الموضوع: البطارية ماتت ولا ايه؟

المشاركة الأصلية كتبت بواسطة thedeveloper87

السلام عليكم ورحمة الله وبركاته

البطارية عندي كانت شغالة زي الفل بقالها سنتين إلا شهر ، وكشفت عليها من 4 أيام والشحن وكانت زي الفل ، بس كان على الأقطاش أملاح كتير ، والراجل نظفها كويس وملا البطارية مياه وكله فل الفل... ورحت بيها مشواير يومين من غير أي مشاكل ... وثالث يوم بدورها الصبح ودارت علطول من غير أي مشاكل ، ورحت بيها مشواري .... جيت أدورها بالليل لقيتها ما بتنطقش خالص .... وزقيت العربية ورميت ورمت علطول من غير مشاكل ... ورحت مشواري ، جيت أدورها النهارده برضه ما بتنطقش خالص .... هل كده البطارية تعيش أنا؟؟؟ ولا فيها أمل؟؟

الغريبة إن البطارية قطعت مرة واحدة من غير أي مقدمات

البطارية سائلة النسر فارتا ، قعدت سنتين إلا شهر
مشاويري قليلة جدا ، 10 آلاف كيلو في السنة

ملحوظة: من كام يوم صوت الكلاكس اتغير ، هل ده ليه علاقة؟؟؟

وشكرا

شكلها كده تعيش انت

صوت الكلاكس بيتغير فعلا لما البطارية بتضعف
اكشف عليها عند كهربائي...او افتح انت المسامير بتاعتها وبص فيهم وهي العربية دايرة وسخنة
لو لاقيت في فتحة فيها المياة بتغلي وتتقلب...يبقي كده البطارية جابت ربع

انا كمان لما التوكيل عملي صيانة للبطارية من نفسه (مقلتلوش اعمل صيانة) مكملتش اسبوع وودعت
اما بيستخدموا مياه مقطرة مغشوشة او بيزودوا المياة كتير ولا ايه مش عارف
البقاء لله بقي

المشاركة الأصلية كتبت بواسطة thedeveloper87

ايه ده ، يعني ممكن يكون المياه اللي حطهالي الراجل السبب؟؟؟؟؟؟؟؟؟؟؟

لا انا معرفش عشان مفتيش...بس انا بحكيلك اني حصلي نفس الموضوع..كانت شغالة اخر تمام وبمجرد اني عملتلها صيانة ودعت...وبعد سنتين برده وكمان في التوكيل
مع اني قعدت السنتين بدون اي صيانة ليها وكانت تمام وكنت متابع مستوي المياة فيها بنفسي ومكنش بتنقص...مش عارف هما لعبوا فيها ليه
ممكن يكون عمرها الافتراضي..الله أعلم

المشاركة الأصلية كتبت بواسطة thedeveloper87

ما هو نفس اللي انت بتحكي عليه حصلي بالظبط

البطارية كانت شغالة زي الفل وما اشتكتش منها أبدا ، وكنت بسبها بال 5 أيام وأدورها وما تنطقش معايا .... مع العلم أنا كنت مهمل جدا في صيانتها ، وبعد ما عملتلها صيانة ، باظت في ظرف يومين

أعملها صيانة بنفسي ولا ايه بالظبط؟؟؟ وهل تعرف مياه مقطرة نوعها نظيف؟
هل حضرتك تعرف مركز صيانة معتمد ، أو كهربائي نظيف عنده ضمير؟

بصراحة مش عارف ازاي يتعملها صيانة صح ولا نوع مياه كويس..
انا جبت بطارية جافة AC Delco ..وهي البطارية في الاخر هتموت مع عمرها الافتراضي واعتقد سنتين كويس
الجافة بقي مالهاش صيانة ومفيهاش بخر مياة فبالتالي بتحافظ علي القاعدة عشان الحامض الي في البطارية السايلة بيعمل املاح علي قاعدة البطارية ويخليها تصدي وتقدر تقول تبوووووووووووووش
من ناحية السايلة...اعتقد الواحد ممكن يعملها صيانة بنفسه...بس فيه مقياس لكثافة الحامض معرفش بصراحة شغلته ايه وبتتقاس ازاي ده ممكن يفيد في الموضوع ده...
انا بصراحة كنت بفتح المسامير كل شهر مثلا ابص بصة لو المياة تمام ومفيش فتحة المياة فيها بتغلي يبقي كده تمام
بس طبعا ده ميغنيش كمان عن قياس الدينامو بس انا كنت صراحة معتمد ان العربية جديدة والدينامو مش هيقصر معايا

اه حاجة كمان...الكهربائية بلطجية...بيفتحوا المسامير بمفك عادة فبيبوظوه..يخلوه لما يركب تاني ميحكمش القفل...فبالتالي بيزود من بخر مياه البطارية يخليها تبوظ الدنيا املاح وبالتالي البطارية تبوظ كمان (ده استنتاج واجتهاد من عندي)
فبقيت لما بشيك علي البطارية اجيب الريال الفضة العريض ده وافتح المسامير بيه...بس اكيد فيه مفك مخصوص

ارجو اكون افدتك

المشاركة الأصلية كتبت بواسطة thedeveloper87

جزاك الله خيرا

أنا عن نفسي هجيب بطارية جافة واريح نفسي من وجع الدماغ ده إن شاء الله

ال ac delco عاملة معاك ايه؟؟؟

هي الناس هنا علي المنتدي بتشكر فيها وليا اصحابي شكرولي فيها
انا ملحقتش استخدمها كتير لاني رفعت العربية...بس عايز اقولك اني سيبت العربية اكتر من شهر بدون ما ادورها ورجعت دورتها قومت العربية بدون اي مشاكل
حاليا رافع العربية واهلي بيدوروها كل اسبوع او اتنين وتمام الحمد لله

المهم لما تشتري اي بطارية لازم يكون تاريخ انتاجها جديد (بيكون مكتوب عليها وعلي الضمان تاريخ الانتاج)
توكيل البطارية دي في رابعة العدوية بس مش عارف فين بالظبط فاعتقد هتلاقي هناك دايما بطاريات تاريخ انتاجها جديد