ينفع واحدة اردنية او ليبية يبقى معاها بطاقة مصرية؟

السلام عليكم ورحمة الله وبركاته

هل ينفع واحدة اردنية او ليبية تحمل بطاقة رقم قومى مصرية ؟

ليه السوال ده ؟

قبل ما اتوضى واصلى الضهر.الباب خبط.فتحت لقيت واحدة ملامحها غير مصرية ولفة الحجاب عير مصرية.

المهم .

السلام عليكم يا اخويا انا اختك اردنية عايشة بلبيا ولسة راجعة ومعايا 3 اطفال بقالهم يومين مكالوش وانا حامل وقاعدة فى الجنينة اللى جارك.

وهاى البطاقة.بص عليها.

لا يا ستى.قوليلى بس اقدر اخدمك بايه.

هتبدا تعيط.قولتلها طيب ثانية واحدة وقفلت الباب ودخلت حضرتها اللى فى النصيب.

رجعتلها لقيتها قاعدة على الارض وراحت قايمة مرة واحدة ومتشكرة يا اخويا وربنا يكرمك.

اللى خلانى اعمل الموضوع ده هنا اننى بعد ما نزلت سالت نفسى :

لو هيا حامل ازاى قامت مرة واحدة كده؟

البطاقة ؟

ليه مطلعتش لبقية العمارة ولا كان همها تدى اولادها الاكل وتجيبلهم حاجة؟


لا حول ولا قوة الا بالله.اللهم الطف بينا جميعا.

ياسيدي عادي، إنما الأعمال بالنيات، يعني أنت عملت خير واللي عملته دا هي شهامة المصريين الرجالة بحق وحقيق، تطلع نصابة بقا، تطلع اردنية تطلع بتنجانية هي وضميرها..لكن تصرفك كان صح والمهم انك قفلت الباب أثناء ماكنت بتجيب الفلوس وخلاص.

برافو عليك من الاخر.

الله اعلم بس سؤال هي ما رحتش على السفارة الاردنية ليه؟

وبعدين اكيد بطاقة هوية اردنية

لان لو بطاقة مصرية يبقى اكيد معاها الجنسية المصرية

المثل بيقول حرررص ولا تخونش

وربنا يجازيك على نيتك ان شاء لله

انا مش المشكلة اننى اديتها حاجة او لا.او اتضحك عليا ولا لا.الاننى فعلا لما بكون فى اى موقف زى كدة وناس تقولى ده ضحك على الدقون ولا ولا ز انا بتبقى نيتى لله.يعنى يعتبره زكاة.

والحمد لله ربنا هدانى اقفل الباب.مع اننى كنت متاكد انها لوحدها و كانت ضعيفة جدا.

لا حول ولا قوة الا بالله.اللهم ما ابعد همزات الشيطان اللى خلانى افكر انها ممكن تكون بتكدب والله اعلم بالنفوس.

لو كانت متجوزه واحد مصري

بص
هو لو امها مصرية او متزوجه من مصري بتاخد جنسيه وبطاقه عادي جدا

بالنسبه لانها مراحتش السفاره ليه فهو ممكن متعرفش مكانها ومعهاش اللي يوصلها
بالنسبه لانها قامت مره واحده فده عادي جدا مش قضيه وفي حوامل مبيبنش عليهم خالص وبيمارسو حياتهم عادي جدا

بالنسبه لانها مطلعتش لبقية الناس فممكن لانها خدت اللي محتاجاه وانها مش بتشحت فعلا انما عندها كرامه

ايا كان جزاك الله خيرا ويارب يكون في عون كل الغلابه


تحياتي

من ال Facebook محطوطة ك Status لاحد الاصدقاء

يا جماعة : لو سمحتم خللى بالكو .. اسوقفنى اليوم واحد شكلو صايع و قالى انو اردنى و جاى من ليبيا بعد الأحداث و وررانى جوزات سفر اردنية و بيقول انها بتاعتو هو و مراته و عيالو و طلب منى فلوس عشان يرجع الأردن ... اثناء ما كان بيكلمنى عدو من وراة اربع اشخاص شكلهم مريب لفتو نظرى ... اديتو فلوس و راقبته لمدة ربع ساعة ثم لقيتو ماشى مع الأشخاى اللى شكلهم مريب سبقتهم بالسيارة و توجهت لأقرب وحدة عسكرية و شرحتلهم الحكاية و وقفنا فى انتظارهم حتى تمكنا من الامساك بهم و تبين ان اتنين منهم معهمش اى اوراق او تحقيق شخصية و اصبح كلامهم متناقض جدا ... للأسف كنت مستعجل و اضطريت امشى و تركتهم للجيش لان الموضوع استغرق تقريبا 45 دقيقة الخلاصة ركزوا قوى فى الكلام مع اى حد متعرفوش و لا تستأمن اى حد و لو شكيت لحظة فى اى حاجة مريبة تضر بالأمن لا تتردد لحظة ارجوك فى الأبلاغ حتى لو حتضيع شوية وقت ... محدش عارف الناس ديه كانو ممكن يعملو ايه فى حد تانى

مش عارف فيه علاقة بين الحادثتين و لا لا بس الكل يخلي بالو

الحمد لله ربنا وفقنى وكرمنى اننى اكرمها وفعلا هى قالت انها معهاش مصارى(فلوس).

وحاولت تاكد انها غريبة ومبتشحتش لانه اصرت كذا مرة اننى ابص على البطاقة.

على العموم ربنا يرحم عبيده والله هو خير الراحمين.

اللى متاكد منه ان مكانش فيه حد معاها واتاكدت اكتر لما نزلت وبصيت عليها وهى ماشية وكانت بردوا لوحدها.والله اعلم.

الله اعلم بحال الناس .. وربنا معاهم لو صادقيين الناس دي بدون مأوي والسفارة بتاعتهم هاتعمل اية ولا اية ؟
واحنا عارفيين حال السفارات العربية !