشغل الزرار اللى علية رسمة سهم ولافف صح , لأ دة بقى بيقوم بوظيفة ال a/c + وظيفة الزرار دة بقوة اكتر كمان

لكن مالوش دعوة خالص بموضوع فصل الكمبروسير لان دة لية علاقة بالكنترول مش بالتكييف