عدلت الفرامل الامامية بتاعتى و الحمد لله
الحمد لله امبارح عملت تعديل الفرامل و المكونات كانت كالأتى:
1 - طنابير بريمبو بتاعة اوبل فيكترا (300 جنيه)
2 - ماستر عمومى نوبيرا (270 جنيه)
3 - تيل نوبيرا (65 جنيه)
4 - كالبرات لانوس 1600 استيراد من الحرفيين (محل الروضة) (200 جنيه)
5 - علبتين زيت باكم (30 جنيه)
، بس احب انبه لحاجة مهمة، انا كنت اشتريت جنوط نوبيرا اسبور الأصلى
http://www2.0zz0.com/2008/04/10/06/794228725.jpg
لما ركبنا كل حاجة اتضح ان مفيش مسافة بين الجنط و الكاليبر، راح الأسطى عبد البنهاوى بعت خرط الدايرة الصغيرة فى الطنابير القديمة (الدايرة اللى فيها اماكن المسامير) علشان نركبهم فوق الطنابير الجديدة و ده خلانا نحتاج نطول المسمار اللى بيربط الطنبور (و ده كان سهل جبت الأتنين بجنيه) بس كمان احتجنا 8 مسامير اطول للجنوط و جبناهم بتوع مرسيدس (الواحد ب 10 جنيه)
الحمد لله تمت على خير و انطباعى عن التعديل ايجابى جدا و انا عارف ان اداء الفرامل لسه هيتحسن لما التيل يطبع، بس لو قارنا بالوضع القديم بعد تركيب التيل مثلا، يبقى التحسن بنسبة من 40% - 50 % و انا راضى جدا عنه لأنى مكنتش متضايق اوى من الفرامل القديمة، بس احساسى الدائم ان الفرامل غالبا مش هتسعفنى فى المفاجأت - و ما اكثرها فى شوارعنا - الأحساس ده كان بيخلينى متكتف فى سواقتى و سايب مسافات بينى و بين العربيات و للأسف أغلب السواقين بيعتبروها دعوة مفتوحة لأخذ غرزة من امامى او التزنيق عليا لأحتلال المساحة اللى قدامى كأنهم كسبوا مليون جنيه